ఆటోకి డబ్బుల్లేక బాకీ పడ్డాడు.. 30 ఏళ్ల తర్వాత ఊహించని అమౌంట్ ఇచ్చిన వ్యక్తి..

జీవితంలో అప్పుడప్పుడు కొంతమంది వ్యక్తులు తగులుతుంటారు. ఏ సంబంధం లేకపోయినా గానీ సహాయం చేస్తుంటారు. ఆ సమయంలో మన దగ్గర డబ్బులు లేకపోతే ఉంచండి అని అంటూ డబ్బు సహాయం చేస్తారు. చిన్న అమౌంటో, పెద్ద అమౌంటో ఆ టైంలో సాయం పొంది మళ్ళీ తిరిగి ఇవ్వడం అన్నది నిజంగా గొప్ప విషయం. అయితే ఆ వ్యక్తి ఎవరో, ఎక్కడ ఉంటాడో తెలియకపోయినా దొరికేవరకూ ఇవ్వాలి అని అనుకోవడం, అతను ఎదురుపడితే ఆ డబ్బు తిరిగి ఇవ్వడం అన్నది మానవత్వం కంటే గొప్ప విషయం. దైవత్వం అని చెప్పవచ్చు. తీసుకున్న అప్పు ఎగ్గొట్టేవాళ్ళు ఎక్కువైపోయిన ఈరోజుల్లో.. ఎప్పుడో 30 ఏళ్ల క్రితం తీసుకున్న అప్పుని వడ్డీతో సహా తీర్చడం అంటే మామూలు విషయం కాదు.

ఈ ఘటన కేరళలో చోటు చేసుకుంది. తిరువనంతపురంకి చెందిన ఎస్ ఆర్ అజిత్ అనే వ్యక్తి 30 ఏళ్ల క్రితం ఒక ఆటో ఎక్కారు. 1993లో మంగళతునాడ నుంచి మువట్టుపుజ వెళ్లేందుకు ఆటోని కిరాయికి మాట్లాడుకున్నారు. అయితే తన దగ్గర తిరిగి వెళ్ళడానికి బస్ ఛార్జీ మాత్రమే ఉందని, తర్వాత మీకు మీ డబ్బులు ఇస్తానని మాట ఇచ్చారు అజిత్. అప్పటి నుంచి ఆటో డ్రైవర్ కి బాకీ పడ్డానని, ఎలాగైనా ఆ బాకీ తీర్చాలని అతని కోసం వెతుకుతూనే ఉన్నారు. చివరికి ఆటో డ్రైవర్ పతనంతిట్ట జిల్లాలో ఉన్నారని తెలుసుకుని అతని ఇంటికి వెళ్లారు. రీసెంట్ గా ఆటో డ్రైవర్ ఇంటికి వెళ్లి ఆయనతో మాట్లాడారు. ‘1993లో ఒకరోజు ఒక ప్రయాణికుడు మీ ఆటో ఎక్కి డబ్బులు ఇవ్వలేదు గుర్తుందా’ అని అజిత్ అడగ్గా.. డ్రైవర్ ఆ సంఘటనను గుర్తు తెచ్చుకున్నారు. వెంటనే ఆటో డ్రైవర్ కి అజిత్ రూ. 10 వేలు ఇచ్చారు.

దాదాపు వంద రెట్లు చెల్లించారు. ఇప్పట్లోలాగా అప్పట్లో ఫోన్ పే, గూగుల్ పేలు లేవు కాబట్టి వెంటనే బాకీ తీర్చడం కష్టమైందని.. అప్పటి నుంచి ఆటో డ్రైవర్ కోసం వెతుకుతూనే ఉన్నానని అజిత్ అన్నారు. తనతో పాటు బీ.ఈడీ చదివిన క్లాస్ మేట్ మంగళతునాడలో ఉంటున్నాడని తెలిసి అతని ఇంటికి వెళ్తే.. మువట్టుపుజ బస్ ని అందుకోలేకపోయానని, అప్పుడే ఒక ఆటో కిరాయికి మాట్లాడుకున్నానని అన్నారు. అయితే అప్పట్లో ఆటో ఛార్జీ లేక తర్వాత ఇస్తా అన్నానని .. అప్పటి నుంచి తిరిగి ఇద్దామనుకుంటే ఇన్నాళ్లకు కుదిరిందని వెల్లడించారు. అయితే తనను గుర్తుపెట్టుకుని మరీ డబ్బులు ఇవ్వడం పట్ల ఆటో డ్రైవర్ వి. బాబు సంతోషం వ్యక్తం చేస్తున్నారు. అతని మాట్లాడిన వీడియో ప్రస్తుతం సోషల్ మీడియాలో వైరల్ అవుతోంది. మరి ఎప్పుడో 30 ఏళ్ల క్రితం తీసుకున్న బాకీని గుర్తుపెట్టుకుని మరీ చెల్లించిన అజిత్ కుమార్ పై మీ అభిప్రాయమేమిటో కామెంట్ చేయండి.