హెల్మెట్‌ కి ఎయిర్‌ బ్యాగ్‌.. మార్కెట్‌ లోకి ఎప్పుడంటే?

రోజూ ఏదొకచోట రోడ్డు ప్రమాదాలు జరుగుతూనే ఉన్నాయి. ఆ ప్రమాదాల్లో ప్రాణాలు పోతూనే ఉన్నాయి. అయితే ప్రమాదంలో ఒక వ్యక్తి చనిపోవడం అంటే.. ఒక కుటుంబం రోడ్డున పడటం. కొందరు ప్రమాదవశాత్తు ప్రాణాలు కోల్పోతుంటే.. ఇంకొందరు మాత్రం వారి నిర్లక్ష్యంతో ప్రాణాలు పోగొట్టుకుంటున్నారు. అలాగే వారి నిర్లక్ష్యం ఇంకొక కుటుంబానికి చేటు తెస్తోంది. చాలా ప్రమాదాల్లో ప్రాణాలు కోల్పోవడానికి కారణం సీటు బెల్టు పెట్టుకోకపోవడం, హెల్మెట్‌ ధరించకపోవడమే అనేది నివేదికల్లో తెలుస్తున్న నిజాలు. అయితే కొన్ని ‌ప్రమాదాల్లో మాత్రం హెల్మెట్‌ ధరించినా కూడా ప్రాణాలు కోల్పోవడం, బ్రెయిన్‌ డెడ్‌ కావడం, తల పగలడంలాంటి ఘటనలు చూస్తూనే ఉన్నాం. ఇప్పుడు అలాంటి వాటికి చెక్‌ పెట్టేందుకే ఓ ఆవిష్కరణను పరిచయం చేస్తున్నారు.

హెల్మెట్‌ పెట్టుకుంటే మీ ప్రాణాలకు భరోసా ఉంటుంది. కానీ, కొన్ని ప్రమాదాల్లో హెల్మెట్‌ ధరించినా కూడా ప్రాణాలు పోగొట్టుకున్న వాళ్లు ఉన్నారు. ఇప్పుడు చెప్పుకోబోయే హెల్మెట్‌ను ధరిస్తే మాత్రం అలాంటి ఘటనలు చాలా తగ్గుముఖం పడతాయని రూపకర్తలు భరోసా ఇస్తున్నారు. ఇటలీకి చెందిన ఎయిరోహ్‌ అనే కంపెనీ ఈ ఆవిష్కరణను తీసుకురాబోతోంది. ఆటోలివ్‌ అనే స్వీడిష్‌ కంపెనీతో కలిసి ఎయిరోహ్‌ ఒక కొత్త హెల్మెట్‌ని తయారు చేసింది. అందుకు సంబంధించిన నమూనాని కూడా పరిచయం చేసింది. దానిని ఎయిర్‌ హెడ్‌గా పిలుస్తున్నారు. అది గానీ ధరిస్తే మీ ప్రాణాలకు పూర్తిగా కాకపోయినా కనీసం 80 శాతం మేర గ్యారెంటీ ఇవ్వొచ్చని చెబుతున్నారు.

ఈ హెయిర్‌ హెడ్‌ ప్రత్యేకతలు ఏంటంటే.. మీకు కారులో ఎలా అయితే ప్రమాదం జరగ్గానే డ్యాష్ బోర్డ్‌, స్టీరింగ్‌ నుంచి(సీటు బెల్టు ధరించి ఉంటేనే) ఎయిర్‌బ్యాగ్‌లు బయటకు వస్తాయో.. అలాగే ప్రమాద సమయంలో ఈ హెల్మెట్‌ నుంచి ఎయిర్‌ బ్యాగ్‌లు బయటకు వస్తాయి. తద్వారా ప్రమాదంలో వాహనదారుడిపై తీవ్రత తగ్గే అవకాశం ఉంది. తల పగలకుండా ఉండేందుకు ఈ ఎయిర్‌బ్యాగ్‌లు దోహదపడతాయని తయారీదారులు చెబుతున్నారు. అయితే ఈ ఎయిర్‌హెడ్‌ ఇంకా మార్కెట్‌లోకి రాలేదు. నమూనాను మాత్రమే ప్రజలకు పరిచయం చేశారు. దాదాపుగా వచ్చే ఏడాది ఇవి మార్కెట్‌లో అందుబాటులోకి వచ్చే అవకాశం ఉందని చెబుతున్నారు. హెల్మెట్‌ ఏదైనా ప్రాణాలు పోకుండా ఉండాలి అంటే.. ముందు హెల్మెట్‌ ధరించడం నేర్చుకోవాలి.

Italian company Airoh are integrating airbag technology into a motorcycle helmet! With motorbike safety being our core value, this is something we fully support! 🙌 #motorbikehelmet #heatedvisor #motorbikesafety pic.twitter.com/4S32AkRRiK

— Diamond Coatings (@Diamondcoatings) December 6, 2022