యాప్ లో పరిచయమైంది, పెళ్లి చేసుకుంటానంది, కానీ చివరికి

హైదరాబాద్ క్రైం- మన దేశంలో ఎన్ని కఠినమైన చట్టాలు వచ్చినా నేరాలు, ఘోరాలు మాత్రం ఆగడం లేదు. అందులోను ఈ మధ్య కాలంలో ఆర్ధికపరమైన నేరాలు బాగా పెరిగిపోయాయి. ప్రతి రోజు ఎక్కడో ఓ చోట ఎవరో ఒకరు మోసపోతూనే ఉన్నారు. తాజాగా హైదరాబాద్ కు చెందిన ఓ సాఫ్ట్ వేర్ ఇంజినీర్ ఓ అమ్మాయి మోజులో పడి లక్షల్లో డబ్బులు పోగొట్టుకున్నాడు. చేసేది లేక చివరికి పోలీసులను ఆశ్రయించాడు.

హైదరాబాద్ కు చెందిన ఓ యువకుడు సాఫ్ట్‌వేర్‌ కంపెనీలో పనిచేస్తున్నాడు. కుటుంబ కలహాలతో మాధాపూర్ లో ఒంటరిగా అపార్ట్ మెంట్ లో ఉంటున్నాడు. ఈ క్రమంలో ఖాళీ సమయంలో లైఫ్‌ స్ట్రీమింగ్‌, స్ట్రీమ్‌ కరో యాప్‌లలో చాటింగ్‌ చేస్తుండగా ఓ యువతి పరిచయమైంది. ఆ పరిచయం కాస్త వీడియో కాల్స్‌ చేసుకనే వరకు వెళ్లింది. ఇక ఇద్దరు కొన్ని రోజుల్లోనే చాలా దగ్గరయ్యారు.

Crime 1 1

తానూ కుటుంబ సమస్యలతో ఇబ్బంది పడుతున్నానని, ఇద్దరు పిల్లలున్నారని ఆమె చెప్పింది. తనను పెళ్లి కూడా చేసుకుంటానని సాఫ్ట్ వేర్ ఇంజినీర్ కు మాట ఇచ్చింది. అంతలోనే అనుకోని అవసరం వచ్చిందంటూ 5 లక్షల రూపాయలు కావాలని కోరింది. ఎలాగూ తనను పెళ్లిచేసుకోబోతోంది కదా అని వెంటనే ఆమె బ్యాంక్ అకౌంట్ కు 5 లక్షల రూపాయలు పంపించేశాడు. ఇంకేముంది ఆ తరువాత ఆమె ఫోన్ స్విచ్ ఆఫ్ లో ఉంది. తాను మోసపోయానని, ఎవరికైనా చెబితే పరువు పోతుందని సైలెంట్ గా ఉన్నాడు.

అంతలో సాఫ్ట్ వేర్ ఇంజినీర్ కు అదే యాప్‌లో ఆ యువతి ముఠాకు చెందిన శ్రీధర్‌ సాగర్‌ అనే వ్యక్తి పరిచయం చేసుకున్నాడు. మాటల సందర్బంలో యువతి ఇలా మోసం చేసిందని చెప్పడంతో, ఏంతెలియనట్టే డబ్బు పోయినందుకు సానుభూతి చూపించాడు. కాస్త ఫ్రెండ్ షిప్ పెరిగాక ఓ రోజు ఫాంహౌజ్ కు ఆహ్వానించడంతో సాఫ్ట్ వేర్ ఇంజినీర్ అక్కడికి వెళ్లాడు. ఇంకేముంది మూడు రోజులు అతనికి డ్రగ్స్‌ ఇచ్చి మత్తులోకి దింపాడు.

సాఫ్ట్‌ వేర్‌ ఇంజనీర్‌ క్రెడిట్‌ కార్డులు తీసుకొని పే పాల్‌ ద్వారా 15 లక్షల వరకు ఓ సెలబ్రిటీ యువతికి పంపించాడు. మెలకువ వచ్చి చూసే సరికి శ్రీధర్‌ సాగర్‌ పారిపోయాడు. ఇక చేసేది లేక పోలీసులను ఆశ్రయించాడు సాఫ్ట్ వేర్ ఇంజినీర్.