ఆన్ లైన్ లో బ్రెడ్ ఆర్డర్ చేస్తే.. ఎలుకొచ్చిందీ

ఈ కామర్స్ సంస్థల పుణ్యమానీ ఖరీదైన దుస్తుల నుండి ఇంటి సరుకుల వరకు అన్ని ఇంటి వద్దకు వచ్చేస్తున్నాయి. అయితే వీటికి కొంత సమయం పడుతుంది. ఇప్పుడు నిమిషాల వ్యవధిలో మనకు సరుకులు ఇంటికి తెచ్చేందుకు బ్లింకిట్, స్విగ్గీ, ఇన్ స్టా మార్ట్, జెప్టో వంటి యాప్స్ వచ్చేశాయి. దీంతో చిన్న వస్తువుల కోసం మనం షాపులకు వెళ్లాల్సిన పని లేకుండా.. ఈ యాప్‌లో కోరితే చాలు మన గడప వద్దకు చేరుకుంటున్నాయి. బయట ధరలకే వస్తువులు దొరుకుతుండటంతో సమయం, శ్రమ ఆదా అవుతున్నాయి. అయితే ఈ సర్వీసులతో ప్రయోజనాలకే కాక చిక్కులు ఎదురౌతున్నాయి.

నాణ్యత లేని వస్తువులు రావడం, ఆర్డర్లు మారిపోవడం, చెప్పిన వస్తువులు కాకుండా మరోటి రావడం, కొన్ని రాకపోవడం, లేదా పాడైపోవడం జరుగుతున్నాయి. దీంతో కస్టమర్లు బెంబేలెత్తుతున్నారు. అటువంటి ఘటనే నితిన్ అరోరా అనే వ్యక్తికి ఎదురైంది. బ్రెడ్ కోసమని ఆయన బ్లింకిట్ లో ఆర్డర్ చేశాడు. ఆర్డర్ వచ్చాక చూస్తే బ్రెడ్ ప్యాకెట్ లో బ్రతికున్న ఎలుక కనిపించింది. తనకు ఎదురైన జుగుప్పాకరమైన అనుభవాన్ని నితిన్ తన ట్విట్టర్ ఖాతా ద్వారా వెల్లడించారు. ‘లెట్స్ బ్లింకిట్‌లో అత్యంత చేదు అనుభవాన్ని ఎదుర్కొన్నాను. ఈ నెల 1వ తేదీన నేను బ్రెడ్ ప్యాకెట్ ఆర్డర్ చేయగా.. అందులో బతికున్నఎలుక కనిపించింది. ఇది మనందరికీ ఓ గుణపాఠం లాంటిది. 10 నిమిషాల్లోనే డెలివరీ అనిచూపించి, కొన్ని గంటలు వేచి చూసినందుకు నాకు ఇలాంటి వస్తువు లభించింది’అని పేర్కొన్నారు.

తక్కువ సమయంలో వస్తున్నాయని అనుకుంటే.. ఇలా నాణ్యత లేనివి అంటగట్టడం దారుణమని అన్నారు. నితిన్ పోస్టులో ఎలుకతో ఉన్న బ్రెడ్ ప్యాకెట్ తో పాటు బ్లింకిట్ కస్టమర్ సర్వీస్ స్క్రీన్ షాట్ ను కూడా పంచుకున్నారు. ఈ పోస్టు వైరల్ కావడంతో నెటిజన్లు తిట్టిపోస్తున్నారు. తమకు ఇలాంటి అనుభవాలు ఎదురైనట్లు పలువురు కామెంట్స్ చేస్తున్నారు. అయితే ఈ విషయాన్ని ఆయన బ్లింకిల్ కస్టమర్ సపోర్ట్ కు పంపించగా.. చింతిస్తున్నామని సమాధానం చెప్పింది. మీకు ఇటువంటి అసౌకర్యం కలిగిందనుందుకు క్షమాపణలు తెలుపుతూ..ఈ సమస్యను పరిష్కరిస్తామని తెలిపింది. మీరెప్పుడైనా ఇటువంటి  చేదు అనుభవాలను ఎదుర్కొన్నట్లయితే కామెంట్ల రూపంలో తెలియజేయండి.

Most unpleasant experience with @letsblinkit , where alive rat was delivered inside the bread packet ordered on 1.2.23. This is alarming for all of us. If 10 minutes delivery has such baggage, @blinkitcares I would rather wait for a few hours than take such items.#blinkit #zomato pic.twitter.com/RHNOj6tswA

— Nitin Arora (@NitinA14261863) February 3, 2023