కడుపు నిండిపోయే సన్నివేశం.. కలిసే దుకాణం నడుపుతున్న హిందూ-ముస్లిం!

ఈ భూమ్మీద రెండే కులాలు, రెండే మతాలు, రెండే వర్గాలు ఉన్నాయి. అవి ఉన్నోడి వర్గం, లేనోడి వర్గం. డబ్బే మతం, కులం అన్నీ. ఆ డబ్బు ఉంటే కోటీశ్వరుడు, లేదంటే ఏమీ లేని నిరాడంబర ఈశ్వరుడు. ఇవేమీ పట్టని జనం మాత్రం ఇంకా కులాలు, మతాలు అని చెప్పి అక్కడే ఆగిపోతున్నారు. మత విద్వేషాలు రెచ్చగొడుతూ.. పరాయి మత దేవుళ్లను కించపరుస్తూ, అవమానిస్తూ అదే జీవితం అనే భ్రమలో బతికేస్తున్నారు. కానీ తమ మతాలు వేరైనా గానీ అన్నదమ్ముల్లా కలిసి ఉంటున్న మనుషులు ఉన్నారు. ఒక తల్లి కడుపున పుట్టి అడుగు భూమి కోసం కొట్టుకు చచ్చే అన్నదమ్ములు ఉన్న ఈరోజుల్లో కలిసి వ్యాపారం చేస్తున్న మతస్తులు ఇద్దరు ఉన్నారు. వారు మరెవరో కాదు హిందూ, ముస్లిం.

సాధారణంగా హిందూ, ముస్లిం అంటేనే మతపరంగా అభిప్రాయాలు వేరు వేరుగా ఉంటాయి. అయినప్పటికీ చాలా మంది స్నేహంగా మెలుగుతున్నారు. కానీ కలిసి వ్యాపారం చేయడం అనేది చాలా అరుదైన సంఘటన. ఒక హిందువు, ముస్లిం వ్యక్తులు ఇద్దరు కలిసి ఒకే వ్యాపారం వేరు వేరుగా చేస్తూ ఉండవచ్చు. స్నేహితుడి దారిలోనే మరొక స్నేహితుడు వెళ్లడం మామూలే. కానీ ఇద్దరూ కలిసి ఒకే వ్యాపారాన్ని చేయడం అనేది గొప్ప విషయం. ఇలాంటి ఘటనలు కేవలం మన భారత్ లోనే సాధ్యమవుతాయి. కలకత్తాలోని కుద్ ఘాట్ లో ‘టూ బ్రదర్స్’ పేరుతో దుకాణం ఉంది. దీన్ని ఒక హిందువు, ఒక ముస్లిం వ్యక్తి కలిసి కొన్నేళ్లుగా నడుపుతున్నారు. షూలు, లెదర్ బ్యాగులు రిపేర్ చేయడం వీరి వృత్తి.

దుకాణం చాలా చిన్నది. అయినా గానీ ఇంత చిన్న దుకాణం మీద ఆధారపడి ఈ ఇద్దరూ జీవనం సాగిస్తున్నారు. దీన్ని ఒక ట్విట్టర్ యూజర్ తన ఖాతాలో షేర్ చేయగా అది కాస్తా వైరల్ గా మారింది. ఈ ఫోటోలో వారిద్దరూ కూర్చుని ఆసక్తికరంగా దేని గురించో చర్చించుకుంటున్నారు. అయితే వీరిని ఇలా చూసి నెటిజన్స్ సంతోషంతో కామెంట్స్ చేస్తున్నారు. నిజంగా ఇది కదా మనకి కావాల్సింది అంటున్నారు. ఎంత పార్ట్నర్ షిప్ ఉన్నా గానీ కొన్ని రోజులకు ఇద్దరి మధ్య అభిప్రాయ బేధాలు అనేవి వస్తాయి. కానీ వీరిని చూస్తుంటే అభిప్రాయ బేధానికే అసూయ కలిగి ఎప్పుడో అలిగి పుట్టింటికి వెళ్ళిపోయి ఉంటుంది. అంతలా వీరు ఇద్దరూ రామలక్ష్మణుల్లా ఉంటున్నారు. వీరు టూ బ్రదర్స్ మాత్రమే కాదు, ట్రూ బ్రదర్స్ కూడా. మరి మీరేమంటారు. వీరిని ఇలా చూసి కడుపు నిండిపోయిందని అంటారా!

A neighborhood shop run by a Hindu and a Muslim. The name of the store is ‘Two Brothers’. With time, the shop that repairs shoes and leather bags have become smaller.. But still exists. 💙 pic.twitter.com/fpyDDwzfXd

— Debotri Ghosh (@DebotriG) June 4, 2023