ఆస్కార్ వేడుకల్లో ఎగిరి గంతులేసిన రాజమౌళి.. వీడియో వైరల్

విశ్వవేదికపై తెలుగు సినిమా సత్తాను సువర్ణాక్షరాలతో లిఖించిన చిత్రం ఆర్ఆర్ఆర్. కేవలం తెలుగు సినిమా రంగమే కాకుండా యావత్ భారతావని గర్వించదగిన రోజు. ఆర్ఆర్ఆర్ సినిమాలోని నాటు నాటు పాటకు బెస్ట్ ఒరిజనల్ సాంగ్ కేటగిరీలో ఆస్కార్ లభించిందని ఎన్సౌన్స్ చేయగానే డాల్బీ ధియేటర్ దద్దరిల్లీ పోయింది. అరుపులు, కేకలు, చప్పట్లతో మారుమోగిపోయింది. ఆస్కార్ ప్రకటించగానే ఆనంద ఢోలిక్లలో మునిగి తేలింది చిత్ర బృందం. స్టేడియం మొత్తం స్టాండింగ్ ఓవియేషన్ ఇచ్చింది. ఇంతటి ఘన కీర్తికి కారణం జక్కన్న. ఈ సినిమాను ఆస్కార్ తీసుకెళ్లిన ఘనత ఆయనకే దక్కుతుంది.

ఆస్కార్ అవార్డు రావడం మామూలు విషయం కాదూ. 95 ఏళ్ల ఆస్కార్ చరిత్రలో తొలిసారిగా ఓ భారతీయ చిత్రానికి, అందులోనూ ఓ తెలుగు పాటకు అవార్డు దక్కడం గర్వించదగ్గ విషయం. ఈ సంతోషానికి అవధుల్లేవు. ప్రతి భారతీయుడు కళ్లల్లో ఆనందం కొట్టొచ్చినట్లు కనిపిస్తోంది. ఈ సినిమాను తెరకెక్కించడంలో కాదూ.. ఆస్కార్ వరకు తీసుకెళ్లేందుకు ఎంతో కష్టపడ్డారు రాజమౌళి. ఆస్కార్ బరిలో అధికారిక ఎంట్రీ సాధించకపోయినా.. తన ప్రయత్నాలను ఆపలేదు జక్కన్న. నామినేట్ కాకపోవడంతో ఓపెన్ కేటగిరిలో ఆస్కార్‌కు పంపారు. పరిశీలించిన ఆస్కార్ బృందం.. బెస్ట్ ఒరిజనల్ సాంగ్ కేటగిరికీ నాటు నాటు పాట షార్ట్ లిస్ట్ చేసింది.

దీంతో ఆస్కార్ పై అభిమానుల ఆశలు సజీవం అయ్యాయి. అంతలోనే గోల్డెన్ గ్లోబ్ అవార్డు రావడంతో ప్రతిష్టాత్మక ఆస్కార్ అవార్డు వస్తుందని భావించారు. ఒరిజినల్‌ సాంగ్‌ విభాగంలో ఆర్‌ఆర్‌ఆర్‌ సినిమాలోని నాటునాటు పాటకు ఆస్కార్‌ అవార్డు లభించిందని ప్రకటించగానే టీమ్ మొత్తం సంతోషంతో ఉప్పొంగిపోయింది. ఈ కార్యక్రమానికి దర్శకుడు రాజమౌళి కుటుంబంతో కలిసి హాజరయ్యారు. అవార్డును ప్రకటించగానే ఆయన భావోద్వేగానికి గురయ్యారు. భార్య రమాను ఆలింగం చేసుకున్నారు. కుటుంబ సభ్యులతో కలిసి ఎగిరి గంతులేశారు. కుమారుడు కార్తికేయ, కోడలు తదితరులతో కలిసి కేరింతలుకొట్టారు. ప్రస్తుతం ఈ వీడియో నెట్టింట్లో వైరల్‌గా మారింది. ఈ కార్యక్రమంలో రామ్ చరణ్, ఎన్టీఆర్ లు పాల్గొని తమ ఆనందాన్ని వ్యక్త పరిచారు.

S.S.Rajamouli Reaction After Winning the Oscar Award For #NaatuNaatu 🔥#OscarForNaatuNaatu #RRRMovie #Tollywood #SumanTVpic.twitter.com/tasoKZPQq0

— SumanTV (@SumanTvOfficial) March 13, 2023