follow us:
నటీనటులు: పవన్ కళ్యాణ్, రానా దగ్గుబాటి, నిత్యామీనన్, సంయుక్త మీనన్, మురళీ శర్మ, సముద్రఖని, రావు రమేష్
బ్యానర్: సితార ఎంటర్టైన్మెంట్స్
నిర్మాత: సూర్యదేవర నాగావంశీ
కథ: సచి(late)
కథనం, మాటలు: త్రివిక్రమ్ శ్రీనివాస్
సినిమాటోగ్రఫీ: రవి కే చంద్రన్
సంగీతం: తమన్
దర్శకత్వం: సాగర్ కే చంద్ర
టాలీవుడ్ లో ప్రేక్షకులు ఎప్పుడెప్పుడా అని ఎదురు చూస్తున్న మాస్ మూవీ ‘భీమ్లా నాయక్’. కొంతకాలంగా అభిమానులు ఈ సినిమా కోసం కళ్లు కాయలుకాచేలా ఎదురుచూస్తున్నారు. పవర్ స్టార్ పవన్ కళ్యాణ్, టాలీవుడ్ హంక్‌ రానా దగ్గుపాటి కాంబినేషన్ లో తెరకెక్కిన ఈ మాస్ చిత్రం.. థియేట్రికల్ రిలీజై ప్రేక్షకుల ముందుకొచ్చింది. భీమ్లా నాయక్ సినిమా హడావిడి రిలీజ్ కు ముందురోజు నుండే అట్టహాసంగా మొదలైంది. రెండు తెలుగు రాష్ట్రాల్లో ప్రస్తుతం.. భీమ్లా నాయక్ – డేనియల్ శేఖర్ పేర్లు మాత్రమే వినిపిస్తున్నాయి. వకీల్ సాబ్ లాంటి సూపర్ హిట్ తర్వాత పవన్ నుండి వస్తున్న సినిమా కావడంతో ఫ్యాన్స్ లో అంచనాలు తారాస్థాయికి చేరుకున్నాయి. మరి రిలీజ్ ముందు నుండే పాజిటివ్ వైబ్రేషన్స్ క్రియేట్ చేసిన భీమ్లా నాయక్ సినిమా ఎలా ఉందో చూద్దాం.
రిటైర్డ్ హవాల్దారు డానీయల్ శేఖర్(రానా) ఓరోజు అడవి మార్గం నుండి కారులో తన సొంతూరుకి వెళ్తుంటాడు. డ్రైవర్ కారు నడుపుతుండగా.. డానీయల్ వెనుక సీట్లో నిద్రపోతాడు. అది లిక్కర్ ఫ్రీ జోన్ కావడంతో చెక్ పోస్ట్ వద్ద డానీయల్ కారును పోలీసులు ఆపుతారు. పోలీసులు చెక్ చేస్తుండగా.. డానీయల్ కారులో లిక్కర్ బాటిల్స్ దొరుకుతాయి. డానీయల్ ని అదుపులోకి తీసుకునే క్రమంలో పోలీసులపై దాడికి దిగుతాడు. ఇంతలో సబ్ ఇన్స్పెక్టర్ భీమ్లా నాయక్ (పవన్ కళ్యాణ్) అక్కడికి వచ్చి డానీ మీద చేయి చేసుకొని.. జీప్ ఎక్కించి స్టేషన్ కి తీసుకెళ్తాడు.
స్టేషన్ లో కేసు ఫైల్ చేసే క్రమంలో డానీకి బడా రాజకీయ నాయకులతో, పోలీసు శాఖ వారితో పరిచయాలు ఉన్నాయనే విషయం భీమ్లాకి తెలుస్తుంది. అయినా సరే.. భీమ్లా తన డ్యూటీ ప్రకారం.. కేసు ఫైల్ చేసి సబ్ జైలుకి రిమాండ్ కి పంపిస్తాడు. ఈ క్రమంలో డానీకి మండిపోయి ఇగో క్లాష్ అవుతుంది. వెంటనే భీమ్లా సస్పెండ్ అయ్యేలా చేస్తాడు. డానీ చేసిన పనికి భీమ్లా ఇగో క్లాష్ అవుతుంది. ఇక అక్కడి నుండి భీమ్లా- డానీల మధ్య పోరు మొదలవుతుంది. ఈ పోరులో అటు భీమ్లా భార్య సుగుణ (నిత్యమేనన్).. ఇటు డానీ ఫ్యామిలీ(సముద్రఖని, సంయుక్త మీనన్) ఎలా స్ట్రగుల్ అయ్యారు? భీమ్లా – డానీల పోరులో ఎవరు గెలుస్తారు? అనేది మిగిలిన కథ.
