ప్రముఖ ఫార్మా కంపెనీలో పేలుడు.. ఉద్యోగులు షిప్టులో ఉండగానే

ఆంధ్రప్రదేశ్ అనకాపల్లి జిల్లాలో ఘోర ప్రమాదం జరిగింది. అచ్యుతాపురం సెజ్‌లోని సాహితీ ఫార్మా కంపెనీలో భారీ పేలుడు సంభవించింది. అనంతరం పెద్ద యెత్తున మంటలు అలముకున్నాయి. రియాక్టర్ క్లీన్ చేస్తుండగా.. ఈ ప్రమాదం జరిగిందని తెలుస్తోంది. ఈ ఘటనలో రెండు రియాక్టర్లు పేలినట్లు సమాచారం. ఉదయం కార్మికులు షిప్టులో ఉండగానే ఈ ప్రమాదం జరిగింది. భారీ పేలుడుతో పాటు శబ్దాలు రావడంతో ప్రజలు భయాందోళనకు గురయ్యారు. అయితే ఈ ఘటనలో ఇద్దరు కార్మికులు చనిపోవడంతో పాటు పలువురు  తీవ్రంగా గాయపడినట్లు వార్తలు వస్తున్నాయి. ఈ ఘటన గురించి సమాచారం అందుకున్న ఫైర్ సిబ్బంది మంటలు ఆర్పేందుకు ప్రయత్నాలు చేస్తున్నారు.

అచ్యుతాపురం సాహితీ ఫార్మా కంపెనీలో రియాక్టర్లు పేలడంతో భారీ శబ్దాలు వచ్చాయి. ఈ భారీ పేలుడుతో కార్మికులంతా బయటకు పరుగులు తీశారు. పేలుడుతో కెమికల్స్ అంటుకుని మంటలు వ్యాపించడంతో చుట్టుపక్కల భారీగా పొగలు వ్యాపించాయి. కెమికల్ కంపెనీలో పెద్ద ఎత్తున పొగలు వ్యాపించాయి. అయితే ఈ ఘటనలో ఇద్దరు కార్మికులు చనిపోయినట్లు వార్తలు వస్తున్నాయి. మరి కొంత మంది గాయపడ్డారని సమాచారం. వీరందరినీ ఆసుపత్రికి తరలించారు. ప్రస్తుతం వీరిలో కొంత మంది పరిస్థితి విషమంగా ఉన్నట్లు తెలుస్తోంది. మరిన్ని వివరాలు తెలియాల్సి ఉంది.