పెళ్లితో ఒక ఇంటి వాడైన ‘దసరా’ మూవీ దర్శకుడు శ్రీకాంత్ ఓదెల..

నేచురల్ స్టార్ నాని హీరోగా, కీర్తి సురేష్ హీరోయిన్ గా శ్రీకాంత్ ఓదెల దర్శకత్వంలో వచ్చిన దసరా సినిమా ఎంత పెద్ద హిట్ అయ్యిందో అందరికీ తెలిసిందే. ఈ సినిమా బాక్సాఫీస్ వద్ద కాసుల వర్షం కురిపించింది. ఈ సినిమాతో శ్రీకాంత్ ఓదెల వెనక్కి తిరిగి చూసుకునే పని లేకుండా పెద్ద సక్సెస్ అందుకున్నారు. ఈ సినిమాకి ముందు క్రియేటివ్ డైరెక్టర్ సుకుమార్ వద్ద అసిస్టెంట్ గా పని చేశారు శ్రీకాంత్ ఓదెల. ఆ తర్వాత చాలా గ్యాప్ తీసుకుని దసరా కథ రాసుకున్నారు. మరి సినిమా విడుదలై హిట్ టాక్ సొంతం చేసుకున్నాకే, డైరెక్టర్ గా తానేంటో ప్రూవ్ చేసుకున్నాకే పెళ్లి చేసుకుంటానని ఇంట్లో మాటిచ్చారో ఏమో తెలియదు కానీ మొత్తానికి శ్రీకాంత్ ఓదెల ఒక ఇంటి వాడైపోయారు. ఈ విషయాన్ని నాని తన ట్విట్టర్ ఖాతా ద్వారా వెల్లడించారు.

‘మన ఓదెల శ్రీకాంత్’ పెళ్లి చేసుకున్నాడు. మీ ప్రేమ, ఆశీర్వాదాలు పంపండి’ అంటూ ట్వీట్ చేశారు. నెటిజన్స్ శ్రీకాంత్ జంటకు అభినందనలు తెలియజేస్తున్నారు. మే 31న కరీంనగర్ లో శ్రీకాంత్ ఓదెల వివాహం జరిగింది. ఈ వివాహ వేడుకకు దర్శకుడు సుకుమార్, జాతిరత్నాలు దర్శకుడు అనుదీప్ తో పాటు పలువురు సినీ ప్రముఖులు హాజరైనట్లు సమాచారం. హీరో నాని మాత్రం ఈ వేడుకకు హాజరు కాలేదని తెలుస్తుంది. ఓ కమర్షియల్ యాడ్ షూట్ కోసం పూణె వెళ్లారని.. ఈ కారణంగా శ్రీకాంత్ పెళ్ళికి హాజరు కాలేకపోయారని సమాచారం. అందుకే వారి ఫోటో షేర్ చేసి విష్ చేశారు. శ్రీకాంత్ ఓదెల పెళ్లి చేసుకోబోతున్నాడని వార్తలు వచ్చాయి కానీ ఈ విషయాన్ని సోషల్ మీడియాలో ముందుగా చెప్పింది నాని మాత్రమే. నాని చెప్తేనే పెళ్లి జరిగిందన్న విషయం తెలిసింది.

శ్రీకాంత్ ఓదెల దంపతుల ఫోటోను షేర్ చేశారు. జంట చూడముచ్చటగా ఉందని కామెంట్స్ చేస్తున్నారు. ఇక శ్రీకాంత్ ఓదెల గోదావరిఖనికి చెందిన కుర్రాడు. సుకుమార్ కాంపౌండ్ నుంచి వచ్చిన మరో టాలెంటెడ్ డైరెక్టర్. ఉప్పెన సినిమాతో చిట్టిబాబు సానా దర్శకుడిగా నిరూపించుకోగా.. దసరా సినిమాతో శ్రీకాంత్ ఓదెల తానేంటో నిరూపించుకున్నారు. అసలు మొదటి సినిమానే ఈ స్థాయిలో తీస్తారని ఎవరూ ఊహించలేదు. ఒక కొత్త దర్శకుడు ఇంత పెద్ద సినిమా తీస్తారని ఊహించలేదు. అంత బాగా తీశారు. ఇప్పటి వరకూ నానిని ఎవరూ ఇంత రఫ్ గా, ఊర మాస్ లుక్ లో చూపించలేదు.

నానిని బాగా చూపించారని, సినిమా తెరకెక్కించిన విధానం చాలా బాగుందన్న ప్రశంసలు దక్కాయి. రాజమౌళి నుంచి టాలీవుడ్ కి చెందిన ప్రతీ ఒక్కరూ శ్రీకాంత్ టేకింగ్ కి ఫిదా అయిపోయారు. పాన్ ఇండియా మూవీగా మొదటి సినిమాతోనే పాన్ ఇండియా డైరెక్టర్ అయిపోయారు. శ్రీకాంత్ ఓదెలతో సినిమా చేసేందుకు ఓ ప్రముఖ నిర్మాణ సంస్థ సంప్రదింపులు జరిపిందన్న వార్తలు వినిపిస్తున్నాయి. మరి వైవాహిక జీవితంలో అడుగుపెట్టిన శ్రీకాంత్ ఓదెల జంటకు మీ విషెస్ తెలియజేయండి.

Mana @odela_srikanth pelli chesukunnadu 🙂
Send all your love and blessings ♥️ pic.twitter.com/ZixLIXdkid

— Nani (@NameisNani) May 31, 2023