అమ్మ అందరికీ అమ్మే…మరోసారి రుజువుచేసిన నర్సు!..

కోవిడ్ సమయంలో సహాయం చేసే మనుషులున్నా, సాయం చేయాలనే మనసున్నా కరోనాకి భయపడి అయినవాళ్లు కూడా బాధితుల దగ్గరకు రాలేకపోతున్నారు. మందులు, ఆహారం, ఆసుపత్రి అవసరాలు, అంత్యక్రియలు ఇలా దేనికీ, ఎవరూ ముందుకు రాని పరిస్థితి. కుటుంబ సభ్యులు కూడా ముందుకు రాకపోయినా, మేమున్నామంటూ తెలుగు రాష్ట్రాలలోని పలు స్వచ్ఛంధ సంస్థలు కరోనా రోగులకు, మృతులకు సేవలు అందిస్తున్నాయి. స్వచ్ఛంద సంస్థల్లో ఎక్కువగా యువతే పనిచేస్తున్నారు. వీళ్లంతా చదువు, వ్యాపారాలు, ఉద్యోగాలు కొనసాగిస్తూనే కరోనా కష్టకాలంలో మీకు మేమున్నామంటూ ఎంతోమందికి భరోసా ఇస్తున్నారు. ఆపత్సమయంలో వాళ్లు చేసే సేవకి దేవుడే దిగివచ్చినట్లు ఉంటుంది. ఈ దేవతల సరసన ఇప్పుడు ఓ నర్సు కూడా వచ్చి చేరింది. అమె చేసిన సాయం ఓ బిడ్డకి అమృతాన్నే పంచింది.

నిర్మల్‌ మండలంలోని ఓ గ్రామానికి చెందిన దంపతులు ఉద్యోగరీత్యా రెండు నెలల శిశువుతో కర్ణాటకకు వెళ్లారు. అక్కడి బ్యాంకులో పనిచేస్తున్న భర్తకు నెల కిందట కొవిడ్‌ సోకడంతో వారిని భార్య పుట్టింటివారు భైంసాకు తీసుకువచ్చారు. అంతలోనే భార్యకు, ఆమె తల్లిదండ్రులకు సైతం వైరస్‌ సోకింది. వారి వద్ద కారు డ్రైవర్‌గా పనిచేస్తున్న మహేందర్‌ బాధితులకు సేవలందిస్తున్నారు. ఈ క్రమంలో దంపతుల మూడు నెలల బాలుణ్ని సాకేవారు లేకపోయారు. భైంసా ప్రాంతీయాసుపత్రిలోనే నర్సుగా పనిచేస్తున్న డ్రైవర్‌ మహేందర్‌ భార్య భుక్యా సునీత వారి బాధను పెద్ద మనసుతో అర్థం చేసుకుంది. కొవిడ్‌ బాధిత దంపతుల మూడు నెలల శిశువును నిర్భయంగా ఇంటికి తెచ్చుకుంది. ఏడాది వయసున్న తన బిడ్డకు పది రోజుల పాటు పోతపాలు పోస్తూ వెంట తీసుకొచ్చిన మూడు నెలల బాబుకు తన పాలు పట్టింది. రాత్రివేళ ఆసుపత్రిలో విధి నిర్వహణలో ఉండే ఆమె రెండుసార్లు భర్త సాయంతో ఇంటికి వచ్చి ఆ పసికందుకు పాలుపట్టి వెళ్లేది. ఈ క్రమంలో పలుమార్లు అస్వస్థతకు గురైన ఆ చిన్నారిని మహేందర్‌, సునీత దంపతులు ఎప్పటికప్పుడు పిల్లల వైద్య నిపుణుడితో వైద్యం చేయించారు. ప్రస్తుతం ఆ కుటుంబంలోని కొవిడ్‌ బాధితులంతా కోలుకున్నారు.