జగన్ కాంగ్రెస్ పార్టీ నుంచి బయటకు రావడానికి కారణం అదే-ప్రియదర్శిని రామ్

ఏపీ సీఎం వైఎస్ జగన్ మోహన్ రెడ్డి రాజశేఖర్ రెడ్డి మరణం తర్వాత కాంగ్రెస్ పార్టీకి రాజీనామా చేసి బయటకు వచ్చిన విషయం తెలిసిందే. ఆ సమయంలో మీడియా రకరకాల వార్తలు ప్రచారం చేసింది. అయితే, జగన్ కాంగ్రెస్ పార్టీని వీడి బయటకు రావడానికి అసలు కారణం ఇదేనని చెప్పారు నటుడు, దర్శకుడు, నిర్మాత ప్రియదర్శిని రామ్. తాజాగా సుమన్ టీవీ ఇంటర్వ్యూలో పాల్గొన్న ఆయన అసలు నిజాలు బయటపెట్టారు.

ఆయన మాట్లాడుతూ.. జగన్ కాంగ్రెస్ పార్టీకి రాజీనామా చేసి బయటకు రావడానికి ఓ కారణం ఉంది. రాజశేఖర్ రెడ్డి మరణాన్ని తట్టుకోలేక ఉమ్మడి ఆంధ్రప్రదేశ్ లో ఎంతో మంది చనిపోయారు. చనిపోయిన కుటుంబాలను రాబోయే రోజుల్లో పరామర్శిస్తానని చెప్పారు. ఇచ్చిన మాటకు కట్టుబడి వైఎస్ జగన్ మోహన్ రెడ్డి ఓదార్పుయాత్ర పేరుతో ప్రజల్లోకి వెళ్లారు. చనిపోయిన కుటుంబాలను పరామర్శించాలని కంకణం కట్టుకున్నారు. ఇక అప్పుడు ఏపీ, తెలంగాణలో రెండు జిల్లాల్లో ఓదార్పు యాత్ర చేపట్టారు. ఈ సందర్భంగా ఎంతో మంది జనం తండోపతండాలుగా తరలివచ్చి జగన్ ను అక్కున చేర్చుకున్నారు.

ఇది చూసిన అప్పటి ఆంధ్రప్రదేశ్ కాంగ్రెస్ పార్టీ నేతలకు భయం పట్టుకుంది. ఇలా అయితే జగన్ లీడర్ గా ఎదిగే అవకాశం ఉందంటూ ఇదే అంశాన్ని పార్టీ నేతలు హైకమాండ్ దృష్టికి తీసుకెళ్లారు. హైకమాండ్ నుంచి.. వెంటనే జగన్, విజయమ్మ, షర్మిల ఢిల్లీకి రావాలంటూ కబురు వచ్చింది. దీంతో ఆ ముగ్గురు ఢిల్లీ వెళ్లి సోనియా గాంధీని కలిశారు. ఆ సందర్భంగా సోనియా గాంధీ ఆ ముగ్గురితో మాట్లాడుతూ.. చనిపోయిన కుటుంబాల ఇంటింటికి వెళ్లి పరామర్శించడం కుదరదు. వెంటనే ఓదార్పు యాత్రను నిలిపివేయాలి. చనిపోయిన కుటుంబాలను పరామర్శించి సాయం చేయాలని అనుకుంటే ఓ చోట మీటింగ్ పెట్టి వారికి చెక్ లు పంపిణి చేయాలని సోనియా గాంధీ కోరారు.

ఆమె మాటలు జగన్ కు అస్సలు నచ్చలేదు. దీంతో వెంటనే జగన్ హైకమాండ్ పెద్దల ముందే బయటకు వచ్చి వెంటనే పార్టీకి రాజీనామా చేశారు. జనం కోసమే… ఓదార్పుయాత్ర చేస్తామంటే కాంగ్రెస్ అధిష్టానం ఒప్పుకోలేదు. ఆ పార్టీ హైకమాండ్ కి ఎదురు చెప్పలేక బయటకు వచ్చేసి జగన్ ఓదార్పుయాత్ర చేశారు. అదీ జగన్ అంటే.. అని ప్రియదర్శిని రామ్ సుమన్ టీవీకి ఇచ్చిన ఇంటర్వ్యూలో తెలిపారు.

ఇది కూడా చదవండి: షర్మిల తెలంగాణలో పార్టీ పెట్టడానికి కారణం అదే: ప్రియదర్శిని రామ్