follow us:
కుక్కలు.. జంతువులన్నింటిలోకెల్లా ఇవి ఎంతో విశ్వాసంగా ఉంటాయి. అలాగే మనిషికి బెస్ట్ ఫ్రెండ్ కూడా శునకాలే. అయితే ఈ శునకాల ప్రవర్తన ఎంతో విచిత్రంగా ఉంటుంది. ఇవి కొన్నిసార్లు కార్లు, బైక్ల వెనకాల పరుగులు పెడుతూ కనిపిస్తాయి. మీరు బ్రేక్ వేయగానే అవికూడా ఆగిపోయి వెనక్కి వెళ్తాయి. మళ్లీ మీరు బండి స్టార్ట్ చేయగానే వెంబడిస్తాయి. అవి ఎందుకు అలా చేస్తాయో ఆలోచించారా? అసలు అందుకు గల కారణం ఏంటో మీకు తెలుసా? దానికి వివిధ కారణాలు ఉన్నాయి. అవేంటో ఇప్పుడు చూద్దాం..
మీరు రోడ్లపై వెళ్లే సమయంలో పగలు కానివ్వండి, రాత్రులు కానివ్వండి కుక్కలు మీ వాహనాలను వెంబడిస్తూ ఉంటాయి. అందుకు ఒక కారణం అని చెప్పలేం. ఎందుకంటే అందుకు పలు కారణాలు ఉన్నాయి. ముఖ్యంగా కుక్కలు అవి ఉండే ప్రాంతానికి చెందిన కార్లను వెంబడించవు. అవి వాటి మూత్రంతో ఆ ప్రాంతంలో ఉండే కార్లను మార్క్ చేసుకుంటాయి. అవి కాకుండా కొత్త కార్లు ఆ ప్రాంతంలోకి వస్తే వాటిని వెంబడిస్తాయి. వాటి వల్ల వాటికి, ఆ ప్రాంతంలో ఉండే ప్రజలకు ప్రమాదంగా భావించి అలా చేస్తుంటాయి.
అవి కొన్ని రంగులు కలిగిన కార్లు, బైకుల వెంట మాత్రమే పడుతుంటాయి. ఎందుకంటే ఆ రంగులు వాటికి నచ్చనవి అయి ఉండాలి లేదా ఆ రంగు వాహనాల వల్ల వాటికి కానివ్వండి తోటి కుక్కలకు కానివ్వండి ప్రమాదం జరిగుండాలి. అలాంటి సందర్భాల్లో కుక్కలు ఆ రంగులను గుర్తుపెట్టుకుంటాయి. ఆ రంగు కలిగిన వాహనాల వెనుక పడుతూ ఉంటాయి. అలాగే వాటికి పెద్ద శబ్ధాలు నచ్చవు. పెద్ద మోత వచ్చే వాహనాలను కూడా కుక్కలు వెంబడించే అవకాశం ఉంది.
కుక్కలు సరదా కోసం వాహనాలను వెంబడిస్తూ ఉంటాయి. అంటే పొద్దున నుంచి అలా పడుకుని బోర్ కొట్టి కూడా కుక్కలు ఒక్కోసారి వాహనాలను వెంబిస్తూ ఉంటాయి. అలా చేయడం వల్ల వాటికి ఉల్లాసం, ఒంటికి వ్యాయామం జరుగుతుందని జంతు నిపుణులు చెబుతుంటారు. ఒక ప్రాంతంలో కొత్త వ్యక్తులను చూసినప్పుడు కూడా అవి వాహనాలను వెంబడిస్తూ ఉంటాయి. తెలిసిన వ్యక్తులు అయితే మాత్రమే కుక్కలు నిదానంగా ఉంటాయి. ఇలాంటి కారణాల వల్లే కుక్కలు మనుషులను, వాహనాలను వెంబడిస్తూ ఉంటాయి.
అయితే ఇలాంటి సందర్భాల్లోనే కుక్కలు ప్రమాదాలకు కూడా గురవుతూ ఉంటాయి. కాబట్టి రోడ్డు మీద మీ బండి వెంట కుక్కలు పరుగెడుతూ వస్తుంటే కాస్త నిదానంగా వెళ్లాలని, అవి పరిగెత్తుకుంటూ వచ్చినా కూడా ఏమీ చేయవని నిపుణులు చెబుతుంటారు. కొన్నిసార్లు ఒంటరితనం వల్ల కూడా కాసేపు ఆడుకోవడానికి అలా వాహనాల వెంటపడుతూ ఉంటాయని నిపుణులు అంచనా వేస్తున్నారు. మీరు నిదానంగా వెళితే ఆ కుక్కలకు ప్రమాదం జరగకుండా ఉంటుందని సూచిస్తున్నారు. మీరు వాహనం ఆపి ఆ కుక్కలను పలకరించి వెళ్తే.. మళ్లీ మిమ్మల్ని వెంబడించవని చెబుతుంటారు.
