follow us:
ఈరోజు మహా శివరాత్రి. శివుడికి ఇష్టమైన నైవేద్యాలు పెట్టి, అభిషేకాలు చేస్తూ శివుడ్ని ప్రసన్నం చేసుకుంటారు. అయితే శివుడికి ఇష్టమైన పూలు ఏంటో తెలుసా? ఏ ఏ పూలతో పూజలు చేస్తే ఏ ఫలితం ఉంటుందో తెలుసా?
భగవంతుడికి చేసే పూజలో పుష్పాలు ఖచ్చితంగా ఉండాల్సిందే. పండుగలు, శుభకార్యాల్లో కూడా పూలు ముఖ్య భూమిక పోషిస్తాయి. పువ్వులంటే భగవంతుడికి ఎంతో ఇష్టం. అలానే కొన్ని మొక్కల ఆకులు కూడా పూజల్లో కీలక పాత్ర వహిస్తాయి. ఇక ఈరోజు మహా శివరాత్రి కాబట్టి ఆ మహా దేవుడ్ని రకరకాల పూలతో, పత్రాలతో పూజిస్తారు. నిష్కల్మషమైన మనసుతో పరమేశ్వరుడిని ఆరాధిస్తే కోరిన కోరికలు నెరవేరుతాయని శాస్త్రాలు చెబుతున్నాయి. కోరికలను బట్టి పలు రకాల పువ్వులను, పత్రాలను శివుడికి అర్పిస్తే కోరికలు నెరవేరుతాయని శాస్త్రాలు చెబుతున్నాయి. ధన లాభం, సుఖశాంతులు, రాజ్యప్రాప్తి, మోక్షం, ఆరోగ్యం, సంతాన ప్రాప్తి ఇలా రకరకాల ఫలితాల కోసం పలు రకాల పుష్పాలతో పరమేశ్వరుడికి పూజ చేయాలని శాస్త్రాలు చెబుతున్నాయి.
గన్నేరు పూలతో శివుడ్ని పూజిస్తే ధన లాభం, ఉమ్మెత్త పూలతో పూజిస్తే మోక్ష ప్రాప్తి లభిస్తుందని శాస్త్రాలు చెబుతున్నాయి. నల్ల కలువ పూలను అర్పిస్తే సుఖశాంతులు, నాగకేసర పుష్పాలు అర్పిస్తే రాజ్య ప్రాప్తి కలుగుతుందని శాస్త్రాలు చెబుతున్నాయి. దర్భ పూలతో శివుడ్ని పూజిస్తే ఆరోగ్యం కలుగుతుంది. సన్నజాజులతో పూజిస్తే వివాహ యోగం కలుగుతుంది. మొల్ల పూలు అర్పిస్తే సంతాన ప్రాప్తి కలుగుతుందని చెబుతారు. తెల్ల జిల్లేడు పుష్పాలతో పూజిస్తే మంత్ర సిద్ధి కలుగుతుంది. మోదుగ పూలతో పూజిస్తే ఆయుష్షు పెరుగుతుందని శాస్త్రాలు చెబుతున్నాయి. ఇక పుష్పాలే కాకుండా చెట్టు ఆకులతో పూజించినా శివానుగ్రహం ఉంటుందని అంటారు.
బిల్వ చెట్టు ఆకులు అంటే శివుడికి ఎంతో ఇష్టమని చెబుతారు. ఈ ఆకులతో శివుడ్ని పూజిస్తే దారిద్య్రం తొలగిపోతుందని అంటారు. మరువక పత్రాలతో పూజిస్తే సుఖం కలుగుతుందని చెబుతారు. పరమశివుడ్ని ప్రసన్నం చేసుకోవాలంటే డబ్బే ఉండక్కర్లేదు. ప్రకృతి ఒడిలో దొరికే వస్తువులతో కూడా భక్తిని చాటుకోవచ్చు. సహజంగా దొరికే చెట్ల ఆకులు, పూలతో కూడా ఆ శివుడ్ని పూజించవచ్చు. కల్మషం లేకుండా అత్యంత భక్తితో పూజిస్తే కోరిన కోరికలు నెరవేరుతాయని పండితులు చెబుతున్నారు.
