గ్యాస్ ట్యాంకర్​ పేలి భారీ అగ్ని ప్రమాదం.. నలుగురు మృతి!

ఇటీవల దేశ వ్యాప్తంగా రోడ్డు ప్రమాదాల సంఖ్య విపరీతంగా పెరిగిపోతున్నాయి. ప్రతి రోజూ ఎక్కడో అక్కడ పదుల సంఖ్యలో రోడ్డు ప్రమాదాలు జరగడం చూస్తూనే ఉన్నాం. ఈ ప్రమాదాల వల్ల ఎంతో మంది చనిపోతున్నారు.. గాయాలపాలవుతున్నారు. ఇంటి పెద్దలను కోల్పోయి కుటుంబాలు రోడ్డున పడుతున్నాయి. తాజాగా గ్యాస్ ట్యాంకర్, ట్రక్కు ఢీ కొనడంతో పెద్ద ఎత్తున మంటలు వ్యాపించాయి. ఈ ఘటన రాజస్థాన్ లో చోటు చేసుకుంది. వివరాల్లోకి వెళితే..

రాజస్థాన్ అజ్మేర్ జిల్లాలో 8వ నెంబర్ జాతీయ రహదారిపై గురువారం అర్థరాత్రి ఓ గ్యాస్ ట్యాంకర్.. ట్రక్కు ఢీ కొన్నాయి. దాంతో అక్కడ భారీ అగ్ని ప్రమాదం జరిగింది. ఈ ఘటనలో నలుగురు వ్యక్తులు అక్కడికక్కడే సజీవదహనం అయ్యారు. ఈ ప్రమాదంలో మరో నలుగురు వ్యక్తులు తీవ్రంగా గాయపడ్డారు. అటుగా వస్తున్న పలు వాహనాలకు కూడా నిప్పంటుకొని కాలిపోయాయి. గ్యాస్ ట్యాంకర్ ట్రక్కు బలంగా ఢీ కొనడంతో ట్యాంకర్ ఒక్కసారిగా పేలిపోయింది. ఈ ఘటన బీవర్ ప్రాంతంలోని రాణీ బాగ్ రిసార్ట్ కు సమీపంలో జరిగింది.

ప్రమాదం జరిగిన కొంత సేపటి తర్వాత కొంతమంది వాహనదారులు పోలీసులకు సమాచారం అందించారు. రంగంలోకి దిగిన పోలీసులు, అగ్నిమాపక సిబ్బంది హుటాహుటిన సంఘటన స్థలానికి చేరుకొని మంటలను అదుపు చేశారు. ప్రమాదంలో గాయపడ్డ క్షతగాత్రులను సమీపంలోని ఆసుపత్రికి తరలించారు. హైవేపై చాలా సేపటి వరకు వాహనాలు నిలిచి పోవడంతో ట్రాఫిక్ జామ్ అయ్యింది. ఈ ప్రమాదంలో ఇరు వాహనాల డ్రైవర్లు కాలిబూడిదయ్యారు. మరో నలుగురు తీవ్రంగా గాయపడ్డారు.. వారి పరిస్థితి కూడా విషమంగానే ఉందని అంటున్నారు.

 ఈ అగ్ని  ప్రమాదం వల్ల జాతీయ రహదారిని ఆనుకొని ఉన్న కొన్ని ఇళ్లు, దుకాణాలు మంటల్లో చిక్కుకున్నాయి. కాకపోతే ప్రాణ నష్టం ఏమీ జరగలేదు. ప్రమాదం జరిగిన సమయంలో దాదాపు ఒక కిలోమీటర్ వరకు పెద్ద శబ్ధం వినిపించిందని.. అక్కడ పెద్ద ఎత్తున మంటలు కనిపించాయని స్థానికులు తెలిపారు. ఈ ఘటనపై కేసు నమోదు చేసుకొని దర్యాప్తు చేస్తున్నారు పోలీసులు. అయితే ఈ ప్రమాదంలో జరిగిన ఆస్తి నష్టాన్ని అంచనా వేస్తున్నామని తెలిపారు అధికారులు.

Rajasthan | Four dead after a gas tanker collided with a truck on a national highway in Ajmer district last night, confirms Beawar police in Ajmer. pic.twitter.com/H0TUL3BSxB

— ANI MP/CG/Rajasthan (@ANI_MP_CG_RJ) February 17, 2023