డబ్బుల్లేక నెలకు రూ.10 లక్షలు అప్పు చేస్తున్నా: నీరవ్ మోడీ

దేశం విడిచి పారిపోయిన వజ్రాల వ్యాపారి నీరవ్ మోడీ గురించి తెలిసిందే. బ్యాంకుల నుంచి వేల కోట్ల రుణాలు తీసుకున్న ఈ ఆర్థిక నేరగాడు ఒకప్పుడు విలాసవంతమైన జీవితాన్ని గడిపాడు. అయితే ప్రస్తుతం అతడి దగ్గర చిల్లిగవ్వ లేదట. నీరవ్​ను ఇండియాకు అప్పగించే విచారణలో భాగంగా చట్టపరమైన ఖర్చులు చెల్లించాలని లండన్‌లోని హైకోర్టు ఆదేశించింది. అయితే ఈ చెల్లింపులకు సంబంధించి బర్కింగ్‌సైడ్ మేజిస్ట్రేట్ కోర్టు ముందు వర్చువల్‌గా హాజరయ్యాడు నీరవ్. కోర్టు ఆదేశించిన మొత్తాన్ని ఒకేసారి చెల్లించలేనని.. నెలకు 10 వేల పౌండ్ల చొప్పున కడతానని అర్జీ పెట్టుకున్నాడు. ఆ 10 వేల పౌండ్లను ఎక్కడి నుంచి తెస్తావని న్యాయమూర్తి అడగ్గా.. తన దగ్గర డబ్బు లేదని, కోర్టుకు చెల్లించాల్సిన మొత్తం కోసం అప్పు తీసుకుంటున్నానని నీరవ్ చెప్పాడని తెలుస్తోంది.

భారత సర్కారు తన ఆస్తులన్నింటినీ సీజ్‌ చేయడంతో డబ్బుల కోసం తీవ్రంగా ఇబ్బంది పడుతున్నానని నీరవ్ మోడీ కోర్టుకు చెప్పాడు. కాగా, పీఎన్‌బీని వేల కోట్ల రూపాయలు మోసగించిన కేసులో ఇండియాకు అప్పగించే విషయంలో గతేడాది నీరవ్ మోడీకి చుక్కెదురైంది. అతడ్ని భారత్‌కు అప్పగించేందుకు లండన్‌ హైకోర్టు అనుకూలంగా తీర్పును ఇచ్చింది. అలాగే ఈ తీర్పుపై యూకే సుప్రీం కోర్టులో అప్పీల్ చేసేందుకు నీరవ్‌కు కోర్టు నుంచి అనుమతి లభించలేదు. అయితే ఇండియాకు రాకుండా ఉండేందుకు ఆయనకు ఇంకా మార్గాలు ఉన్నట్లు సమాచారం.

Nirav Modi claims he has no funds to pay UK court fines.#NiravModi, the fugitive diamond merchant wanted in India has claimed that he has no funds and is resorting to borrowing money to pay the court-ordered legal costs amounting to more than 150,000 pounds. pic.twitter.com/G2jbUKsuNC

— Rahul Chauhan (@chauhanrahullll) March 10, 2023