1964 లో “అంబాసిడర్” కార్ ధర ఇంత తక్కువా? వైరల్ అవుతున్న బిల్!

కార్లంటే క్రేజ్ ఏర్పడిందీ అంబాసిడర్‌తోనే. గతంలో మన రాజకీయ నేతలు, ఆనాటి హీరోలు ఎక్కువగా వాడుతూ ఉండేవారు. ఒక ఇంట్లో ఈ కారు ఉందంటే ఎంతో గొప్పగా చూసేవారు. అంబాసిడర్ కారు కొన్నారంటే..వారిని ధనవంతులుగా చూసేవారు. ఎన్ని కార్లు వచ్చినా అంబాసిడర్ కారుకు ఉండే రేంజే వేరు. 1990 దశకం వరకు వీటిల్దే హవా. అయినప్పటికీ అప్పటికీ, ఇప్పటికీ ఈ అంబాసిడర్ కార్లంటే కొంత మందికి మోజు ఉంటుంది. ఇప్పటికీ కొంత మంది వీటిని వినియోగించేందుకు ఇష్టపడుతుంటారు. ఈ కారును హిందూస్థాన్ మోటార్స్ 1957లో విడుదల చేసింది. ఇది బ్రిటిష్ కారు ఆధారంగా రూపొందించబడింది. అయితే మారుతీ సుజుకీ వచ్చిన తర్వాత దాని ఆదరణ తగ్గింది.

వాటి కొనుగోలు తగ్గిపోవడంతో 2014లో హిందూస్థాన్ మోటార్స్ వీటి ఉత్పత్తిని నిలిపివేసింది. ఆ సమయంలో ఆ కారు ధర నాలుగు లక్షల పై చిలుకు ఉండేది. వీటిని నిలిపేసినా.. ఈ కారు ప్రయాణం అంటే ఇష్టపడుతుంటారు ఆ తరం వారు. అయితే వీటిపై ఇష్టం ఉన్న తాతలు, తండ్రుల కాలం నాటి వారు ఇప్పటికీ వాటినే రిపేర్లు చేసుకుంటూ వాడేస్తుంటారు. ఇప్పుడంటే.. ఈధర పలికిందీ. మరీ వచ్చిన తొలి నాళ్లలో దీని ధర ఎంత ఉంటుందో ఊహించగలమా..చెప్పలేం కదా. అయితే తాజాగా 1964 నాటి అంబాసిడర్ కార్ ఇన్వాయిస్ ఒకటి నెట్టింట వైరల్ గా మారింది. అందులో దాని ధర 16 ,495 రూపాయలుగా ఉంది. 1964 లో మద్రాసులోని గుప్తాస్ స్టేట్స్ హోటల్‌కి ఈ కార్ కొనుగోలు చేసినట్లు వైరల్ అవుతున్న ఆ ఇన్వాయిస్ లో ఉంది. రిలయన్స్ మోటార్ కార్పొరేషన్ ప్రైవేట్ లిమిటెడ్ జారీ చేసినట్లు కనిపిస్తోంది.

పశ్చిమ బెంగాల్ నుంచి ఈ కార్ మద్రాస్‌కి రైలులు డెలివరీ చేసినట్లుగా అందులో ఉంది. అంబాసిడర్ కారు అసలు ధర 13 , 787.13 రూపాయలు కాగా.. సర్ ఛార్జ్ 255 రూపాయలు, రవాణా ఖర్చులు 897 రూపాయలు, మద్రాస్ జనరల్ సేల్స్ టాక్స్ 1 ,493.98 రూపాయలు, రిజిస్ట్రేషన్‌కి 54 రూపాయలు, నెంబర్ ప్లేట్ రాయడానికి 7.50 రూపాయలు అయినట్టు ఆ అందులో పేర్కొనబడి ఉంది. మొత్తంగా రూ. 16 ,495.29 అయింది. ప్రస్తుతం ఈ ఇన్ వాయిస్ వైరల్ గా మారింది. అప్పట్లో ఆ కారు అంత ధర ఉండేదా అని ఆశ్చర్యపోతున్నారు. దీన్ని చూసిన ఓ నెటిజన్ 1972లో మా నాన్న అంబాసిడర్ కారును రూ. 18000కి కొన్నారు అని రాశారు. కొంత మంది ఆ కారుతో తమకున్న అనుబంధాన్ని గుర్తు చేసుకుంటున్నారు. మీకు అంబాసిడర్ కారుతో ఎటువంటి అనుబంధముందో కామెంట్ల రూపంలో తెలియజేయండి.