follow us:
సినిమా పేరు : థాంక్యూ
నటీనటులు : నాగ చైతన్య, రాశీ ఖన్నా, మాళవికా నాయర్, అవికా గోర్, సాయి సుశాంత్ రెడ్డి, ప్రకాశ్ రాజ్
డైరెక్టర్ : విక్రమ్ కే కుమార్
నిర్మాతలు : రాజు, శిరీష్
మ్యూజిక్ డైరెక్టర్ : తమన్
సినిమాటోగ్రఫీ : పీసీ శ్రీరామ్
రిలీజ్ డేట్ : 22 జులై 2022
‘మనం’ చిత్రం తర్వాత హీరో నాగచైతన్య, దర్శకుడు విక్రమ్ కె. కుమార్ కాంబినేషన్‌లో రూపొందిన తాజా చిత్రం ‘థ్యాంక్యూ’. ఈ చిత్రంలో రాశీ ఖన్నా, అవికా గోర్, మాళవికా నాయర్ హీరోయిన్లుగా నటించారు. శ్రీమ‌తి అనిత స‌మ‌ర్ప‌ణ‌లో శ్రీ వెంక‌టేశ్వ‌ర క్రియేష‌న్స్ బ్యాన‌ర్‌పై దిల్‌రాజు, శిరీష్ ఈ చిత్రాన్ని నిర్మించారు. ఇప్పటికే విడుదలైన టీజర్‌, ట్రైలర్, పాటలకు మంచి స్పందన వచ్చింది. దానికి తోడు ప్రమోషన్స్‌ కూడా గ్రాండ్‌ చేయడంతో ‘థ్యాంక్యూ’పై ఆసక్తి పెరిగింది. భారీ అంచనాల మధ్య నేడు(జులై 22) ఈ చిత్రం ప్రేక్షకుల ముందుకు వచ్చింది. ఇప్పటికే ఓవర్సీస్‌తో పాటు పలు చోట్ల సినిమా రిలీజ్ అయ్యింది. మరి ‘థ్యాంక్యూ’ కథేంటి.. నాగ చైతన్య ఖాతాలో మరో హిట్ పడిందా లేదా అనేది ఇప్పుడు చూద్దాం.
సినిమాలలో వేరియేషన్స్ అనేవి ప్రతి సినిమాలో చూపిస్తూనే ఉన్నాడు నాగ చైతన్య. అలాగే తన కెరీర్ కి ఉపయోగపడే కథలు, క్యారెక్టర్ లతో పాటు తన ఫ్యాన్ బేస్ విస్తరించుకునే విధంగా ప్లాన్ చేసుకుంటున్నాడు. ఈ క్రమంలో తాజాగా థాంక్యూ అనే ఎమోషనల్ మూవీతో ప్రేక్షకుల ముందుకొచ్చాడు. అయితే.. ఈ సినిమాలో చైతూ మూడు వేరియేషన్స్ లో కనిపిస్తాడు. నాగచైతన్య ఇదివరకు మూడు వేరియేషన్స్ ని ప్రేమమ్ సినిమాలో చూపించేసాడు. మరి మేకర్స్ ఇందులో ఏమైనా కొత్తదనం తీసుకొచ్చారేమో రివ్యూలో తెలుసుకుందాం.
కథ:
మన సక్సెస్ కు కారణమైన వాళ్లను అస్సలు మరిచిపోకూడదు.. అనేదే ఈ సినిమా కథాంశం. నారాయణపురం అనే చిన్న గ్రామానికి చెందిన అభిరామ్(నాగచైతన్య) నుండి పట్టుదలతో టాప్ మోస్ట్ బిలినియర్ అవుతాడు. అయితే.. తన కెరీర్ లో సక్సెస్ కి కారణం తానేనని, సొంతంగా ఎవరి సహాయం లేకుండా ఎదిగాను అనే ధీమాతో బతికేస్తుంటాడు. ఈ జర్నీలో అతనికి ప్రియా(రాశిఖన్నా) పరిచయం అవుతుంది. ఆ తర్వాత తన సక్సెస్ వెనుక చాలామంది వ్యక్తులు ఉన్నారని అభి రియలైజ్ అవుతాడు. అప్పటినుండి ఓ థాంక్యూ టూర్ స్టార్ట్ చేస్తాడు. మరి అభి తన కృతజ్ఞతా భావాన్ని ఎలా చూపిస్తాడు..? ఆ థాంక్యూ టూర్ ఎలా సాగింది? అనేదే తెరపై చూడాల్సిందే.
విశ్లేషణ:
నాగ చైతన్యకి లవ్ స్టోరీస్ కొత్త కాదు. అలాగని మాస్ కటౌట్ లేదని కాదు. కానీ.. ఈసారి కూడా తనకు మనం లాంటి క్లాసికల్ హిట్ ఇచ్చిన దర్శకుడు విక్రమ్ కే కుమార్ తో క్లాస్ స్టోరీనే ఎంచుకున్నాడు. ఈ సినిమాలో నాగచైతన్య(అభిరామ్) సరసన రాశీఖన్నా(ప్రియా), అవికా గోర్(చిన్నూ), మాలవికా నాయర్(పారు) హీరోయిన్లుగా నటించారు. ఇక సినిమాలోకి వెళ్తే.. అభిరామ్, ప్రియా పాత్రలను పరిచయం చేస్తూ సినిమా కూల్ గా ప్రారంభం అవుతుంది. ఈ క్రమంలో ఫస్ట్ హాఫ్‌ ని అందమైన ఎమోషన్స్, రొమాంటిక్ సీన్స్ తో నడిపించే ప్రయత్నం చేశారు. అక్కడక్కడా చిన్న ట్విస్ట్‌ల రూపంలో ఫ్లాష్ బ్యాక్ సన్నివేశాలు వస్తాయి.
