మహిళపై ఆకతాయి అనుచిత ప్రవర్తన!

ఆకతాయిలు రెచ్చిపోతున్నారు. మహిళల పట్ల అనుచితంగా ప్రవర్తిస్తూ ఇబ్బందులకు గురి చేస్తున్నారు. ఒంటరి మహిళల్ని లక్ష్యంగా చేసుకుని వెర్రివేషాలు వేస్తున్నారు. వీరిని అడ్డుకునే వారు కూడా లేకపోవడంతో ఆగడాలు మితి మీరుతున్నాయి. చెడు వ్యసనాలకు లోనైన ఆకతాయిలు మహిళలతో అనుచితంగా ప్రవర్తిస్తున్నారు. ఎదురు తిరుగుతున్న మహిళలపై దాడులకు తెగబడుతున్నారు. ఓ మహిళ పట్ల అత్యంత దారుణంగా ఓ ఆకతాయి ప్రవర్తించిన తీరు సభ్య సమాజం తలదించుకునేలా ఉంది. ఈ ఘటన బీహార్ లోని జముయ్ జిల్లాలో చోటుచేసుకుంది. మహిళా ఆరోగ్య కార్యకర్తతో అసభ్యంగా ప్రవర్తించిన ఉదంతం వెలుగు చూసింది.

జమయ్ సదర్‌ ఆసుపత్రి ఆవరణలో ఓ మహిళా ఆరోగ్య కార్యకర్త ఫోన్‌లో మాట్లాడుతుండగా వెనుక నుంచి వచ్చిన ఓ వ్యక్తి ఆమె పట్ల అసభ్యకరంగా ప్రవర్తించాడు. ఈ చర్యతో ఆ మహిళ సైతం ఖంగుతింది. ఈ ఘటన మార్చి 10న జరగ్గా ఆలస్యంగా వెలుగులోకి వచ్చింది. మహిళ ఇచ్చిన ఫిర్యాదుతో పోలీసులు కేసు నమోదు చేశారు. తనకు న్యాయం చేయాలని మహిళ వేడుకున్నారు. ప్రస్తుతం నిందితుడు పరారీలో ఉన్నాడు. ఈ ఘటనకు సంబంధించి సీసీటీవీ ఫుటేజీ వెలుగులోకి వచ్చింది. ఈ వీడియో బయటకు రాగా, వైరల్ గా మారింది. మహిళా ఆరోగ్య కార్యకర్త ఈ ఆసుప్రతిలో 2015 నుండి విధులు నిర్వర్తిస్తున్నారు.

గతంలో ఇలాంటి సంఘటనలు జరగలేదని మహిళ వాపోయింది. మార్చి 10, ఆమె మొబైల్‌లో ఎవరితోనో మాట్లాడుతుండగా, ఒక యువకుడు ఆసుపత్రి గోడ దూకి తన వద్దకు వచ్చాడని, విడిపించుకునేందుకు తాను ప్రయత్నించినట్లు బాధితురాలు ఫిర్యాదు చేశారు. పట్టుకునేంత లోపే ఆ వ్యక్తి అక్కడి నుండి పరారయ్యాడని చెప్పారు. అతడెవరో తనకు తెలియదని, సరిహద్దు గోడ చిన్నగా ఉండటం వల్లే ఈ ఘటన జరిగిందని ఆవేదన చెందారు. సరిహద్దు గోడకు ముళ్లకంచె వేయాలని, ఆసుపత్రుల్లో పనిచేసేలా మహిళలకు భద్రత కల్పించాలని అభ్యర్థించారు. నిందితుడు పరారీలో ఉన్నాడని, త్వరలో అరెస్ట్ చేసి కఠిన చర్యలు తీసుకుంటామని పోలీస్ స్టేషన్ అధికారి రాజీవ్ కుమార్ తివారీ తెలిపారు.