అడుక్కోవడం పెద్ద స్కామ్! వీరి రోజూవారి సంపాదన ఎంతో తెలుసా?

రైల్వేస్టేషన్లలో, బస్ స్టేషన్లలో, రోడ్ల మీద ట్రాఫిక్ కూడళ్ల దగ్గర బిచ్చగాళ్లు రోజూ ఎదురవుతుంటారు. వాళ్ళని మొదటిసారిగా చూసినవాళ్లు అయ్యో పాపం అని జాలిపడి డబ్బులు వేస్తారు. ఆ మనిషి ఏ రూపాయో వేస్తే ఆ బిచ్చగాడు పై నుంచి కింద దాకా చూస్తాడు. వాళ్ళకీ ఆత్మాభిమానం ఉంటుంది. ఈ మధ్య ఫోన్ పేలు, గూగుల్ పేలు కూడా పెట్టుకుని భిక్షాటన చేసుకుంటున్నారు. ఎంత బెగ్గర్ అయినా గానీ పనిలో ఉన్నప్పుడే బిచ్చగాడు.. డ్యూటీ దిగాక వాళ్ళ లైఫ్ వేరే ఉంటుంది. ఉదయం నుంచి చినిగిన బట్టలు వేసుకుని.. కాళ్ళు లేని వాడిలా నటిస్తూ బిచ్చమెత్తుకునే వ్యక్తి.. సాయంత్రం అవ్వగానే డ్యూటీ దిగేసి టిప్ టాప్ గా రెడీ అయ్యి అందమైన అమ్మాయిలకు లైన్ వేస్తారు. ఇలాంటి బిచ్చగాళ్ళు కూడా ఉన్నారు. కొంతమంది అయితే అందరిలానే సొంత ఇల్లు, కార్లు ఉండాలని కోరుకుంటారు, కొనుక్కుంటారు.

ఈరోజుల్లో సొంత ఇల్లు కొనడం మధ్యతరగతి వారికి ఎంత కష్టమో మనకు తెలుసు. కానీ కొంతమంది బిచ్చగాళ్ళు మాత్రం చాలా సులువుగా సొంత ఇల్లు, కార్లు సంపాదించేస్తున్నారు. బిచ్చగాళ్ల దగ్గర డబ్బులు ఉండవు అనుకుంటే పొరపాటే. రామ్ బాయి అనే వృద్ధ మహిళ భిక్షాటన చేసుకుంటూ బతుకుతుంటుంది. చూడ్డానికి ఈవిడ జాలి వేసేలా ఉంటుంది. తెలుగు రాష్ట్రాల్లో కొన్ని ఆలయాల ముందు బిచ్చమెత్తుకుంటూ ఉంటుంది. ఒకరోజు ఈమె దగ్గరకు ఒక దొంగ వచ్చి ఆమె చేతిలో ఉన్న సంచిని ఎత్తుకెళ్లిపోయాడు. పోలీసులకు సమాచారం ఇవ్వడంతో ఆ దొంగను పట్టుకోగా అందులో రూ. 4 లక్షల కరెన్సీ నోట్లు ఉన్నాయి. ఈ డబ్బు ఎక్కడిది? ఎలా సంపాదించావ్ అని పోలీసులు అడగ్గా భిక్షాటన ద్వారా సంపాదించిన సొమ్ము అని చెప్పింది. అంతేకాదు తన ఇంట్లో ఇంకా ఇలాంటి నోట్లు ఉన్నాయని చెప్పింది. ఒక వృద్ధురాలి దగ్గర అంత డబ్బు చూసి పోలీసులు ఆశ్చర్యపోయారు.

