follow us:
బంగ్లాదేశ్ ఓపెనర్, స్టార్‌ బ్యాటర్‌ తమీమ్ ఇక్బాల్ సంచలన నిర్ణయం తీసుకున్నాడు. తాను అంతర్జాతీయ టీ20 క్రికెట్ నుంచి తప్పుకుంటున్నట్లు ఆదివారం తన అధికారిక ఫేస్‌ బుక్‌ పేజ్‌ ద్వారా ప్రకటించాడు. తమీమ్ ఇక్బాల్ కెప్టెన్సీలో బంగ్లాదేశ్- వెస్టిండీస్‌ పై మూడు మ్యాచ్‌ల వన్డే సిరీస్‌ను సునాయాసంగా గెలిచి క్లీన్ స్వీప్ చేసింది. అంతేకాకుండా తమీమ్ ఇక్బాల్ ఈ సిరీస్లో ప్లేయర్ ఆఫ్ ది సిరీస్‌గా నిలిచాడు. ఈ సిరీస్‌ తర్వాత తమీమ్ ఇక్బాల్ రిటైర్మెంట్‌ ప్రకటించాడు.
తమీమ్ ఇక్బాల్ ఈ జనవరిలో బంగ్లా క్రికెట్ బోర్డుతో మాట్లాడిన తర్వాతే రిటైర్మెంట్‌ నిర్ణయానికి వచ్చినట్లు తెలుస్తోంది. అందుకే అప్పటి నుంచి అతను బంగ్లాదేశ్ తరఫున టీ20ల్లో ఆడలేదు. కానీ, ఆ టైమ్‌లో దేశీయంగా మాత్రం తమీమ్ టీ20 మ్యాచ్‌లు ఆడటం గమనార్హం. వచ్చే టీ20 వరల్డ్‌ కప్‌ నేపథ్యంలో జట్టులో అతని చోటుపై సందిగ్ధం నెలకొంది. ఇలాంటి తరుణంలో అతను స్వచ్ఛందంగా తప్పుకోవడమే మంచిదని భావించినట్లు అభిప్రాయాలు వినిపిస్తున్నాయి.
Congratulations to Tamim Iqbal for the Player of the Series!#BCB #Cricket #WIvBAN pic.twitter.com/s7KTk7pkyy
— Bangladesh Cricket (@BCBtigers) July 16, 2022
తమీమ్ ఇక్బాల్ టీ20 కెరీర్ గురించి పదే పదే బంగ్లాదేశ్ క్రికెట్ బోర్డు ప్రస్తావించడం, ప్రకటనలు చేయడం కూడా ఈ నిర్ణయానికి కారణం కావచ్చని భావిస్తున్నారు. బోర్డుపై అసంతృప్తితోనే తమీమ్ ఈ నిర్ణయానికి వచ్చి ఉండచ్చని అనుమానాలు, విమర్శలు వినిపిస్తున్నాయి. ఇటీవల వెస్టిండీస్‌తో టీ20 సిరీస్‌లోనూ తమీమ్ ఆడలేదు. రాబోయే టీ20 ప్రపంచకప్ లో అతని ఎంపిక కష్టమేనని భావించి టీ20ల నుంచి తప్పుకున్నాడు.
ఆదివారం అతని ఫేస్‌ బుక్‌ అకౌంట్లో.. ‘ఈరోజు నుంచి నేను అంతర్జాతీయ టీ20 మ్యాచ్‌ల నుంచి రిటైర్మెంట్‌ తీసుకున్నట్లు భావించండి’ అంటూ రాసుకొచ్చాడు. పక్కన బైబై ఏమోజీలు పెట్టాడు. అతని టీ20 కెరీర్ విషయానికి వస్తే.. 2007లో టీ20ల్లో అరంగేట్రం చేసిన తమీమ్ ఇక్బాల్ 78 అంతర్జాతీయ టీ20 మ్యాచ్‌లు ఆడాడు. 116.9 స్ట్రైక్ రేట్‌తో శతకం, 7 అర్ధ శతకాల సాయంతో.. 1,758పరుగులు చేశాడు. ఇక నుంచి తమీమ్ ఇక్బాల్ వన్డే, టెస్టు ఫార్మాట్లలో మాత్రమే కొనసాగనున్నాడు. తమీమ్ వీడ్కోలు పలకడంపై మీ అభిప్రాయాలను కామెంట్స్ రూపంలో తెలియజేయండి.
