ఇండియాపై అర్ధరాత్రి విదేశీ కుట్ర! కోస్ట్ గార్డ్స్ మీకు సెల్యూట్!

దేశంలోకి అక్రమంగా డ్రగ్స్​ను సరఫరా చేయాలన్న విదేశీ కుట్ర మరోసారి భగ్నమైంది. భారీగా మాదకద్రవ్యాలతో భారత జలాల్లోకి ప్రవేశించిన ఇరాన్​ పడవను గుజరాత్ తీరంలో ఇండియన్ కోస్ట్​గార్డ్ అదుపులోకి తీసుకుంది. ఆ బోటులో సోదాలు నిర్వహించగా.. రూ.425 కోట్ల విలువైన 61 కిలోల హెరాయిన్​ను స్వాధీనం చేసుకున్నారు. అలాగే ఆ పడవలోని ఐదుగురు ఇరానీ దేశస్థులను అరెస్ట్ చేశారు. సముద్ర మార్గం ద్వారా భారీగా డ్రగ్స్​ను దేశంలోకి అక్రమంగా తరలించేందుకు ప్రయత్నాలు జరుగుతున్నాయని నిఘా వర్గాల నుంచి సమాచారం రావడంతో ఇండియన్ కోస్ట్​గార్డ్ సిబ్బంది అలర్ట్ అయ్యారు. సోమవారం రాత్రి రెండు పడవలతో అరేబియా సముద్రంలో పెట్రోలింగ్ నిర్వహించారు.

పెట్రోలింగ్ నిర్వహిస్తున్న సమయంలో గుజరాత్​లోని కచ్ జిల్లా, జాఖౌ తీరానికి 340 కిలోమీటర్ల దూరంలో ఒక పడవ అనుమానాస్పదంగా కనిపించింది. దాన్ని పట్టుకునేందుకు కోస్ట్​ గార్డ్ పడవలు వెళ్లాయి. వాటిని చూడగానే పారిపోయేందుకు ప్రయత్నించారు. కానీ తీరప్రాంత భద్రతా సిబ్బంది వారిని ఛేజ్ చేసి మరీ అడ్డుకున్నారు. ఆ పడవను ఇరాన్​కు చెందినదిగా అధికారులు గుర్తించారు. అందులోని ఇరాన్​ దేశస్థులను అదుపులోకి తీసుకున్నారు. అలాగే పడవలోని రూ.425 కోట్ల విలువైన హెరాయిన్​ను స్వాధీనం చేసుకున్నామని డిఫెన్స్ పీఆర్​వో పేర్కొన్నారు. దీనిపై తదుపరి దర్యాప్తు కోసం ఆ పడవను జాఖౌ తీరానికి తీసుకెళ్లామని చెప్పారు.