follow us:
సీనియర్‌ హీరోయిన్‌ జయప్రద గురించి ఈ తరం వారికి పెద్దగా పరిచయం లేకపోవచ్చు.. కానీ.. 1970-80 మధ్య కాలంలో యువకుల కలల రాణిగా నిలిచింది. అప్పట్లోని స్టార్‌ హీరోలందరితో నటించింది. ఆ తర్వాత సెకండ్‌ ఇన్నింగ్స్‌లో కూడా కొన్ని సినిమాలు చేసింది. ఏపీలో టీడీపీ నుంచి రాజకీయ ప్రస్థానం ప్రారంభించి.. ఏకంగా జాతీయ రాజకీయాల్లో కూడా రాణించింది. అక్కడ ఉత్తరప్రదేశ్‌ సమాజ్‌వాదీ పార్టీలో చేరింది. ఆ తర్వాత పార్టీని వీడి.. 2019లో బీజేపీలో చేరింది. ప్రస్తుతం పార్టీలో క్రియశీలకంగా వ్యవహరిస్తుంది. జాతీయ రాజకీయాల్లో సత్తా చాటినప్పటికి.. ఆమెకు తెలుగు రాష్ట్రాల్లో రాజకీయాల్లో పాల్గొనాలనే ఆసక్తి ఎక్కువ. ఈ విషయాన్ని పలుమార్లు వెల్లడించింది. తాజాగా మరోసారి ఏపీ రాజకీయాలపై ఆసక్తికర వ్యాఖ్యలు చేసింది జయప్రద.
రాజ‌మ‌హేంద్రవరంలో బీజేపీ గ‌ర్జన పేరిట ఆ పార్టీ జాతీయ అధ్యక్షుడు జేపీ న‌డ్డా అధ్యక్షతన నిర్వహించిన స‌భ‌కు హాజ‌రైన సంద‌ర్భంగా జయప్రద ఈ వ్యాఖ్యలు చేశారు. కొన్ని అనివార్య ప‌రిస్థితుల వ‌ల్లనే తాను రాష్ట్ర రాజ‌కీయాల‌కు దూర‌మ‌య్యాన‌ని ఈ సంద‌ర్భంగా ఆమె చెప్పారు. అంతేకాక తెలుగు రాష్ట్రాల ప్రజలకు జయప్రద క్షమాపణ చెప్పింది. రాజమండ్రి తన స్వస్థలమని.. ఇక్కడి నుంచే దేశ రాజకీయాల్లోకి వెళ్లినట్లు గుర్తు చేసుకుంది. మన ఊరు, మనవాళ్లను వదిలి వెళ్లినందుకు క్షమించండి అంటూ తెలుగు ప్రజలను కోరింది.
ఇది కూడా చదవండి: బంగార్రాజుకు గ్రీన్ సిగ్నల్ ఇచ్చిన జయప్రద
ఈ సంద‌ర్భంగా జయప్రద మాట్లాడుతూ ఆంధ్రప్రదేశ్‌ను అప్పుల ప్రదేశ్‌గా మారుస్తున్నారంటూ ఆరోపించారు. రాష్ట్రంలో రైతుల ప‌రిస్థితి ద‌య‌నీయంగా మారింద‌ని ఆమె ఆవేద‌న వ్య‌క్తం చేశారు. బ‌డుగు బ‌ల‌హీన వ‌ర్గాలు అట్ట‌డుగు స్థాయికి వెళుతున్నాయ‌ని ఆమె చెప్పారు. యువ‌త‌కు స‌రైన ఉపాధి అవ‌కాశాలు క‌ల్పించ‌డం లేద‌ని ఆమె ఆరోపించారు. తెలుగు రాష్ట్రాల్లో మ‌హిళ‌ల‌కు ఎలాంటి ర‌క్ష‌ణ లేకుండాపోయింద‌ని జయప్రద ధ్వజ‌మెత్తారు. ఈ నేప‌థ్యంలో రెండు రాష్ట్రాల్లో బీజేపీని బ‌లోపేతం చేయాల్సిన అవ‌స‌రం ఉందని ఆమె పిలుపునిచ్చారు.
ఇది కూడా చదవండి: YCP: జనసేన, టీడీపీల పొత్తుల వ్యవహారం.. జ‌గ‌న్ రొట్టె విరిగి నేతిలో ప‌డినట్లేనా!
ఇటీవల హైదరాబాద్‌లో ఓ కార్యక్రమంలో పాల్గొన్న జయప్రద.. మళ్లీ తెలుగు రాష్ట్రాల్లో రాజకీయం చేయాలని ఉందని వ్యాఖ్యానించారు. ఆ తర్వాత కొద్ది రోజులకే ఆమె ఏపీ బీజేపీలో కీలకపాత్ర పోషించాలని నిర్ణయించుకున్నట్లుగా కనిపిస్తోంది. తాజాగా రాజమండ్రి సభలో చేసిన వ్యాఖ్యలతో ఆమె ఆంధ్రప్రదేశ్, తెలంగాణ రాజకీయాల్లో క్రియాశీలకంగా మారాలనుకుంటున్నట్లు తన మనసులో మాట చెప్పిందనే టాక్‌ వినిపిస్తోంది. మరి జయప్రద వ్యాఖ్యలపై మీ అభిప్రాయాలను కామెంట్స్‌ రూపంలో తెలియజేయండి.
ఇది కూడా చదవండి: పొత్తుల లెక్కలో తగ్గని జనసేనాని! ఇరకాటంలో చంద్రబాబు!
