CSK సక్సెస్​కు ధోనీతో పాటు ఆ మాజీ ప్లేయర్ కారణం: అంబటి రాయుడు!

ఐపీఎల్​లో తనకు తిరుగులేదని చెన్నై సూపర్ కింగ్స్ టీమ్ మరోసారి నిరూపించింది. కప్ నెగ్గేందుకు జట్టులో స్టార్ ఆటగాళ్లు ఉండాల్సిన అవసరం లేదని సగర్వంగా చాటింది. ప్లేయర్లు అందరూ సమష్టితత్వంతో ఆడితే ఎంతటి టీమ్​ను అయినా ఓడించొచ్చని సీఎస్​కే ప్రూవ్ చేసింది. ఐపీఎల్​ పదహారో సీజన్​ టైటిల్​ను గెలుచుకున్న చెన్నైకి ఇది ఐదో ట్రోఫీ కావడం విశేషం. ధోని, జడేజా లాంటి స్టార్ ఆటగాళ్లను మినహాయిస్తే చెన్నైలో చెప్పుకోదగ్గ ప్లేయర్లు లేరు. ప్రతిభ ఉన్న పతిరానా, రుతురాజ్​ గైక్వాడ్, శివమ్ దూబే లాంటి యువ ఆటగాళ్లను.. ఫామ్ కోల్పోయిన అజింక్యా రహానె లాంటి ప్లేయర్ల అండతో జట్టును ఫైనల్స్​కు చేర్చాడు ధోని. పరిస్థితులకు తగ్గట్లుగా ఆటగాళ్ల సేవల్ని, వారిలోని ప్రతిభను సమర్థంగా వాడుకుంటూ జట్టుకు టైటిల్​ను అందించాడు. ఇక, ఈ సీజన్​తో ఐపీఎల్​కు రిటైర్మెంట్ ప్రకటించాడు చెన్నై సీనియర్ బ్యాటర్ అంబటి రాయుడు.

రిటైర్మెంట్ ప్రకటించిన అంబటి రాయుడుకు కప్​తో గ్రాండ్​గా సెండాఫ్ ఇచ్చారు సీఎస్​కే ప్లేయర్లు. అతడి కెరీర్​లో ఈ ఆఖరి మ్యాచ్ ఎప్పటికీ గుర్తుండిపోయేలా చిరస్మరణీయం చేసుకున్నాడు రాయుడు. ఫైనల్ మ్యాచ్​లో బ్యాటింగ్​లోనూ రాణించి జట్టు విజయంలో కీలక పాత్ర పోషించాడు. మ్యాచ్ అనంతరం అతడు మాట్లాడుతూ సీఎస్​కే ఫ్రాంచైజీ నిర్మాణంలో మాజీ ప్లేయర్ సురేష్ రైనా పాత్ర ఎంతగానో ఉందని చెప్పుకొచ్చాడు. ధోనీతో పాటు రైనా కూడా చెన్నై సక్సెస్​లో, టీమ్ ఈ స్థాయిలో ఉండటంలో ముఖ్య భూమిక పోషించాడని మెచ్చుకున్నాడు. సీఎస్​కే ఫ్రాంచైజీని రైనా తన చేతులతో నిర్మించాడని రాయుడు పేర్కొన్నాడు. ఇకపోతే, రైనా కూడా ఐపీఎల్​కు రిటైర్మెంట్ ప్రకటించిన విషయం తెలిసిందే. ఐపీఎల్​-2021 సీజన్​తో లీగ్​కు అతడు గుడ్​బై చెప్పేశాడు.

Ambati Rayudu said, “Suresh Raina made this CSK franchise with his hands”. pic.twitter.com/SbY3ISDnix

— Mufaddal Vohra (@mufaddal_vohra) May 30, 2023