ఔరా!.అరుదైన అద్భుతమైన ఇల్లు ఆరు లక్షలకే!..

‘ఇల్లు కట్టి చూడు.. పెళ్లి చేసి చూడు’ అని జగమెరిగిన సామెత. ఎందుకంటే ఈ రెండు పనులూ చాలా కష్టమైనవి, ఖర్చుతో కూడుకున్నవని అభిప్రాయంకదా. ఇల్లు కట్టడమనేది చాలా ఈజీ పని అన్నట్టుగా చేసి చూపించారు సిద్దిపేట జిల్లా గజ్వేల్‌కు చెందిన 36 ఏళ్ల నాగేశ్‌. సొంత ఇంటిని తక్కువ సమయంలో నిర్మించుకోవాలని ఆలోచించి మిగతా వారికి భిన్నంగా ఉండేలా.. నలుగురు ఉండే కుటుంబానికి సౌకర్యాలతో, అవసరమైతే ఎక్కడికైనా తరలించుకుపోయే సామగ్రితో వేగంగా ఇల్లు నిర్మించాలని నిర్ణయించుకున్నారు. సాధారణంగా ఇంటి నిర్మాణానికి కనిష్ఠంగా రూ.10 లక్షలు అవసరమవుతాయి. కట్టెలు, ఇనుము వంటి సామగ్రి ఉపయోగించి తక్కువ ధరలో ఆయన నిర్మించి భేష్ అనిపించుకున్నారు.

300 చదరపు అడుగుల విస్తీర్ణంలో 9 అడుగుల ఎత్తులో 6 పిల్లర్లు వేశారు. కేరళ, యూరోపియన్‌ కర్రలు, ఇనుప ఫ్రేమ్‌లు ఇంటికి వాడారు. స్క్రూలు, నట్లు, మొలలతో బిగించారు. విద్యుత్తు, నీరు, మురుగు పారుదల వ్యవస్థ చేయడం విశేషం. ఈదురు గాలులు, భారీ వర్షం ఎదురైనా గట్టిగా ఉండేలా వేసవిలో చల్లదనం అందేలా చూశారు. కింది నుంచి మొదటి అంతస్తు వరకు ఇనుప మెట్లు మరో ప్రత్యేకత. వంట, పడక, భోజనం గదులు, ముందు హాల్‌తో పాటు శౌచాలయం, బాల్కనీ ఉన్నాయి. సాధారణంగా ఇంటి నిర్మాణానికి ఆరు నెలల సమయం పడుతుంది.

20 రోజుల్లో రూ.6 లక్షలు ఖర్చు చేసి ఆయన   నిర్మాణం పూర్తి చేశారు. చాలా మంది ఈ ఇంటిని సందర్శన స్థలంగా వచ్చి చూసి వెళ్తున్నారు.ఈ ఇంటికి అవసరమైన సామగ్రి  దూలపల్లిలోని జిలానీ మొబైల్‌ హౌజ్‌ పరిశ్రమ నుంచి తెచ్చారు.