ఎవరీ టైగర్ నాగేశ్వరరావు? రెండు బయోపిక్ లు తీస్తున్నారంటే..

టాలీవుడ్‌ లో ప్రస్తుతం ఒక బయోపిక్‌ గురించి బాగా చర్చ నడుస్తోంది. ఒక వ్యక్తి గురించి ఎందుకు ఇలా పోటీ పడి మరి సినిమాలు తీస్తున్నారు అని ఆశ్చర్యపోతున్నారు. అది కూడా ఏ స్వాతంత్ర్య సమరయోధుడి కధ కాదు.. ఒక స్టవర్టుపురం దొంగ గురించి. మాస్‌ మహారాజ రవితేజ ‘టైగర్‌ నాగేశ్వరరావు’, బెల్లంకొండ శ్రీనివాస్‌ ‘స్టువర్టుపురం దొంగ’గా పోటీ పడి సినిమాలు తీస్తున్నారు. దొంగ అయితే ఎందుకు అతనికి అంత క్రేజ్? బయోపిక్‌ లు కూడా తీసేంతలా నాగేశ్వరరావు కాదు.. టైగర్‌ నాగేశ్వరరావు ఏం సాధించాడు? వంటి ఆసక్తికర విషయాలు మీకోసం.

స్టువర్టుపురం ఎలా పుట్టింది?

1913లో ఎరుకుల కులస్థులను క్రిమినల్సుగా ముద్రవేసి.. జైలుకు బదులుగా వారందరిని ఒక కాలనీగా ఏర్పాటు చేశారు. అదే స్టువర్టుపురం అయ్యింది. గుంటూరు జిల్లా బాపట్లకు 15 కిలోమీటర్ల దూరంలో ఉంటుంది ఈ స్టువర్టుపురం. ఇది ప్రకాశం జిల్లాతోనూ సరిహద్దును పంచుకుంటుంది. అటు గుంటూరు జిల్లా ఇటు ప్రకాశం జిల్లాలకు చెందిందిగా కూడా చెప్పుకుంటుంటారు. ఇప్పుడంటే వ్యవసాయం, చేతి వృత్తులు, ఉద్యోగాలు ఉన్నాయి. ఆ రోజుల్లో వారికి చేసేందుకు పని ఉండేది కాదు.. కుటుంబాన్ని పోషించాలన్నా, నాలుగు మెతుకులు నోట్లోకి వెళ్లాలన్నా వారికి ఉన్న దారి దొంగతనం. మొదట్లో వీళ్లను బలవంతంగా ఈ వృత్తిలోకి దించారని అంటారు. ఆ తర్వాత పోషణ కోసం తప్పక ఆ దారి పట్టారని చెప్తుంటారు. వాళ్లు ఆ వృత్తిని వదిలేశారు కానీ, ఇప్పటికీ అది మాత్రం వాళ్లను వదలట్లేదు. స్టువర్టుపురం అనగానే అబ్బో దొంగలురా అనే తరహా పరిస్థితులు వాళ్లకు తారస పడుతూనే ఉంటాయి. వారి పిల్లలు చదువుకుంటున్నారు. వాళ్లు వ్యవసాయం చేస్తున్నారు. ఉద్యోగాలు చేస్తున్నారు. హుందాగా బ్రతుకుతున్నారు.

టైగర్‌ నాగేశ్వరరావు ఎవరు?

స్టువర్టుపురం దొంగల ముఠాలో నాగేశ్వరరావు ఒకడు. అతని తెగువ, ధైర్యానికి టైగర్‌ అని బిరుదు కూడా వచ్చింది. అతను అందరి దొంగల్లా కాదు.. ఇంగ్లీష్‌ కథల్లో ఉండే రాబిన్‌ హుడ్‌ తరహా దొంగ అనమాట. అంటే ఉన్నవాళ్ల జేబు కొట్టి.. లేనివాళ్ల కడుపు నింపే రకం దొంగ. స్టువర్టుపురంలో పుట్టి పెరగడం వల్ల అతనికి చదువుకునే అవకాశం దక్కలేదు. అందువల్ల కూడా కావచ్చు అతను దోచుకున్న సొమ్ముతో ఎంతో మందిని చదివించాడని కూడా చెప్పుకుంటారు. అతను అందరిలాంటి దొంగ కాదు. ఒకానొక సమంయలో మద్రాసు జైలు నుంచి కూడా తప్పించుకున్నాడు. అతడిని పట్టుకోవడం అంత సామాన్యం కాదు. చిక్కినట్టే చిక్కి జారుకోవడం అతనికి వెన్నతో పెట్టిన విద్య. 1970ల సమయంలో పోలీసులను ఒక ఆట ఆడుకున్నాడు. టైగర్‌ నాగేశ్వరరావు పేరు వినగానే కంగారు పడేంతలా ముప్పతిప్పలు పెట్టాడు. ఎందరికో అలా కడుపు నింపడం, చదువు చెప్పించడం వల్లే అతడిని ఇప్పటికీ ఆ ప్రాంతంలో గుర్తుచేసుకుంటారని చెప్తుంటారు. తెగింపు, ధైర్యం, దానం, నేర్పు, సాహసానికి టైగర్‌ నాగేశ్వరరావు సరైన ఉదాహరణ అని స్థానికులు చెప్తుంటారు.

పేరుకు దొంగ అయిన టైగర్‌ నాగేశ్వరరావు గురించి పోటీపడి బయోపిక్లు తీయడానికి అసలు కారణం అదే. ఒక సందర్భంలో ‘టైగర్‌ నాగేశ్వరరావు అందరికీ దొంగగానే తెలుసు.. ఆయన గురించి తెలియని కోణాలు ఎన్నో ఉన్నాయి. వాటిని వెలుగులోకి తెచ్చేందుకే ఈ సినిమా’ అంటూ డైరెక్టర్‌ వంశీ ప్రస్తావించాడు. మరి ఏ డైరెక్టర్‌ ఏ కోణంలో సినిమా తీస్తున్నారన్న విషయంపై క్లారిటీ రావాలంటే ఇంకొంతకాలం ఆగాల్సిందే. టైగర్‌ నాగేశ్వరరావుపై మీ అభిప్రాయాలను కామెంట్‌ చేయండి.

#TigerNageswaraRao pic.twitter.com/jWUKmM5iEq

— Ravi Teja (@RaviTeja_offl) November 3, 2021

Wishing you all a very Happy Diwaliiii! 🙂 here’s the first look of my next #bss10 ! pic.twitter.com/30EXTHVCbH

— Bellamkonda Sreenivas (@BSaiSreenivas) November 4, 2021

#bss10 #StuartpuramDonga pic.twitter.com/50Ns6deBwy

— Bellamkonda Sreenivas (@BSaiSreenivas) November 5, 2021