Heat Stroke in Telugu: వేసవిలో వడదెబ్బ తగలకుండా ఉండాలంటే.. ఈ జాగ్రత్తలు తీసుకొండి!

వేసవి కాలం ప్రారంభం అయ్యింది. ఏప్రిల్‌ నెలలోనే ఎండలు మండి పోతున్నాయి. ఉదయం 10 గంటల నుంచి మధ్యాహ్నం 4 గంటల వరకు బయట కాలు పెడదామంటే.. భయమేస్తోంది. ఉష్ణోగ్రతలు విపరీతంగా పెరగడంతో.. బయటకు రావాలంటేనే జనాలు భయపడుతున్నారు. రాష్ట్రవ్యాప్తంగా చాలా ప్రాంతాల్లో 40 డిగ్రీల పైన ఉష్ణోగ్రతలు నమోదవుతున్నాయి. ఇక వేసవికాలం ఎక్కువగా ఇబ్బంది పెట్టే సమస్య.. వడదెబ్బ. అధిక ఉష్ణోగ్రతలు, ఉక్కపోత కారణంగా.. పనులు మీద బయటకు వెళ్లే వాళ్లే కాదు.. ఇంట్లో ఉండే వృద్ధులు, పిల్లలు కూడా వడదెబ్బకు గురయ్యే అవకాశాలు అధికంగా ఉంటాయి. వడదెబ్బకు గురైనప్పుడు సరైన చర్యలు తీసుకోకపోతే ఒక్కోసారి ప్రాణాలు కూడా పోయే ప్రమాదం ఉంది. మరి వడదెబ్బ లక్షణాలు ఎలా ఉంటాయి.. వడదెబ్బ తగలకుండా ఉండాలంటే ఎలాంటి జాగ్రత్తలు తీసుకోవాలో ఇప్పుడు చూద్దాం.

వడదెబ్బ..

దీన్నే హీట్‌ స్ట్రోక్‌ అని కూడా అంటారు. తీవ్రమైన వ్యాయామం, క్రీడాకారులు, వేడి వాతావరణంలో ఎక్కువగా పని చేసేవారు, డీహైడ్రేషన్‌, శరీరానికి సూర్యరశ్మి అధికంగా తగిలినప్పుడు వడదెబ్బ తగిలే అవకాశం అధికంగా ఉంటుంది. చిన్నారులు, మహిళలు, వృద్ధులు ఎక్కువగా వడదెబ్బ సమస్యను ఎదుర్కొంటారు.

వడదెబ్బ తగలకుండా ఎలాంటి జాగ్రత్తులు తీసుకోవాలి..

• ఎక్కువగా ద్రవ పదర్థాలు అంటే మంచి నీళ్లు, మజ్జిగ, కొబ్బరి నీళ్లు, తాజా జ్యూస్‌లు అధికంగా తీసుకోవాలి.
• రోజుకు 15 గ్లాసుల వరకు మంచి నీరు తాగాలి.
• ఉదయం 11 నుంచి సాయంత్రం 4 గంటల ప్రాంతంలో బయటకు వెళ్లకుండా చూసుకోవాలి.
• బయటకు వెళ్లాల్సి వస్తే గొడుగు, టోపీల లాంటివి తీసుకెళ్లాలి.
• ఇంట్లో కిటికీ తలుపులు ఎప్పుడూ తెరిచి ఉంచి, ఫ్యాన్ వేసి చల్లగా ఉంచుకోవాలి.
• వేసవి కాలంలో లేత రంగు, తేలికైన, కాటన్‌ దుస్తులు ధరించడం మంచిది.
• ఆల్కాహాల్‌ శరీరంలోని నీటి శాతాన్ని తగ్గిస్తుంది. కనుక వేసవిలో మద్యానికి దూరంగా ఉండటం మంచిది.
• వేసవిలో తరచుగా ఓఆర్‌ఎస్‌, కొబ్బరి నీళ్లు, ఉప్పు కలిపిన నిమ్మరసం లాంటివి తీసుకోవాలి.
• ఇవి శరీరం కోల్పోయిన లవణాలను తిరిగి భర్తీ చేస్తాయి.
• అలానే ఈ కాలంలో నీటి శాతం ఎక్కువగా ఉండే దోసకాయలు, పుచ్చకాయలు, దానిమ్మ, బత్తాయి లాంటి పండ్లు రోజు తినాలి.
• వ్యాయామం చేసే వారు ఉదయం 8 గంటల లోపే పూర్తి చేయాలి.
• వడదెబ్బ లక్షణాలు కనిపించగానే చికిత్స అందించాలి. లేదంటే శరీరం పూర్తిగా నీటిని కోల్పోయి.. బీపీ, పల్స్‌ పడిపోయి కొన్నిసార్లు ప్రాణాలు పోయే ప్రమాదం కూడా ఉంది.

చేయకూడని పనులు..

• వేసవిలో ఎండ తీవ్రత ఎక్కువగా ఉన్న సమయంలో బయట ఎక్కువగా తిరగకూడదు.
• ఎంత దాహం వేసినా సరే.. రోడ్ల మీద అమ్మే చల్లని రంగు పానీయాలను, కూల్ డ్రింక్స్ లను తాగకూడదు.
• వేసవిలో వీలైనంత వరకు మాంసాహారాన్ని తగ్గించాలి. ఆహారంలో తాజా ఆకుకూరలను ఎక్కువగా తీసుకోవాలి.

వడదెబ్బ తగిలితే ప్రథమ చికిత్స..

• వడదెబ్బ తగిలిన వ్యక్తిని వెంటనే చల్లటి ప్రదేశానికి చేర్చాలి.
• శరీరం మీద దుస్తులు వదులు చేయాలి.
• ఐస్ నీటిలో ముంచిన తడిగుడ్డతో శరీరం తుడవాలి.
• శరీర ఉష్ణోగ్రత సాధారణ స్థాయికి వచ్చేవరకు ఇలా చేస్తుండాలి.
• బాధితుడికి ఫ్యాను గాలి, చల్లని గాలి తగిలేలా చూడాలి
• వడదెబ్బ తగిలిని వ్యక్తికి కొబ్బరినీరు, చెరుకు రసాలు, పెరుగు, మజ్జిగ, పళ్లరసాలు, గ్లూకోజ్,ఓఆర్‌ఎస్‌ వంటి వాటిని తాగించాలి.
• వడదెబ్బ తగిలి అపస్మారక స్థితిలో ఉన్న రోగికి నీరు తాగించకూడదు.
• వీలైనంత త్వరగా దగ్గరలోని ప్రాథమిక ఆరోగ్య కేంద్రానికి తరలించాలి.