భీమ్లా నాయక్ ట్రైలర్ లో చెప్పినట్లుగానే అహంకారానికి, ఆత్మగౌరవానికి మధ్య జరిగిన యుద్ధమే ఇది. మలయాళంలో బ్లాక్ బస్టర్ ‘అయ్యప్పనుమ్ కోషియుమ్’ సినిమాకి రీమేక్ గా భీమ్లా నాయక్ తెరకెక్కిన సంగతి తెలిసిందే. డైరెక్టర్ త్రివిక్రమ్ స్క్రీన్ ప్లే – మాటలు అందించిన ఈ స్క్రిప్ట్ లో తెలుగు నేటివిటీ కోసం చాలా మార్పులే చేశారు. కానీ ఎక్కడా మలయాళం ఫ్లేవర్ పోకుండా జాగ్రత్తపడ్డారు. కథతో పాటు సాగే సన్నివేశాలు కాబట్టి మలయాళంలో కనిపించిన సీన్స్ భీమ్లా నాయక్ లో కనిపిస్తాయి. ఒరిజినల్ స్క్రిప్ట్ డిస్టర్బ్ అవ్వకుండా స్క్రీన్ ప్లే ప్లాన్ చేసుకున్నారు. ఇక సినిమాలో త్రివిక్రమ్ మార్క్ డైలాగ్స్ కి లోటే లేదు. ఫస్ట్ హాఫ్, సెకండ్ హాఫ్ రేసీ స్క్రీన్ ప్లే ఎక్కడా బోర్ ఫీల్ రానివ్వదు.
ముఖ్యంగా మలయాళం చూడకుండా కొత్తగా భీమ్లా నాయక్ చూసేవారికి ఈ సినిమా ఫుల్ మీల్స్ అనే చెప్పాలి. తెలుగులో ఇద్దరు హీరోలు ఉన్న సినిమాలు చాలా వచ్చాయి కానీ.. ఇద్దరు హీరోలకు సమానంగా పవర్ ఫుల్ రోల్స్ ఇచ్చి.. ఇగో క్లాషెస్ కథతో అయితే సినిమాలు రాలేదు. ఖచ్చితంగా కొత్తదనం కోరుకునే ప్రేక్షకులకు భీమ్లా నాయక్ పర్ఫెక్ట్ పిక్చర్ అవుతుంది. పవన్ కళ్యాణ్ ఫ్యాన్స్ పండగ చేసుకునే విధంగా భీమ్లా నాయక్ ని.. మాస్ – క్లాస్ అంశాలతో ప్లాన్ చేశారు దర్శకనిర్మాతలు. ఒరిజినల్ మూవీ మలయాళంలో ఓ ట్రెండ్ సెట్టర్ గా నిలిచింది. అలాంటి సినిమాను తెలుగు ప్రేక్షకులు మెచ్చే విధంగా రూపొందించడంలో మేకర్స్ సక్సెస్ అందుకున్నారు.
ఒరిజినల్ చూసినప్పటికి భీమ్లా నాయక్ లో థ్రిల్ కలిగించే సన్నివేశాలు చాలానే ఉన్నాయి. ప్రధానంగా పవన్ – రానాలు ఎదురుపడిన ప్రతి సీన్స్ ప్రేక్షకులను కట్టిపడేస్తాయి. ఇక సినిమాలో ఎక్కడ కూడా పవర్ స్టార్ అనే స్థాయిని, భల్లాలదేవ రానా అనే స్థాయిలను సినిమాలోకి తీసుకురాలేదు. ఈ విషయంలో రచయిత – దర్శకుడిని అభినందించాలి. పవన్ – రానాల తర్వాత సినిమాలో చెప్పుకోదగిన పాత్ర భీమ్లా భార్య సుగుణ. నిత్యమేనన్ ఈ పాత్రకు చాలా న్యాయం చేసింది. నిత్యకి చాలారోజుల తర్వాత ఓ మంచి రోల్ పడిందని చెప్పవచ్చు. డానీయల్ తండ్రి పొలిటికల్ లీడర్ జీవన్ బాబుగా సముద్రఖని.. కనిపించింది తక్కువ సీన్సలో అయినప్పటికీ మాస్ సీన్స్ లో మెప్పించారు.
