IPL 2023: ఆ రోజు రాత్రి నాకు నిద్ర పట్టలేదు.. ఆ ఒక్క తప్పు వల్లే..: మోహిత్ శర్మ!

గతేడాది ఐపీఎల్ ఛాంపియన్ గుజరాత్ టైటాన్స్ ఈసారి కూడా లీగ్​లో తన డామినేషన్​ను కొనసాగించింది. ఎదురొచ్చిన ప్రతి ప్రత్యర్థిని చిత్తు చేస్తూ టేబుల్ టాపర్​గా నిలిచింది. అయితే ప్లేఆఫ్స్​లో ఆ జట్టు పప్పులు ఉడకలేదు. క్వాలిఫయర్​-1లో చెన్నై సూపర్ కింగ్స్ చేతుల్లో గుజరాత్ ఓడిపోయింది. దీంతో క్వాలిఫయర్​-2 ఆడాల్సి వచ్చింది. సీఎస్​కే చేతుల్లో అనూహ్యంగా పరాజయం పాలైనప్పటికీ తేరుకున్న హార్దిక్ సేన.. క్వాలిఫయర్​-2లో ముంబై ఇండియన్స్​పై నెగ్గి ఫైనల్​కు అర్హత సాధించింది. కానీ ఫైనల్​ ఫైట్​లో సీఎస్​కే చేతిలో మరో ఓటమి తప్పలేదు. ఈ మ్యాచ్​లో గెలుపు అంచుల వరకు వచ్చి ఓడిపోయింది గుజరాత్ . మ్యాచ్ ఆఖరి ఓవర్​ వరకు గేమ్​లో నిలిచిన హార్దిక్ టీమ్.. చివరి రెండు బాల్స్​లో మ్యాచ్​ను చేజార్చుకుంది. అప్పటివరకు ఎంతో అద్భుతంగా బౌలింగ్ చేసిన సీనియర్ పేసర్ మోహిత్ శర్మ.. క్రీజులో ఉన్న రవీంద్ర జడేజాను కట్టడి చేయడంలో ఫెయిల్ అయ్యాడు.

మోహిత్ శర్మ వేసిన ఆఖరి రెండు బాల్స్​ను ఫోర్, సిక్స్​గా మలచి చెన్నైకి మైమరచిపోని విజయంతో పాటు టైటిల్​ను అందించాడు జడేజా. అయితే జడ్డూ దెబ్బకు మోహిత్​ శర్మకు ఆ రోజు రాత్రి నిద్ర పట్టలేదట. ఈ విషయాన్ని స్వయంగా అతడే వెల్లడించాడు. ‘ఆ రోజు రాత్రి నాకు నిద్ర పట్టలేదు. నేను వినూత్నంగా ఏదైనా చేసుంటే మా జట్టు గెలిచి ఉండేదా అని ఆలోచిస్తూ ఉండిపోయా. ఆ బాల్ వేయాల్సిందా? లేదా ఈ బాల్ వేయాల్సిందా అంటూ ఆలోచించా. ఎక్కడో ఏదో తప్పు జరిగింది. కానీ దీని నుంచి బయట పడేందుకు ప్రయత్నిస్తున్నా. ఈ ఐపీఎల్​లో ఫోకస్డ్​గా ఉంటూ నన్ను నేను ప్రోత్సహించుకుంటూ ఆడా. ఈ క్రమంలో సక్సెస్ కూడా అయ్యా. అయితే ఫైనల్​లో జడేజాకు యార్కర్లు వేయాలని చూశా. కానీ అది వర్కౌట్ కాలేదు. నేను అనుకున్న చోట బాల్ పడలేదు. దీన్ని వినియోగించుకున్న జడేజా తాను వచ్చిన పని ఫినిష్ చేశాడు’ అని మోహిత్ శర్మ చెప్పుకొచ్చాడు.

A Mohit Sharma appreciation post 💙

For a terrific comeback season, the three wickets in the final, the first four balls of the last over 🫡#CSKvsGT #MohitSharma #CricketTwitter pic.twitter.com/GwXmcoYwqe

— Cricbuzz (@cricbuzz) May 30, 2023