follow us:
టీమిండియా యువ క్రికెటర్‌ వెంకటేశ్‌ అయ్యర్‌ ఆల్‌రౌండ్‌ షోతో అదరగొట్టాడు. బ్యాటింగ్‌లో ఫోర్లు, సిక్సులతో హోరెత్తించి.. ఆ తర్వాత బంతితో ప్రత్యర్థి భరతం పట్టాడు. అసలు సిసలైన ఆల్‌రౌండర్‌కు అర్థం చెబుతూ.. సయ్యద్‌ ముస్తాక్‌ అలీ ట్రోఫీ 2022లో దుమ్మురేపాడు. ఐపీఎల్‌లో కోల్‌కత్తా నైట్‌ రైడర్స్‌ తరఫున ఆడి ఒక వెలుగు వెలిగిన అయ్యర్‌.. ఆ తర్వాత టీమిండియాలోకి ఎంట్రీ కూడా ఇచ్చాడు. కానీ.. ఆశించిన స్థాయిలో రాణించలేకపోయవడంతో.. మళ్లీ డొమెస్టిక్‌ క్రికెట్‌లో తన సత్తా చాటుతున్నాడు. సయ్యద్‌ ముస్తాక్‌ అలీ ట్రోఫీ 2022లో భాగంగా మంగళవారం మధ్యప్రదేశ్‌-రాజస్థాన్‌ మధ్య జరిగిన మ్యాచ్‌లో వెంకటేశ్‌ అయ్యర్‌ వన్‌మ్యాన్‌ షోతో రెచ్చిపోయాడు.
ఈ మ్యాచ్‌లో తొలుత బ్యాటింగ్‌ చేసిన మధ్యప్రదేశ్‌ నిర్ణీత 20 ఓవర్లలో 5 వికెట్ల నష్టానికి 173 పరుగుల భారీ స్కోర్‌ చేసింది. ఓపెనర్లు చంచల్‌(33), కుల్దీప్‌(31) మంచి ఆరంభాన్ని ఇవ్వడంతో వన్‌డౌన్‌లో వచ్చిన అయ్యర్‌ ఆకాశమే హద్దుగా చెలరేగిపోయాడు. డెత్‌ ఓవర్స్‌లో ఆడే ఇన్నింగ్స్‌ను మిడిల్‌ ఓవర్స్‌లోనే ఆడేశాడు. దీంతో మధ్య ప్రదేశ్‌ స్కోర్‌ రాకెట్‌ వేగంతో దూసుకెళ్లింది. 31 బంతుల్లో 5 ఫోర్లు, 4 సిక్సులతో 62 పరుగులు చేసిన అయ్యర్‌ టాప్ స్కోరర్‌గా నిలిచాడు. అయ్యర్‌కు తోడు శుభమ్‌ శర్మ కూడా 19 బంతుల్లో 32 పరుగులు చేసి రాణించాడు.
ఇక బౌలింగ్‌లోనూ అయ్యర్‌ సంచలనం సృష్టించాడు. ఈ మ్యాచ్‌లో ఏడో బౌలర్‌గా ఎంట్రీ ఇచ్చిన అయ్యర్‌.. తన ఆల్‌రౌండర్‌ ప్రతిభను అద్భుతంగా ప్రదర్శించాడు. తన కోటా 4 ఓవర్లను పూర్తి చేసిన అయ్యర్‌.. కేవలం 20 పరుగులు మాత్రమే ఇచ్చి ఏకంగా 6 వికెట్లు పడగొట్టాడు. బ్యాటింగ్‌లో హాఫ్‌ సెంచరీతో పాటు బౌలింగ్‌ 6 వికెట్ల హల్‌ సాధించి ఈ మ్యాచ్‌ను వన్‌మ్యాన్‌ షో కింద మార్చేశాడు. కాగా ఇటివల దులీప్‌ ట్రోఫీ సందర్భంగా వెస్ట్‌జోన్‌ బౌలర్‌ వెంకటేశ్‌ అయ్యర్‌ను బాల్‌తో కొట్టిన ఘటనలో అయ్యర్‌ గ్రౌండ్‌లోనే కుప్పకూలిన విషయం తెలిసిందే. ఈ ఘటన సంచలనంగా మారింది. కానీ.. గాయం పెద్దది కాకపోవడం, అయ్యర్‌ తిరిగి కోలుకుని ముస్తాక్‌ అలీ ట్రోఫీలో రాణిస్తుండటంపై ఇండియన్‌ క్రికెట్‌ అభిమానులు సంతోషం వ్యక్తం చేస్తున్నారు. కాగా.. ఐపీఎల్‌ 2023లోనూ కేకేఆర్‌ తరఫున మంచి ప్రదర్శన ఇచ్చి.. టీమిండియాలోకి రీఎంట్రీ ఇవ్వాలని అయ్యర్‌ గట్టి పట్టుదలతో ఉన్నాడు.
ICYMI: Venkatesh Iyer scored a quick-fire fifty for Madhya Pradesh, which included 4️⃣ sixes 👌🏻
Watch the left-handed batter’s knock here 🎥🔽https://t.co/yJI3EeDAb1#MPvRAJ #SyedMushtaqAliT20 pic.twitter.com/rnLnu3fM6f
— BCCI Domestic (@BCCIdomestic) October 11, 2022