డానీ భార్యగా సంయుక్త మీనన్ కథలో కీలకమైన పాత్ర పోషించింది. తన పరిధి మేరకు న్యాయం చేసింది. తెలుగులో ఫస్ట్ మూవీ కాబట్టి అవసరమైనంతే ఆమె పాత్రను చూపించారు. భీమ్లా పై ఆఫీసర్ సీఐ గా మురళీ శర్మ.. ఎప్పటిలాగే ఆకట్టుకున్నాడు. ఇక చెప్పుకోవాల్సింది మద్యం దుకాణం నడిపే నాగరాజు పాత్రలో కనిపించే రావురమేష్ గురించి. ఒకే టైంలో అటు హాస్యం, ఇటు వెటకారం పలికించి కామెడీతో మెప్పించారు రావురమేష్. ఆ పాత్రలో ఆయన్ని తప్ప ఎవరినీ ఊహించుకోలేం. ఎమ్మెల్యేగా తనికెళ్ళ భరణి తెలంగాణ యాసలో ఆకట్టుకున్నారు. ఈ సినిమాలో ఏ పాత్ర కూడా ఊరికే పెట్టారు అనుకునేలా లేవు. అందరూ వారి వారి పాత్రలకి వంద శాతం న్యాయం చేశారు. మరోసారి ఫ్యాన్స్ కి పవన్ కళ్యాణ్ పండగ చేసుకునే సినిమాను అందించడానికి స్క్రిప్ట్ సెలక్షన్ బట్టే అర్థమవుతుంది.
భీమ్లా నాయక్ సినిమాకి ప్రధాన బలం స్క్రీన్ ప్లే – డైలాగ్స్.. త్రివిక్రమ్ పెన్ వర్క్ బలమైందని మరోసారి ప్రూవ్ అయింది. ఆయన దర్శకత్వం చేయనప్పటికి డైలాగ్స్ లో తన మార్క్ చూపించారు. సినిమా దర్శకుడు సాగర్ కే చంద్ర గురించి ప్రత్యేకంగా చెప్పుకోవాలి. ‘అప్పట్లో ఒకడుండేవాడు’ సినిమా వచ్చిన ఇన్నేళ్లకు నేరుగా పవన్ కళ్యాణ్ – రానాలతో సినిమా అంటే మాములు విషయం కాదు. దర్శకుడిగా సినిమాకి ఏమేమి కావాలో అన్ని నటుల నుండి రాబట్టుకోవడంలో సక్సెస్ అయ్యాడు. సినిమాటోగ్రఫీ లెజెండరి రవి కే చంద్రన్ గారు సినిమాని మరోస్థాయికి తీసుకెళ్లారు. ముఖ్యంగా పోలీస్ స్టేషన్ సీన్స్, యాక్షన్ ఘట్టాలలో కెమెరాతో ఇంటెన్సిటీ క్రియేట్ చేశారు. మ్యూజిక్ సెన్సేషన్ తమన్.. భీమ్లా నాయక్ పై ఫస్ట్ హైప్ తీసుకొచ్చిన పర్సన్. పాటలతో పాటు సినిమాలో బ్యాక్ గ్రౌండ్ స్కోర్ కి న్యాయం చేశాడు. ఎక్కువ తక్కువ కాకుండా సినిమాకి కావాల్సినంతే ఇచ్చి సంతృప్తి పరిచాడు. నిర్మాత సూర్యదేవర నాగవంశీ.. ఓ రీమేక్ సినిమాని స్టార్ కాస్ట్ తో భారీ బడ్జెట్ తో నిర్మించి సాహసం చేశాడు. అతని కాంఫిడెన్స్ నిర్మాణ విలువలలో కనిపిస్తుంది. ఖచ్చితంగా పైసా వసూల్ చేసుకుంటాడని చెప్పవచ్చు.
