యూకే డిప్యూటి కమీషనర్‌ కు ఆవకాయ రుచి చూపించిన మెగాస్టార్ చిరంజీవి!

మెగాస్టార్ చిరంజీవిని ఒక గొప్ప నటుడిగానే కాకుండా.. మానవత్వం కలిగిన ఒక మంచి మనిషిగా అందరూ ఎంతో గౌరవిస్తారు. చిరంజీవి ఇండస్ట్రీలో ఎన్ని కష్టాలు పడి పైకివచ్చారో అందరికీ తెలిసిందే. తనలా మరెవరూ అవకాశాల కోసం, గుర్తింపు కోసం కష్టపడకూడదని.. కొత్తవారిని ఎప్పుడూ ప్రోత్సహిస్తూ ఉంటారు. ఎంత చిన్న హీరో అయినా తన సినిమాని ప్రమోట్‌ చేయమని అడిగితే.. అవకాశం మేరకు వారికి అభినందనలు తెలపడం మాత్రమే కాకుండా సినిమాని ఆదరించాలని కోరుతుంటారు. ఏ చిన్న హీరోకి విజయం వచ్చినా వెంటనే కాల్‌ చేసి అభినందిస్తుంటారు. ఇటీవలి కాలంలో ఇలాంటి ఘటనలు చాలానే చూశాం. అయితే ఆతిథ్యం విషయంలోనూ మెగాస్టార్‌ ఎక్కడా తగ్గరని అందరికీ తెలిసిందే.

తాజాగా రెండు తెలుగు రాష్ట్రాల బ్రిటన్‌ డిప్యూటి హై కమిషనర్‌కు చిరంజీవి ఆతిథ్యం ఇచ్చారు. సోమవారం రాత్రి గారెత్ వెయిన్ ఓవెన్‌ చిరంజీవి ఇంటికి వెళ్లారు. అక్కడ మెగాస్టార్‌ ఆతిథ్యాన్ని అందుకున్నారు. ఆ విషయాన్ని మెగాస్టార్ తన సోషల్ మీడియా ఖాతాల ద్వారా అభిమానులతో పంచుకున్నారు. “నా ఇంట్లో యూకే డిప్యూటి హై కమీషనర్‌ గారెత్ వెయిన్ ఓవెన్‌కు ఆతిథ్యం ఇచ్చాను. డిన్నర్‌ చేస్తుండగా.. యూకే, భారత్‌, తెలుగు రాష్ట్రాలకు సంబంధించిన ఎన్నో విషయాల గురించి చర్చించుకున్నాం. ఆయనకు మన ఘాటైన ఆవకాయ రుచి చూపించాను” అంటూ చిరంజీవి చెప్పుకొచ్చారు. డిప్యూటి హై కమిషనర్‌తో కలిసున్న ఫొటోలను కూడా షేర్‌ చేశారు.

Delighted to meet Gareth Wynn Owen @UKinHyderabad the new British Dy High Commissioner in town.Exchanged courteous notes on many topics of UK,India & Telugu states over dinner at my place. Got him to taste some traditional Telugu delicacies,not to forget some spicy #Avakaya 😊 pic.twitter.com/CF8rx7bUBS

— Chiranjeevi Konidela (@KChiruTweets) November 1, 2022

మెగాస్టార్‌ ట్వీట్‌ను తెలుగు రాష్ట్రాల యూకే డిప్యూటి హై కమిషనర్‌ గారెత్‌ వెయిన్‌ ఓవెన్‌ రీట్వీట్‌ చేశారు. “మీ ఇంట్లో నాకు ఆతిథ్యం ఇచ్చినందుకు.. నాకు దోస- ఆవకాయను రుచి చూపించినందుకు మీకు ధన్యవాదాలు. మీ ఆతిథ్యం, మన ఈ కలయికను నేను ఎప్పటికీ మర్చిపోను. మీ బ్లడ్‌ డొనేషన్‌ సెంటర్‌లో మిమ్మల్ని మరోసారి కలుసుకోవాలని కోరుకుంటున్నాను” అంటూ గారెత్‌ వెయిన్ ఓవెన్‌ ట్వీట్‌ చేశారు. ఇంక మెగాస్టార్‌ చిరంజీవి సినిమాల విషయానికి వస్తే.. సంక్రాంతి బరిలో జనవరి 12న ‘వాల్తేరు వీరయ్య’ పోటీ పడనుంది. బాబీ దర్శకత్వంలో ఊర మాస్‌ లుక్‌లో మెగాస్టార్‌ సందడి చేయనున్న విషయం తెలిసిందే. ఇప్పటికే విడుదలైన టైటిల్‌ టీజర్‌ ప్రేక్షకుల్లో ఉత్సాహాన్ని నింపింది. సినిమా కూడా ఘన విజయం సాధిస్తుందంటూ ఆకాంక్షిస్తున్నారు.

Thank you for hosting me in your beautiful home and introducing me to home made steamed dosa and avakaya. It was a special evening I will remember for a long time, and I look forward to meeting you at one of your blood donation centres. https://t.co/UzMymjpKyC

— Gareth Wynn Owen (@UKinHyderabad) November 1, 2022