follow us:
దక్షిణాఫ్రికా మాజీ ఆటగాడు ఏబీ డివిలియర్స్ రిటైర్మెంట్ ప్రకటించడం ప్రపంచ క్రికెట్ ని ఆశ్చర్యానికి గురి చేసింది. తాను క్రికెట్ నుంచి తప్పుకోవడానికి వ్యక్తిగత కారణాలు అని డివిలియర్స్ అప్పట్లో చెప్పుకొచ్చినా.. తాజాగా అసలు నిజాలను తెలియజేశాడు.
“ఏబీ డివిలియర్స్” ప్రపంచ క్రికెట్ లో ఈ పేరొక సంచలనం. ఫార్మాట్ ఏదైనా బరిలోకి దిగాడంటే ప్రత్యర్థికి చుక్కలే. నిలకడగా రాణించే బ్యాటర్లని చాలా మంది చూసి ఉంటారు. కానీ ఓ వైపు స్ట్రైక్ రేట్ తగ్గకుండా అదే సమయంలో నిలకడగా పరుగులు చేయడం ఏబీ డివిలియర్స్ కే చెల్లింది. ఇప్పుడంటే ప్రతి క్రికెటర్ ఇన్నోవేటివ్ షాట్స్ ఆడేందుకు ట్రై చేస్తున్నారు గాని ఒకప్పుడు ఇలాంటి తరహా షాట్స్ డివిలియర్స్ మాత్రమే సాధ్యం. గ్రౌండ్ లో నలువైపులా షాట్స్ ఆడుతూ ఆడియన్స్ కి మంచి కిక్ ఇచ్చేవాడు. ఈ కారణంగానే ఈ విధ్వంసకర వీరుడికి మిస్టర్ 360 అనే ట్యాగ్ వచ్చింది. అయితే అత్యున్నత ఫామ్ లో కొనసాగుతున్నప్పుడే డివిలియర్స్ రిటైర్మెంట్ ప్రకటించడం ప్రపంచ క్రికెట్ ని ఆశ్చర్యానికి గురి చేసింది.
అతనికి వయసు అయిపోలేదు. ఫిట్ నెస్ సమస్యలు లేవు. పైగా కెరీర్ పీక్ స్టేజ్ లో ఉంది. ఈ సమయంలో ఈ ఆటగాడి మీద దక్షిణాఫ్రికా క్రికెట్ జట్టు 2019 వరల్డ్ కప్ సమయంలో భారీగానే ఆశలు పెట్టుకుంది. అయితే అనూహ్యంగా 2019 వన్డే వరల్డ్ కప్ కోసం టీమ్‌ని సిద్ధం చేస్తున్న సమయంలో రిటైర్మెంట్ ప్రకటించి బిగ్ షాక్ ఇచ్చాడు. ఏబీడీ రిటైర్మెంట్ షాక్ నుంచి కోలుకోవడానికి సౌతాఫ్రికాకి చాలా సమయం పట్టింది. డివిలియర్స్ ఇంత తొందరగా క్రికెట్ నుంచి తప్పుకోవడం అభిమానులు జీర్ణించుకోలేకపోయారు. వీటికి వ్యక్తిగత కారణాలు అని డివిలియర్స్ అప్పట్లో చెప్పుకొచ్చినా.. తాజాగా అసలు నిజాలను తెలియజేశాడు.
తాజాగా రాబిన్ ఊతప్ప హోస్ట్ చేసిన ‘హోమ్ ఆఫ్ హీరోస్’ కార్యక్రమంలో తన రిటైర్మెంట్ గురించి డివిలియర్స్ ఈ విధంగా చెప్పుకొచ్చాడు. “నిజం చెప్పాలంటే బౌచర్, స్మిత్, కలీస్ వంటి ప్లేయర్లు రిటైర్ అయిపోయాక టీమ్‌లో నాకు బెస్ట్ ఫ్రెండ్స్ లేకుండా పోయారు. ఆ సమయంలో సౌతాఫ్రికా క్రికెట్ టీమ్‌ వాతావరణం నాకు సెట్ అవ్వలేదు. ఏదో మిస్ అయిన ఫీలింగ్ కలిగింది. అప్పటి జట్టులో నాకన్నా అందరూ జూనియర్లే ఉండడంతో జట్టుని ముందుండి నడిపే బాధ్యత నా మీదే పడింది. కొన్ని రోజు ఈ మూమెంట్స్ ఎంజాయ్ చేసినా.. ఎక్కువ కాలం ఉండలేకపోయాను. కనీసం 4-5 క్లోజ్ ఫ్రెండ్స్ అయినా లేకపోతే జట్టును నడిపించడం చాలా కష్టం. నాకూ అదే సమస్యగా మారింది. దీంతో క్రికెట్ నుంచి తప్పుకున్నాను. అని తన మనసులో మాట చెప్పుకొచ్చాడు.
సౌతాఫ్రికా క్రికెట్ టీమ్‌కి కెప్టెన్‌గా కూడా వ్యవహరించిన ఏబీ డివిల్లియర్స్, 228 వన్డేలు, 114 టెస్టులు,78 టీ20 మ్యాచులు ఆడాడు. వన్డేల్లో 9577 పరుగులు చేసిన డివిలియర్స్ 10000 క్లబ్ లో చేరకుండానే గుడ్ బై చెప్పాడు. ఇక టెస్టుల్లో కూడా 8765 పరుగులు చేసి అన్ని ఫార్మాట్ లో ఆడగలనని నిరూపించాడు. ఇక టీ 20 క్రికెట్ గురించి ప్రత్యేకంగా చెప్పనవసరం లేదు. 1672 అంతర్జాతీయ పరుగులతో పాటు ఐపీఎల్ లో 5 వేలకు పైగా పరుగులు చేసాడు. విరాట్ కోహ్లీ కెప్టెన్సీలో ఆఖరిగా 2021 సీజన్ ఆడిన ఏబీ డివిల్లియర్స్, ప్రస్తుతం ఆర్‌సీబీకి కోచింగ్ స్టాఫ్‌లో బాధ్యతలు నిర్వర్తిస్తున్నాడు. మొత్తానికి డివిలియర్స్ రిటైర్మెంట్ కి చెప్పిన కారణం మీకేవిధంగా అనిపించిందో కామెంట్ల రూపంలో తెలపండి.
