ఆ రోజు వెస్టిండీస్ దెబ్బకి ఆస్ట్రేలియా వణికిపోయింది! స్టీవా ఏడ్చేశాడు!

వరుసగా రెండు వరల్డ్‌ కప్పులు గెలిచి 2003 ఏప్రిల్‌లో వెస్టిండీస్‌ గడ్డపై అడుగుపెట్టింది ఆస్ట్రేలియా. గతమెంతో ఘనమైన విండీస్‌.. బ్రియన్‌ లారా, చంద్రపాల్‌ లాంటి దిగ్గజాలతో బలంగానే ఉంది. కానీ.. క్రికెట్‌ ప్రపంచాన్ని శాసిస్తున్న ఆస్ట్రేలియాతో తలపడాలంటే అంత ఆషామాషీ విషయం కాదు. ఆటతోనే కాదు మాటతో కూడా ప్రత్యర్థిని కుప్పకూల్చే నైజం ఆస్ట్రేలియాది. ఇక టెస్టు క్రికెట్‌లో అయితే.. ఆస్ట్రేలియన్ల స్లెడ్జింగ్‌కు భయపడే.. చాలా జట్లు మానసికంగా చచ్చిపోయేవి. ఆటలోనూ ఆస్ట్రేలియాన్లు ప్రపంచ ఛాంపియన్లు. వరుసగా రెండు వరల్డ్‌ కప్పులు గెలిచిన వెస్టిండీస్‌ రికార్డును సమం చేసి మరీ.. కరేబియన్ల గడ్డపై అడుగుపెట్టింది ఆసీస్‌. స్టీవా, జస్టిన్‌ లంగర్‌, మ్యాథ్యూ హేడెన్‌, ఆడమ్‌ గిల్‌క్రిస్ట్‌, రికీ పాంటింగ్‌, బ్రెట్‌ లీ, గిల్లెస్పీ, మెక్‌గ్రాత్‌ ఇలా అందరూ మ్యాచ్‌ విన్నర్లే.

పేరుకు తగ్గట్లే ఆస్ట్రేలియా తొలి మూడు టెస్టుల్లోనూ వెస్టిండీస్‌ను ఓడించి.. 4 టెస్టుల సిరీస్‌ను 3-0తో మరో టెస్టు మిగిలి ఉండగానే కైవసం చేసుకుంది. దీంతో అప్పటికే ప్రపంచ ఛాంపియన్లమనే గర్వంతో ఉన్న కంగారులకు ఆ గర్వం మరింత ఎక్కువైంది. చివరి టెస్టులోనూ వెస్టిండీస్‌ను చిత్తు చేయాలని భావించారు. కానీ.. మూడు టెస్టులు ఓడిన బాధను దూరం చేసుకుంటూ.. సిరీస్‌ గెలిచిన ఆస్ట్రేలియా అహంకారాన్ని దించుతూ.. వెస్టిండీస్‌ చరిత్ర సృష్టించింది. 2003 వరల్డ్‌ కప్‌ గెలిచిన నెల రోజులకే ఆస్ట్రేలియా పరువు పోయింది. కరేబియన్ల చేతిలో కంగారులకు తగిన శాస్త్రి జరిగిందంటూ ప్రపంచం మొత్తం మాట్లాడుకుంది. మరీ ఆస్ట్రేలియా లాంటి వరల్డ్‌ ఛాంపియన్‌ టీమ్‌కు ఇద్దరు కరేబియన్‌ వీరులు ఎలా గుణపాఠం చెప్పారో ఇప్పుడు తెలుసుకుందాం..

2003 మే 9.. వెస్టిండీస్‌-ఆస్ట్రేలియా మధ్య సెయింట్‌ జాన్స్‌ క్రికెట్‌ స్టేడియంలో నాలుగో టెస్టు ప్రారంభమైంది. తొలుత బ్యాటింగ్‌ చేసిన ఆస్ట్రేలియాను వెస్టిండీస్‌ బౌలర్‌ జెర్మైన్ లాసన్ అనూహ్యంగా 7 వికెట్లతో చెలరేగి 240 పరుగులకే ఆలౌట్‌ చేశాడు. మెక్‌గ్రాత్‌, గిల్లెస్పీ, బ్రెట్‌ లీతో కూడిన భీకరమైన పేస్‌ ఎటాక్‌ ఉన్న ఆస్ట్రేలియా సైతం విండీస్‌ను తొలి ఇన్నింగ్స్‌లో 240 పరుగులకే ఆలౌట్‌ చేసింది. అయితే.. తొలి ఇన్నింగ్స్‌లో విఫలమైన ఆస్ట్రేలియా.. రెండో ఇన్నింగ్స్‌లో మాత్రం సత్తా చాటింది. ఆసీస్‌ ఓపెనర్లు జస్టిన్‌ లంగర్‌(111), మ్యాథ్యూ హేడెన్‌(177) సెంచరీలతో చెలరేగడంతో ఆస్ట్రేలియా 417 పరుగుల భారీ స్కోర్‌ చేసింది. దీంతో.. వెస్టిండీస్‌ ముందు 418 పరుగుల భారీ టార్గెట్‌ వచ్చిపడింది.