ఇక ఫ్లాష్ బ్యాక్ లో పారు(మాళవిక నాయర్)తో వచ్చే సన్నివేశాలు కొత్తగా అనిపిస్తాయి. అభి, పారు క్యారెక్టర్స్ మధ్య కెమిస్ట్రీ బాగా కుదిరింది. అలా ఫస్టాఫ్‌ లో అసలు కథ ఏంటనేది రివీల్ చేయకుండా.. ఆద్యంతం హీరో, హీరోయిన్స్ మధ్య కెమిస్ట్రీని చూపిస్తూ సాగించారు. మంచి ఎమోషన్స్ ఉన్నప్పటికీ, ఇంటర్వెల్ ఎపిసోడ్ ట్రైలర్ లో విన్న డైలాగ్ కంటే కొత్తగా అనిపించకపోవడం గమనార్హం. కేవలం అభి తన జర్నీకి సహకరించిన వారికీ థాంక్యూ చెప్పాలని రియలైజ్ అవ్వడంతో ఇంటర్వెల్ ముగుస్తుంది.
ఇక సెకండాఫ్ లో హీరో ఎలా థాంక్యూ చెప్పాడు అనే అంశం చుట్టూనే కథ తిరుగుతుంది. అంటే.. సెకండాఫ్ లో హీరోనే ప్రధానము. కానీ.. అతని లక్ష్యాన్ని ఆల్రెడీ ఇంటర్వెల్ లోనే రివీల్ చేసినప్పటికీ, సెకండాఫ్ అంతా థాంక్యూ చెప్పడాన్నే లక్ష్యంగా పెట్టడమే ప్రేక్షకులకు కొంత నిరాశ కలిగించవచ్చు. ఎక్సపెక్ట్ చేసే స్థాయిలో సెకండాప్గ్ కథ పుంజుకోకపోవడం థ్యాంక్యూకి బిగ్ మైనస్ అని చెప్పవచ్చు. ఇక చిన్నూ పాత్రలో అవికా గోర్ సెకండ్ హాఫ్‌ లో ఎంట్రీ ఇస్తుంది. అవికా, చైతు మధ్య వచ్చే సీన్స్ కాస్త రిఫ్రెషింగ్‌ గా అనిపిస్తాయి. సినిమా అంతా ఆకట్టుకునే సన్నివేశాలు అక్కడక్కడా కనిపిస్తాయి. కానీ.. అంతకు మించి బలమైన కథను ఎక్సపెక్ట్ చేస్తే డిసప్పాయింట్ అయ్యే అవకాశం లేకపోలేదు.
ఇక సినిమాలో మహేష్ బాబు రిఫరెన్స్ ఎక్కువగానే ఉంది. మధ్యలో మహేష్ బాబు ఫ్యాన్ గా సినిమా కటౌట్ కట్టిస్తాడు హీరో. అభిరామ్ పాత్రలో నాగ చైతన్య చక్క‌ని నటన, వేరియేషన్స్ తో ఆకట్టుకున్నాడు. రాశీ ఖన్నా, అవికా గోర్, మాళవిక నాయర్ తమ పాత్రల మేరకు బాగా చేశారు. ఇక ప్రకాష్ రాజ్ తక్కువ స్క్రీన్ స్పేస్ కలిగి ఉన్నప్పటికీ మెప్పించారు. మిగిలిన తారాగణం అంతా వారి పాత్ర పరిధి మేరకు బాగా చేసారు. ఈ సినిమాకు కథను బీవీఎస్ రవి అందించడం విశేషం. కానీ.. సినిమా అంతా సింగిల్ లైన్ తో సాగుతుందని దర్శకనిర్మాతలు ఎలా గ్రహించలేకపోయారు అనే సందేహం కలగకమానదు.
దర్శకుడు విక్రమ్ కుమార్ ఉన్న కథ మేరకు సింపుల్ ఎమోషన్స్‌తో చిత్రాన్ని నడిపించారు. కానీ.. నాగ చైతన్య ఫ్యాన్స్ ఆశించే అంశాలు తక్కువ అనే చెప్పాలి. తన లైఫ్ జర్నీలో ఎదుగుదలకి సహకరించిన వారికి ఎమోషనల్‌గా హీరో ఎలా థ్యాంక్యూ చెప్పాడు అనే పాయింట్ నే సినిమా అంతా సాగదీయడంతో ప్రేక్షకులు బోర్ ఫీల్ అయ్యే అవకాశం ఉంది. పీసీ శ్రీరామ్ కెమెరా వర్క్, తమన్ బిజియం ఎంతో అద్భుతంగా ఉన్నాయి. సినిమా నిర్మాణ విలువలు బాగున్నాయి. ‘థాంక్యూ’ మూవీ బాక్సాఫీస్ వద్ద ఎలాంటి ఫలితాన్ని అందుకుంటుందో చూడాలి.
ప్లస్‌ పాయింట్స్‌:
* నాగ చైతన్య యాక్టింగ్‌
* తమన్ బీజీఎమ్‌,
* పీసీ శ్రీరామ్ సినిమాటోగ్రఫీ
మైనస్ పాయింట్స్‌:
* పట్టు మిస్ అయిన కథనం
* సింగిల్ లైన్ స్టోరీ
చివరిమాట:
థ్యాంక్యూ.. ఫ్యాన్స్ కి మాత్రమే నచ్చే సినిమా!
రేటింగ్‌: 2/5
నోట్‌: ఈ రివ్యూ సమీక్షకుడి వ్యక్తిగత అభిప్రాయం మాత్రమే.
