బాలయ్య బ్యాటింగ్ చేస్తే ఇలాగే ఉంటుంది మరి.. వీడియో వైరల్!

నటసింహం నందమూరి బాలకృష్ణ ఏం చేసినా సెన్సేషనే. తనదైన శైలి నటన, డైలాగ్ డెలివరీతో ప్రేక్షకుల్లో ఆయన మాస్ ఇమేజ్ సొంతం చేసుకున్నారు. ఈ వయసులోనూ ఆయన అంతే హుషారుతో కుర్రహీరోలతో పోటీపడుతున్నారు. వరుసగా సినిమాలు చేస్తూ అభిమానుల్లో సంతోషం నింపుతున్నారు. ఒకవైపు మూవీస్ చేస్తూనే, మరోవైపు ‘అన్​స్టాపబుల్’ లాంటి టాక్​ షోతోనూ ఆయన మెప్పిస్తున్నారు. ఈ షో వల్ల యూత్ ఆడియెన్స్​లో బాలయ్య క్రేజ్ మరింత పెరిగింది. ఇప్పుడు యాంకర్ అవతారం ఎత్తబోతున్నారు బాలకృష్ణ. మరో రెండ్రోజుల్లో మొదలుకానున్న ఐపీఎల్ పదహారో సీజన్​లో కామెంటేటర్​గా అలరించనున్నారాయన. బాలయ్య కామెంట్రీ అంటే ఇటు క్రికెట్​ ఫ్యాన్స్​తో పాటు అటు మూవీ ఫ్యాన్స్​కు కూడా స్పెషల్ ఎంటర్​టైన్​మెంట్ అనే చెప్పొచ్చు.

ఐపీఎల్​ సీజన్ తొలి రోజు స్టార్ స్పోర్ట్స్ తెలుగులో బాలకృష్ణ కామెంట్రీ చేయనున్నారు. వ్యాఖ్యానం చేయాలంటూ స్టార్ స్పోర్ట్స్ నిర్వాహకులు అడిగిన వెంటనే క్రికెట్ మీద ఉన్న ఇష్టంతో బాలయ్య ఓకే చెప్పేశారని తెలుస్తోంది. ఈ సందర్భంగా స్టార్ స్పోర్ట్స్ ఎక్స్​పర్ట్స్ ఎమ్మెస్కే ప్రసాద్, వేణుగోపాల రావుతో కలసి గల్లీ క్రికెట్ ఆడారు బాలయ్య. ఈ గేమ్​కు స్టార్ స్పోర్ట్స్ ప్రెజెంటర్ వింధ్య అంపైర్​గా వ్యవహరించారు. వేణుగోపాల రావు బాల్ విసరగా బాలయ్య గట్టిగా కొట్టారు. దెబ్బకు బాల్ ఎక్కడో దూరంగా వెళ్లి పడింది. ఆ తర్వాత బాలయ్య బౌలింగ్ కూడా చేశారు. దీనికి సంబంధించిన వీడియో నెట్టింట వైరల్ అవుతోంది. ఇక, సినిమాల విషయానికొస్తే.. బాలయ్య ప్రస్తుతం స్టార్ డైరెక్టర్ అనిల్ రావిపూడి దర్శకత్వంలో తెరకెక్కుతున్న చిత్రంలో నటిస్తున్నారు.

బాలయ్య కొత్త సినిమాలో టాలీవుడ్ చందమామ కాజల్ అగర్వాల్ హీరోయిన్​గా యాక్ట్ చేస్తున్నారు. తండ్రీ కూతుళ్ల సెంటిమెంట్​తో ఈ మూవీ స్క్రిప్ట్​ను రెడీ చేశారని సమాచారం. ఈ ఫిల్మ్​లో బాలయ్య కూతురి క్యారెక్టర్​లో యంగ్ బ్యూటీ శ్రీలీల కనిపించనున్నారు. షైన్ స్క్రీన్స్‌ బ్యానర్​పై హరీష్ పెద్ది, సాహు గారపాటి ఈ మూవీని నిర్మిస్తున్నారు. ప్రస్తుతం ఈ సినిమా షూటింగ్ శరవేగంగా సాగుతోంది. అనిల్ రావిపూడి గత సినిమాల మాదిరిగా ఇందులో కూడా కామెడీ ఉన్నప్పటికీ.. పవర్​ఫుల్ యాక్షన్ సీక్వెన్సులు కూడా ఉంటాయని టాలీవుడ్ టాక్. ఇందులో బాలయ్యను స్పెషల్​గా చూపించబోతున్నారట. మరి.. బాలయ్య బ్యాటింగ్ వీడియోపై మీ అభిప్రాయాలను కామెంట్ల రూపంలో తెలియజేయండి.

ఈరోజు ఏపీ, తెలంగాణకు సంబంధించిన లేటెస్ట్ న్యూస్.. జాతీయ, అంతర్జాతీయ వార్తలు.. ఎడ్యుకేషన్, బిజినెస్, సినిమా, స్పోర్ట్స్, టెక్ అప్డేట్స్.. ఆధ్యాత్మిక, ఆరోగ్య సమాచారంతో పాటు, వైరల్ కథనాల కోసం సుమన్ టీవీ యాప్‌ను డౌన్‌లోడ్ చేసుకోండి.