follow us:
జైలుకెళ్లిన వారికి ఈ మధ్య కాలంలో కోర్టులు కొన్ని రకాల ప్రత్యేక పర్మిషన్‌లు ఇస్తున్నాయి. తాజాగా ఓ యువకుడికి వివాహం చేసుకోవడానికి 4 గంటల పెరోల్ మంజూరు చేసింది కోర్టు. వివాహం కాగానే ఆ యువకుడు మళ్లీ జైలుకెళ్లాడు. ఆ వివరాలు..
సాధారణంగా పెళ్లి అంటే.. ఎంత హడావుడి ఉంటుంది. దాదాపు నెల రోజుల పాటు ఊపిరి సలపని పనులతో.. వచ్చి పోయే బంధువుల రాకతో.. ఇల్లంతా సందడిగా మారుతుంది. ఇక చాలా సమాజాల్లో పెళ్లి తంతు ప్రారంభం అయిన దగ్గర నుంచి వధూవరులను.. పొలిమేర దాటకూడదు అంటారు. పెళ్లి కుమారుడిని, పెళ్లి కూతురుని చేసిన తర్వాత ఇక నేరుగా మండపం దగ్గరకు వెళ్లడమే. మధ్యలో ఎక్కడకు వెళ్లడానికి అవకాశం లేదు. కానీ ఇప్పుడు మీరూ చూడబోయే పెళ్లి మాత్రం చాలా వింతది. ఇక్కడ వరుడు జైలులో ఉన్నాడు. నాలుగు గంటల పెరోల్ మీద బటయకు వచ్చి.. పెళ్లి చేసుకుని.. ఆ తర్వాత మళ్లీ జైలుకెళ్లాడు. ఇదంతా చదివాక అంత అత్యవసరంగా.. కేవలం నాలుగు గంటల వ్యవధిలోనే వివాహం చేసుకోవాల్సిన అవసరం ఏంటి.. అసలు ఆ యువతి జైలుకెళ్లిన వ్యక్తిని ఎందుకు వివాహం చేసుకుంది అనే అనుమానాలు రాకమానవు. వాటికి సమాధానాలు కావాలంటే.. ఇంది చదవండి.
ఇక్కడ సదరు యువకుడు జైలుకెళ్లింది.. అత్యాచార ఆరోపణల మీద. మరి అలాంటి వ్యక్తిని ఎవరు వివాహం చేసుకున్నారు అంటే.. బాధితురాలే. సదరు యువతిని పెళ్లి చేసుకోడానికి 4 గంటల పాటు పెరోల్‌పై విడుదలయ్యి వచ్చి.. వివాహం చేసుకుని మళ్లీ జైలుకెళ్లాడు ఆ యువకుడు. ఈ చిత్రమైన ఘటన బిహార్‌లోని గోపాల్గంజ్ జిల్లా మాచర్‌గావ్ గ్రామంలో చోటుచేసుకుంది. బిహార్‌లోని చెందిన రాహుల్ కుమార్‌ హాజీపుర్‌లో ఇంజినీరింగ్‌ చదివాడు. ఈ క్రమంలో అతడికి ఉత్తర్‌ ప్రదేశ్‌‌లోని కప్తాగంజ్‌కు చెందిన బాధిత అమ్మాయితో పరిచయం ఏర్పడింది. ఈ ఏడాది జనవరిలో రాహుల్ కుటుంబంతో కలిసి సత్సంగ్‌కు వెళ్లాడు. అక్కడ బాధితురాలితో అతడికి పరిచయం ఏర్పడింది. అది కాస్త స్నేహంగా మారి ప్రేమకు దారితీయడంతో.. ఇద్దరూ పెళ్లి చేసుకోవాలని నిర్ణయించుకున్నారు.
ఈ క్రమంలో మార్చి 4న రాహుల్, అతడి గర్ల్‌ ఫ్రెండ్‌ ఇద్దరూ గోపాల్‌గంజ్‌లోని ఓ ఆలయానికి వెళ్లారు. ఆ రోజంతా చుట్టుపక్కల ప్రాంతంలో తిరిగిన ప్రేమ జంట.. ఆ రాత్రి రాహుల్ కుమార్‌ స్నేహితుని ఇంటికి వెళ్లారు. ఆ రోజు రాత్రి జరిగిన ఓ ఘటనతో యువతి తీవ్ర అస్వస్థతకు గురయ్యింది. దాంతో ఆమెను ఆస్పత్రికి తరలించగా.. అత్యాచారానికి గురైనట్లు వైద్యులు నిర్ధారణకు వచ్చారు. వెంటనే దీని గురించి పోలీసులకు సమాచారం ఇవ్వడంతో అక్కడకు చేరుకుని కేసు నమోదు చేశారు. అనంతరం రాహుల్‌ను అరెస్టు చేసి జైలుకు తరలించారు.
అయితే, బాధితురాలిపై తాను అత్యాచారం చేయలేదని.. తామిద్దరూ ఇష్టపడే లైంగిక చర్యలో పాల్గొన్నామని రాహుల్ కోర్టుకు తెలిపాడు. ఆమెను వివాహం చేసుకోడానికి తనను జైలు నుంచి విడుదల చేయాలని కోరాడు. ఇక ఇరు కుటుంబాలు కూడా వీరి పెళ్లికి అంగీకరించడంతో పెరోల్ కోసం గోపాల్గంజ్ జ్యూడిషీయల్ మెజిస్ట్రేట్‌ను ఆశ్రయించాయి. నాలుగు రోజుల పెరోల్ కోరగా.. కోర్టు మాత్రం కేవలం నాలుగు గంటలు మాత్రమే ఇచ్చింది. దీంతో శుక్రవారం జైలు నుంచి వచ్చిన రాహుల్.. అత్యాచార బాధితురాలిని స్థానిక దుర్గాదేవి ఆలయంలో పెళ్లి చేసుకున్నాడు. వివాహతంతు ముగిసిన వెంటనే రాహుల్ జైలుకు వెళ్లాడు.
రాహుల్ కుటుంబ సభ్యలు అతడిని విడుదల చేయాలని కోరుతున్నారు. వారిద్దరూ ఒకరిని ఒకరు ప్రేమించుకున్నారని.. ఇద్దరూ ఇష్టపడే లైంగిక చర్యలో పాల్గొన్నారని తెలిపారు. రాహుల్.. యువతిపై అత్యాచారం చేయలేదని.. వారిద్దరు ప్రేమించుకున్నారని స్పష్టం చేశారు. రాహుల్ శిక్షను రద్దు చేయాలని డిమాండ్ చేస్తున్నారు. అంతేకాక వారిద్దరు మేజర్లని, వారికి ప్రేమిచుకునే హక్కు, పెళ్లి చేసుకునే అర్హత ఉన్నాయని అంటున్నారు. ఇప్పుడు బాధితురాలిని రాహుల్ పెళ్లి చేసుకున్నాడని.. అందుకైనా అతడిని విడుదల చేయాలని కోరుతున్నారు. మరి ఈ సంఘటనపై మీ అభిప్రాయాలను కామెంట్స్‌ రూపంలో తెలియజేయండి.