ఈమె ఒక్కర్తే కాదు చాలా మంది బెగ్గర్లు నెలకు లక్షల్లో సంపాదిస్తున్నారు. సాఫ్ట్ వేర్ ఇంజనీర్ల కంటే ఎక్కువ ఆదాయం వీరికి ఉంటుంది. మహా నగరాల్లో అపార్టుమెంట్లు కూడా ఉంటున్నాయంటే అర్థం చేసుకోవచ్చు వీరి సంపాదన ఏ రేంజ్ లో ఉంటుందో అని. ఒకప్పుడు మామూలుగా ఉండే భిక్షాటన ఇప్పుడు ఇదొక ఇండస్ట్రీగా మారిపోయింది. అన్ని రంగాల్లో స్కాములు ఉన్నట్టే ఇందులోనూ స్కాములు ఉన్నాయి. దీన్ని బెగ్గర్స్ స్కామ్ అంటారు. నెలకు 180 కోట్ల రూపాయల స్కామ్ జరుగుతుందని నివేదికలు చెబుతున్నాయి. సోషల్ సైంటిస్ట్ అయిన మహమ్మద్ రఫీ ఉద్దీన్ రెండు సంవత్సరాలు కష్టపడి సర్వే చేయగా 73 లక్షల మందికి పైగా ప్రజలు భిక్షాటన వృత్తి మీద బతుకుతున్నారు. నెలకు రూ. 180 కోట్లు సంపాదిస్తున్నారు. వీరి సంపాదనలో 20 శాతం ఆహారం కోసం, 30 శాతం చెడు అలవాట్లకు ఖర్చు పెట్టి మిగతా 50 శాతం పొదుపు చేస్తున్నట్టు సర్వేలో తేలింది. భిక్షాటన ముసుగులో సులువుగా డబ్బు సంపాదించే మార్గంగా ఈ వృత్తిని ఎంచుకుంటున్నారు.

మళ్ళీ వీళ్ళు ఒక ముఠాగా ఉంటారు. వీరికొక నాయకుడు ఉంటాడు. అతను చెప్పిన ప్రదేశంలో చెప్పిన వ్యక్తులు వెళ్లి భిక్షాటన చేయాలి. ఆ తర్వాత వచ్చిన దాంట్లో లీడర్ కి కమిషన్ ఇవ్వాలి. ఈ భిక్షాటన ముసుగులో చిన్న పిల్లల్ని కిడ్నాప్ చేసి వాళ్ళని కూడా ఇందులోకి లాగుతున్నారు. కొన్ని సినిమాల్లో చూసినట్టు బయట కూడా అలానే ఉన్నారు. బయట ఉంటున్నారు కాబట్టే సినిమాల్లో అలా చూపించారు. పేదరికం కారణంగా నిజంగా భిక్షాటన చేసేవారు కొందరైతే.. సులువుగా డబ్బు సంపాదించడం కోసం ఇలా భిక్షాటన వృత్తిని ఎంచుకునేవారు చాలా మంది ఉన్నారు. ఇండియాలోనే ధనవంతుడైన బిచ్చగాడు భరత్ జైన్.

ఇతను ముంబైలో ఉంటాడు. రోజుకు 8 గంటలు పని చేస్తూ రూ. 2 వేలు నుంచి రూ. 2500 సంపాదిస్తున్నాడు. సాఫ్ట్ వేర్ ఇంజనీర్ లా నెలకు రూ. 75 వేల వరకూ సంపాదిస్తున్నాడు. ఈ సంపాదనతోనే ముంబైలో రూ. 80 లక్షలు విలువైన రెండు అపార్టుమెంట్లు కొనుగోలు చేశాడు. అలానే ఇతనికి ఒక షాప్ కూడా ఉంది. ఈ షాప్ ద్వారా నెలకు రూ. 10 వేలు రెంట్ వస్తుంది. భరత్ జైన్ తన తండ్రితో కలిసి స్కూల్ పిల్లల పుస్తకాలు కూడా అమ్ముతున్నాడు. ఇలా నెలకు రూ. లక్ష వరకూ సంపాదించేస్తున్నాడు. ఖరీదైన కార్లు కూడా ఉన్నాయి. అయితే ఇతను ఇంత సంపాదించినా కూడా భిక్షాటన వృత్తిని కొనసాగిస్తూనే ఉన్నాడు. ఇతని ఆస్తి ఏడున్నర కోట్లు అని సమాచారం. పప్పు కుమార్ అనే బిచ్చగాడు బీహార్ లో ఉంటాడు. ఇతను కూడా నెలకు లక్షల్లో సంపాదిస్తాడు. వ్యాపారులకు అప్పు ఇచ్చే రేంజ్ ఇతనిది. ఇక మలానా ఖాన్ అనే తెలివైన బిచ్చగాడు ఉన్నాడు. ఇతను ఆటోలో ఓ ప్లేస్ కి వెళ్లి.. బిచ్చమెత్తుకుంటాడు. నెలకు లక్షల్లో సంపాదిస్తాడు. ఇలా దేశమంతా 73 లక్షల మంది బిచ్చగాళ్ళు ఉన్నారు.