ఫైర్​ఫాక్స్ బ్రౌజర్ వాడుతున్నారా? అయితే మీరు ప్రమాదంలో ఉన్నట్లే!

ఇంటర్నెట్ సర్ఫింగ్ కోసం వాడే బ్రౌజర్లలో మొజిల్లా ఫైర్​ఫాక్స్ ఒకటి. చాలామంది యూజర్లు ఈ బ్రౌజర్​ను వాడుతుంటారు. అలాంటి ఈ బ్రౌజర్​ను వినియోగిస్తున్న యూజర్లకు కేంద్ర ప్రభుత్వం తీవ్ర హెచ్చరికలు జారీ చేసింది. మొజిల్లా బ్రౌజర్‌లో లోపాలు ఉన్నాయని కేంద్ర సర్కారు ఏజెన్సీ సంస్థ కంప్యూటర్ ఎమర్జెన్సీ రెస్పాన్సెస్ టీమ్ ఆఫ్ ఇండియా (సర్ట్-ఇన్) ఒక ప్రకటన విడుదల చేసింది. మొజిల్లా ఫైర్‌ఫాక్స్ బ్రౌజర్‌లో భద్రతా పరమైన లోపాలు ఉన్నాయని ఈ ప్రకటనలో కేంద్రం తెలిపింది. అది బ్రౌజర్ సెక్యూరిటీని ఏమార్చి.. యూజర్ డేటాను హ్యాకర్స్‌కు చేరవేస్తాయని చెప్పుకొచ్చింది. ఫైర్‌ఫాక్స్‌లో ఉన్న లోపాల వల్ల టార్గెట్ చేసిన కంప్యూటర్లలో ఆర్బిట్రరీ కోడ్ ఎక్జిక్యూషన్ చేసేందుకు రిమోట్ అటాకర్స్​కు వీలు పడుతోందని సీఈఆర్​టీ తెలిపింది.

మొజిలా ఫైర్​ఫాక్స్ వెర్షన్ 30కి దిగువన ఉన్న ఆండ్రాయిడ్ ఏపీఐపో వినియోగించినప్పుడు ఆడియో మ్యానిపులేషన్ జరిగే చాన్సులు ఎక్కువగా ఉంటాయని సీఈఆర్​టీ పేర్కొంది. మొజిల్లా ఫైర్‌ఫాక్స్ వెర్షన్ 110.1.0 హై రిస్క్‌లో ఉన్నట్లు సీఈఆర్‌టీ వ్యాఖ్యానించింది. అలాగే ఆండ్రాయిడ్ బ్రౌజర్ వెర్షన్‌లోనూ ఈ సెక్యూరిటీ పరమైన లోపాలను గుర్తించినట్లు తెలియజేసింది. మిగిలిన ఫైర్‌ఫాక్స్ వెర్షన్ల మీద ఎలాంటి ప్రభావం ఉండదని వివరించింది. యూజర్లకు నకిలీ వెబ్ లింకులు పంపి.. వాటిపై క్లిక్ చేసిన వెంటనే మొజిల్లా బ్రౌజర్స్‌లోని సెక్యూరిటీ సిస్టమ్​ను ఏమార్చి డేటాను సేకరిస్తారని పేర్కొంది.  ఈ క్రమంలో మొజిల్లా ఫైర్‌ఫాక్స్ యూజర్లు వెర్షన్ 110.1.0 వాడుతుంటే గనుక వెంటనే కొత్త సెక్యూర్డ్ వెర్షన్‌కు అప్‌డేట్ చేసుకోవాలని సీఈఆర్‌టీ యూజర్లకు సూచించింది.