follow us:
ప్రత్యేక దేశం కైలాసను ప్రకటించుకున్న నిత్యానంద.. ఐక్యరాజ్యసమితి ఆమోదం కోసం ఎదురుచూస్తున్నారు. ఈ క్రమంలో కైలాస ప్రతినిధి ఒకరు ఐరాస చర్చల్లో పాల్గొన్నారు. ఆల్మోస్ట్ తమకు ప్రత్యేక దేశం ఇచ్చేసినట్టే అన్నట్టు సంకేతాలు ఇచ్చారు. మరి ఇందులో నిజం ఎంత?
వివాదాస్పద ఆధ్యాత్మిక గురువు, స్వయం ప్రకటిత దైవం నిత్యానంద స్థాపించిన ప్రత్యేక దేశం కైలాస ప్రతినిధి ఒకరు ఐక్యరాజ్యసమితి చర్చల్లో పాల్గొన్నారు. సుస్థిర అభివృద్ధి అంశంపై ఆర్ధిక, సామాజిక, సాంస్కృతిక హక్కుల కమిటీ జెనీవాలో ఈ నెల 24న చర్చా కార్యక్రమం ఏర్పాటు చేసింది. అయితే ఈ చర్చలో యునైటెడ్ స్టేట్స్ ఆఫ్ కైలాస ప్రతినిధిని అంటూ విజయప్రియ నిత్యానంద అనే మహిళ పాల్గొని ప్రసగించారు. యునైటెడ్ స్టేట్స్ ఆఫ్ కైలాస తరపున చర్చల్లో ఇయాన్ కుమార్ అనే వ్యక్తి కూడా పాల్గొన్నారు. హిందూ మతాన్ని, హిందూ మత ఆచార సాంప్రదాయాలను ప్రచారం చేస్తున్న నిత్యానందను భారతదేశం అనేక ఇబ్బందులకు గురి చేస్తుందని విజయప్రియ నిత్యానంద ఆరోపించారు. నిత్యానందకు భద్రత కల్పించాలని కోరారు.
హిందువుల కోసం తొలి సార్వభౌమ దేశమైన కైలాస దేశాన్ని నిత్యానంద ఏర్పాటు చేశారని, 10 వేల స్థానిక హిందూ సంప్రదాయాలను, నాగరికతను పునరుద్ధరిస్తున్నారని ఆమె అన్నారు. హిందూ మతానికి చెందిన అత్యున్నత గురువు నిత్యానంద పరమశివం ఈ కైలాస దేశాన్ని నెలకొల్పారని అన్నారు. ఆహారం, వసతి, వస్త్రాలు, విద్య, వైద్యం అన్నీ కైలాస దేశ ప్రజలకు ఉచితంగా ఇస్తామని అన్నారు. తాను 150 దేశాల్లో రాయబార కార్యాలయాలు, స్వచ్చంద సంస్థలను స్థాపించానని, తనను శాశ్వత రాయబారిగా ప్రకటించాలని విజయప్రియ నిత్యానంద కోరారు. ఇక నిత్యానందపై ఎన్నో ఆరోపణలు ఉన్నాయి. అత్యాచారం, అపహరణ కేసుల్లో నిత్యానందపై అరెస్ట్ వారెంట్ జారీ చేయడంతో 2019లో దేశం విడిచి వెళ్లిపోయిన సంగతి తెలిసిందే.
అప్పటి నుంచి అజ్ఞాతంలో ఉంటున్న నిత్యానంద ఈక్వెడార్ సమీపంలో ఓ దీవిని సొంత దేశంగా ప్రకటించుకున్నారు. దానికి కైలాస అనే పేరు కూడా పెట్టుకున్నారు. ఐక్యరాజ్యసమితి ఆమోదం కోసం ఎదురు చూస్తున్నారు. అయితే ఐక్యరాజ్యసమితి గుర్తింపు పొందాలంటే భద్రతా మండలి, సర్వప్రతినిధి సభ ఆమోదం ఉండాలి. 193 దేశాల జాబితాలో కైలాస దేశం లేదు. అయితే జెనీవా చర్చల్లో కైలాస ప్రతినిధి పాల్గొనడం ద్వారా ఐక్యరాజ్యసమితి గుర్తింపు లభించిందన్న సంకేతాలు ఇవ్వడం కోసం ప్రయత్నిస్తున్నారన్న అభిప్రాయాలు వ్యక్తమవుతున్నాయి. మరి దీనిపై మీ అభిప్రాయమేమిటో కామెంట్ చేయండి.
USK at UN Geneva: Inputs on the Achievement of Sustainability
Participation of the United States of KAILASA in a discussion on the General Comment on Economic, Social and Cultural Rights and Sustainable Development at the United Nations in Geneva
The Economic, Social, and… pic.twitter.com/pNoAkWOas8
— KAILASA’s SPH Nithyananda (@SriNithyananda) February 25, 2023
