follow us:
ఆన్ లైన్‌ షాపింగ్.. ఇప్పుడు ఎవరిని కదిలించినా కూడా ఇదే మాట. స్మార్ట్‌ ఫోన్‌ తీసుకోవడం ఆన్లైన్లో షాపింగ్ చేసేయడం. ఖాళీగా ఉంటే సరదాగా కూడా ఇ-కామర్స్ సైట్స్‌ ఓపెన్ చేసి ఏం ఆఫర్లు ఉన్నాయా అని చూస్తుంటారు. అది చాలామందికి అలవాటు కూడా అయిపోయింది. ఇప్పుడు గుండుసూది నుంచి ప్రతి వస్తువు ఇ-కామర్స్ సైట్లలో అందుబాటులో ఉన్నాయి. అందరూ అడుగు బయట పెట్టకుండానే ఇంట్లోకి కావాల్సిన ఉప్పులు, పప్పులు మొదలుకుని ఎలక్ట్రానిక్స్, గాడ్జెట్స్, యాక్ససరీస్ ఇలా అన్నింటిని కొనేస్తున్నారు. గతంలో లాగా దుకాణానికి, స్టోర్లకు వెళ్లడం బాగా తగ్గించారు.
లాక్ డౌన్ తర్వాత కూడా మనుషులు బయటకు వెళ్లి షాపింగ్ చేయడం చాలా వరకు తగ్గించారు. కూరగాయలు, పాలు కూడా ఆన్‌లైన్లోనే కొనేస్తున్నారు. వినియోగదారుల ఆసక్తి, వాళ్ల అభిరుచికి తగినట్లు ఇ-కామర్స్ సైట్లు కూడా వారిని ఆన్లైన్లో షాపింగ్ చేసేందుకు ప్రోత్సహిస్తూ ఉంటుంది. వారికోసం ఆఫర్లు కూడా ఇస్తుంటుంది. కొంతమంది కస్టమర్లకు అయితే స్పెషల్ ఆఫర్స్ కూడా ఉంటాయి. వెల్‌కమ్ ఆఫర్ అని, వీక్లీ ఆఫర్ అని, పండగ ఆఫర్ అని ఇలా రకరకాల ఆఫర్లతో మిమ్మల్ని షాపింగ్ చేసేలా టెంప్ట్ చేస్తుంటారు. బయట మార్కెట్ తో పోలిస్తే ఇ-కామర్స్ సైట్లలో తక్కువకు వస్తువులు లభిస్తుండటంతో అంతా అక్కడే కొనేస్తున్నారు.
అయితే.. ఫ్రీ డెలివరీ, సంక్రాంతి స్పెషల్, స్వతంత్ర దినోత్సవ ఆఫర్, రిపబ్లిక్ డే సేల్, దసరా బొనాంజా, రంజాన్ స్పెషల్, ఫ్రీ రిటర్న్ ఇలా చెప్పుకుంటే పోతే చాలా ఆఫర్లు, సదుపాయాలు ఈ ఆన్ లైన్‌ ఇ-కామర్స్ సైట్లలో మీకు లభిస్తుంటాయి. అయితే ఇన్ని ఆఫర్లు ఇచ్చే కంపెనీలకు మరి లాభాలు ఎలా వస్తున్నాయి? అన్నింటిపై డిస్కౌంట్లు, ఆఫర్లు ఇస్తుంటే వారికి నష్టాలు రావా? ఇలాంటి ప్రశ్నలు కొన్నిసార్లు మీకు కూడా వచ్చే ఉంటాయి. అయితే ఆ ప్రశ్నలకు చాలా మందికి సమాధానం తెలియకపోవచ్చు. చాలామంది ఈ విషయాలను పట్టించుకోరు కూడా. అయితే వారికి లాభాలు ఎలా వస్తాయో ఇప్పుడు చూద్దాం.
ఇ-కామర్స్ సైట్స్‌ ఏవైనా కూడా వారు వస్తువులను అమ్మకం- కొనుగోలు చేసేందుకు ఒక ప్లాట్‌ఫామ్‌ని ఏర్పాటు చేస్తారు. అక్కడ వస్తువులను ఉత్పత్తి చేసే వాళ్లు, రిటైల్‌ లో సేల్ చేస్ వాళ్లు సెల్లర్‌గా రిజిస్టర్‌ అవుతారు. వారి ఉత్పత్తులను ఇ-కామర్స్ సైట్‌లో లిస్ట్‌ చేస్తారు. కస్టమర్లు వారికి కావాల్సిన వస్తువులను ఇ-కామర్స్ సైట్ లో వెతుక్కుని మంచి ఆఫర్ ఉంటే కొనుగోలు చేస్తారు. వస్తువు క్వాలిటీ విషయంలో కూడా ఇ-కామర్స్ సైట్స్‌ భరోసాని ఇస్తూ ఉంటాయి. మీకు వస్తువు నచ్చకపోతే పరిమిత రోజుల్లో రిటర్న్ కూడా చేయచ్చు. అందుకు ఎలాంటి అదనపు డబ్బు వసూలు చేయరు. మీకు వస్తువు నచ్చకపోతే ఆర్డర్ క్యాన్సిల్ కూడా చేయచ్చు.
ఇలా క్రయ- విక్రయాలు చేసేందుకు ఇ-కామర్స్ కు ఒక పెద్ద వ్యవస్థ ఉంటుంది. దాని మెయిన్టినెన్స్ కూడా సంస్థ వాళ్లే చూసుకోవాల్సి ఉంటుంది. ఇందుకు చాలా ఖర్చు కూడా అవుతుంది. అయితే ఈ ఖర్చు, ఆఫర్లు, డిస్కౌంట్స్ అన్నీ కూడా ఎవరైతే ఇ-కామర్స్ సైట్‌లో విక్రయాలు చేస్తారో వాళ్లే భరించాల్సి ఉంటుంది. ఇంక లాభాల విషయానికి వస్తే.. వారి సైట్ లో అమ్మకాలు చేసుకునేందుకు అవకాశం కల్పించినందుకు సదరు విక్రయదారుడు ఇ-కామర్స్ సైట్కి కమిషన్ చెల్లించాల్సి ఉంటుంది. కొందరు వస్తువు ధరపై 17 శాతం అంతకంటే ఎక్కువ కూడా కమిషన్ తీసుకుంటూ ఉంటారు. ఆ విధంగా ఇ-కామర్స్ సైట్లు లాభాలను పొందుతూ ఉంటాయి.