ఆస్ట్రేలియా బౌలింగ్‌ ఎటాక్‌ను చూసినా, ఈ సిరీస్‌లో విండీస్‌ బ్యాటింగ్‌ లైనప్‌ ప్రదర్శన చూసినా.. ఈ మ్యాచ్‌లో ఆస్ట్రేలియా విజయాన్ని అడ్డుకోవడం అసాధ్యం. పైగా 418 పరుగులను ఛేజ్‌ చేసి గెలిచిన దాఖలాలు క్రికెట్‌ చరిత్రలోనే లేదు. వెస్టిండీస్‌ ఛేజ్‌ చేస్తుందన్న నమ్మకం కూడా ఎవరీ లేదు. అనుకున్నట్లే 74 పరుగులకే వెస్టిండీస్‌ 3 వికెట్లు కోల్పోయి.. ఓటమికి ప్రిపేర్‌ అవుతున్నట్లు కనిపించింది. కానీ.. ఆ ఇద్దరు మాత్రం.. అందుకు సిద్ధంగా లేరు. ఆ ఇద్దరే రామ్‌నరేష్‌ శర్వాణ్‌, శివనారాయణ్‌ చంద్రపాల్‌.. ఆసీస్‌ను ఓడించేందుకు కంకణం కట్టుకుని మరీ బ్యాటింగ్‌కు దిగినట్టు ఆడారు. బలమైన, దుర్భేద్యమైన ఆస్ట్రేలియా బౌలింగ్‌ ఎటాన్‌ను చీల్చి చెండాడుతూ.. ఫోర్ల వర్షం కురిపిస్తూ.. టెస్టును వన్డే స్టైల్లో ఆడుతూ.. రెచ్చిపోయారు.

బౌలింగ్‌ వేసేది బ్రెట్‌లీ అయినా.. మెక్‌గ్రాత్‌ అయినా.. ఒకటే ట్రీట్‌మెంట్‌.. కొట్టుడే. అసలేం జరుగుతుందో ఆస్ట్రేలియన్లకు అర్థం కావడంలేదు. అప్పటి వరకు ఏదో చావింటికి వచ్చినట్లు మౌనంగా కూర్చున్న వెస్టిండీస్‌ అభిమానులు పూనకంతో ఊగిపోయారు. కరేబియన్‌ కెప్టెన్‌ బ్రియన్‌ లారా 5 ఫోర్లు, 3 సిక్సులతో 60 రన్స్‌ బాది.. కొద్ది సేపు విండీస్‌ ఫ్యాన్స్‌కు వినోదం పంచినా.. వారికి అసలైన జాతరను అందించింది మాత్రం.. శర్వాణ్‌-చంద్రపాల్‌ జోడీనే. ప్రపంచంలోనే అత్యంత భీకరమైన బౌలింగ్‌ ఎటాక్‌ కలిగిన ఆస్ట్రేలియాను పిచ్చి కొట్టుడు కొడుతూ.. ఇద్దరూ సెంచరీలతో విరుచుకుపడ్డారు. వీరిద్దరినీ అవుట్‌ చేయలేక.. చివరికి తమకు వెన్నెతో పెట్టిన విద్య.. స్లెడ్జింగ్‌కు కూడా పాల్పడింది ఆస్ట్రేలియా. వెస్టిండీస్‌ విజయానికి 181 పరుగులు అవసరమైన దశలో మెక్‌గ్రాత్‌ స్లెడ్జింగ్‌కు దిగాడు.

