IPL వేలంపై రాబిన్ ఉతప్ప అసహనం!

టీమిండియా వెటరన్‌ ఆటగాడు రాబిన్‌ ఊతప్ప ఐపీఎల్‌ వేలంపై షాకింగ్‌ కామెంట్స్‌ చేశాడు. ఐపీఎల్ వేలం జ‌రిగే తీరు బాగోలేద‌ని, అది చూసిన‌ప్పుడు సంత‌లో ప‌శువుల వేలాన్ని చూసిన ఫీలింగ్ క‌లుగుతుంద‌ని ఆవేదన వ్యక్తం చేశాడు. ఫ్రాంచైజీలు ఆట‌గాళ్ల కోసం పోటీప‌డుతుంటే.. ఏదో వస్తువు కోసం పోటీ ప‌డుతున్న దారుణ‌మైన ఫీలింగ్ క‌లుగుతుంద‌ని, వేలం సమ‌యంలో ఆట‌గాళ్లు కూడా మ‌నుషులేన‌న్న విష‌యాన్ని ఫ్రాంచైజీలు మ‌రిచిపోయి ప్ర‌వ‌ర్తిస్తాయ‌ని వాపోయాడు.

వేలంలో‘అమ్ముడుపోని ఆటగాళ్ల మాన‌సిక పరిస్థితి ఎంత‌ దారుణంగా ఉంటుందో ఎవ‌రూ ఊహించలేరని, అది వ‌ర్ణించ‌లేని బాధ‌ క‌లిగిస్తుంద‌ని అన్నాడు. ఆట‌గాళ్ల కోసం వేలం భార‌త్‌లో మాత్రమే జరుగుతుందని, మున్ముందు ఈ ప్ర‌క్రియ‌కు స్వ‌స్థి ప‌లికితే బాగుంటుంద‌ని, అందరికీ మేలు జరిగేలా ముసాయిదా విధానం అమ‌లులోకి వ‌స్తే చాలా గౌరవప్రదంగా ఉంటుందని అభిప్రాయ‌ప‌డ్డాడు. కాగా, ఐపీఎల్ 2022 మెగా వేలంలో రాబిన్ ఉతప్పను చెన్నై సూపర్ కింగ్స్ రూ. 2 కోట్ల బేస్ ధరకు కొనుగోలు చేసింది. మరి ఊతప్ప వ్యాఖ్యలపై మీ అభిప్రాయాలను కామెంట్ల రూపంలో తెలియజేయండి.