మందుబాబులకు ఫుల్​కిక్కు.. ఇకపై ఉదయం 3 గంటల వరకు బార్లు ఓపెన్.. ఎక్కడంటే?

మందుబాబులకు గుడ్​న్యూస్ చెప్పింది చండీగఢ్. బార్ల వేళల విషయంలో కీలక నిర్ణయం తీసుకుంది. కేంద్రపాలిత ప్రాంతమైన చండీగఢ్​లో ఇకపై ఉదయం 3 గంటల వరకు బార్లు తెరిచే ఉంటాయి. ఈ మేరకు కొత్త ఎక్సైజ్ పాలసీ 2023–24ను చండీగఢ్​ అడ్మినిస్ట్రేషన్ రిలీజ్ చేసింది. అలాగే మద్యం మీద ‘కౌ సెస్​’ను కూడా తగ్గించింది. నూతనంగా ‘క్లీన్ ఎయిర్ సెస్​’ను తీసుకొచ్చింది. చండీగఢ్​లో ఇంతకుముందు అర్ధరాత్రి ఒంటిగంట వరకే బార్లకు పర్మిషన్ ఉండేది. కానీ ఇప్పుడు అదనంగా మరో రెండు గంటలు బార్లను తెరుచుకునేందుకు అనుమతిని ఇచ్చారు.

చండీగఢ్​ అడ్మినిస్ట్రేషన్ కొత్త ఎక్సైజ్ పాలసీలో ‘కౌ సెస్​’ను తగ్గించారు. స్వదేశంలో తయారైన 750 ఎంఎల్ లిక్కర్ బాటిల్ మీద కౌ సెస్ గతంలో రూ.5 ఉండేది. ఇప్పుడు దాన్ని రూ.1కి తగ్గించారు. అలాగే బీరుపై కూడా రూ.5గా ఉన్న ఈ సెస్​ను రూ.1కి పరిమితం చేస్తున్నట్లు తెలిపారు. దీంతో పాటు 750/700 ఎంఎల్ విస్కీ మీద కౌ సెస్​ను రూ.10 నుంచి రూ.2కి తగ్గించారు. ఎక్సైజ్ డ్యూటీలోనూ ఎలాంటి మార్పులు చేయకపోవడం గమనార్హం. ఆల్కహాల్ డ్రింక్స్​ స్థానంలో బీర్, వైన్​ను ప్రోత్సహించే ఉద్దేశంతో వాటిపై లైసెన్స్ రుసుములను పెంచలేదు. మరి.. చండీగఢ్​ అడ్మినిస్ట్రేషన్ తీసుకున్న ఈ నిర్ణయాల మీద మీ అభిప్రాయాలను కామెంట్ల రూపంలో తెలియజేయండి.