రామ్‌నరేష్‌ శర్వాణ్‌పై బూతులతో విరుచుకుపడ్డాడు. ‘బ్రియన్‌ లారా మర్మాంగం రుచిగా ఉంటుందా?’ అని శర్వాణ్‌ను అడిగాడు మెక్‌గ్రాత్‌.. దానికి ‘అది నాకు తెలియదు.. వెళ్లి నీ భార్యను అడుగు’ అంటూ శర్వాణ్‌ సైతం పచ్చిగానే బదులిచ్చాడు. కానీ.. ఆ టైమ్‌లో మెక్‌గ్రాత్‌ భార్య క్యాన్సర్‌తో బాధపడుతుండటంతో మెక్‌గ్రాత్‌ చాలా సీరియస్‌గా తీసుకుని.. శర్వాణ్‌కు గట్టిగా వార్నింగ్‌ ఇచ్చాడు. అంపైర్‌ కలగజేసుకుని.. మెక్‌గ్రాత్‌ను అక్కడి నుంచి పంపించాడు. అయితే.. మెక్‌గ్రాత్‌ భార్య క్యాన్సర్‌తో బాధపడుతున్న విషయం శర్వాణ్‌కు తెలియదు. కాగా.. ఆ వెంటనే డ్రింక్స్‌ బ్రేక్‌లో ఇద్దరూ ఒకరికొకరు క్షమాపణలు సైతం చెప్పుకున్నారు. కానీ.. మొదట స్లెడ్జింగ్‌కు దిగిన మెక్‌గ్రాత్‌ ఈ విషయంలో ఎక్కువగా విమర్శలు ఎదుర్కొన్నాడు. ఈ గొడవ అంతటితో ముగియగా.. ఆసీస్‌ పరువు పోయేందుకు సమయం ఆసన్నమైంది.

418 పరుగుల వరల్డ్‌ రికార్డును ఛేదించేందుకు.. శర్వాణ్‌, చంద్రపాల్‌ ప్రాణం పెట్టి ఆడారు. పేరుకు టెస్ట్‌ మ్యాచ్‌ అయినా.. వారిద్దరూ ఆసీస్‌ బౌలర్లపై విరుచుకుపడ్డారు. ఇప్పుడు చెప్పుకుంటున్న అగ్రెసివ్‌ గేమ్‌ను వారిద్దరూ ఆ మ్యాచ్‌లోనే ఆడి చూపించారు. జిడ్డు బ్యాటింగ్‌కు మారుపేరుగా నిలిచిన చంద్రపాల్‌ సైతం ఆస్ట్రేలియాపై ఎటాకింగ్‌ బ్యాటింగ్‌తో చెలరేగాడు. టెస్టుల్లో చంద్రపాల్‌ సిక్స్‌ కొట్టడం చాలా అరుదు.. కానీ ఆస్ట్రేలియా బౌలింగ్‌లో చంద్రపాల్‌ భారీ సిక్స్ ఇప్పటికీ క్రికెట్‌ అభిమానులకు స్పెషలే. ఇక శర్వాణ్‌ 139 బంతుల్లో 17 ఫోర్లతో 105 పరుగులు, చంద్రపాల్‌ 154 బంతుల్లో 17 ఫోర్లు, ఒక సిక్స్‌తో 104 పరుగులు చేసి.. వెస్టిండీస్‌ను కొత్త చరిత్ర వైపు నడిపించారు.

వీరిద్దరు చెలరేగి ఆడుతుంటే.. బౌలర్లను మార్చిమార్చి.. ఆస్ట్రేలియా కెప్టెన్‌ స్టీవా ముఖంపై చుక్కనీరు లేదు.. ఏడుపొక్కటే తక్కువ. అయితే.. వెస్టిండీస్‌ విజయానికి ముంగిట బ్రెట్‌ లీ.. శర్వాణ్‌, చంద్రపాల్‌లను అవుట్‌ చేసి.. ఆసీస్‌లో ఆశలు రేపినా.. మిగితా లాంఛనాన్ని ఒమారీ బ్యాంక్స్(47), వాస్బర్ట్ డ్రేక్స్(27) పూర్తి చేసి.. వరల్డ్‌ రికార్డును బద్దలు కొట్టారు. ప్రపంచ ఛాంపియన్లమనే ఆస్ట్రేలియా తలబిరుసును దించుతూ.. టెస్టు క్రికెట్‌ చరిత్రలో 418 పరుగుల టార్గెట్‌ ఛేదించి గెలిచిన తొలి జట్టుగా వెస్టిండీస్‌ చరిత్ర సృష్టించింది. కరేబియన్లు సాధించిన ఘనతల కిరీటంలో ఈ విజయం ఒక కలికితురాయిగా నిలిచిపోయింది. ఆస్ట్రేలియా ప్రపంచ క్రికెట్‌ను శాసిస్తున్న టైమ్‌లో వారి గర్వాన్ని అణిచిన రామ్‌నరేష్‌ శర్వాణ్‌, శివనారాయణ్‌ చంద్రపాల్‌ ఇన్నింగ్స్‌లపై మీ అభిప్రాయాలను కామెంట్ల రూపంలో తెలియజేయండి.