మంచి మనసు చాటుకున్న విజయ్‌ సేతుపతి!

కోలీవుడ్‌ నటుడైన విజయ్‌ సేతుపతికి టాలీవుడ్‌లోను మంచి ఫాలోయింగ్ ఉంది. హీరోగానే కాకుండా.. విలన్ గా కూడా నటిస్తూ మంచి నటుడిగా గుర్తింపు తెచ్చుకున్నాడు. అయితే ఈయనలో మరో గుణం కూడా ఉంది. అదే సేవా భావం. ఆపదలో ఉన్న వారికి ఆపన్న హస్తం అందించడంలో విజయ్‌ సేతుపతి ఎల్లప్పుడూ ముందుంటారు. తాజాగా ఇది మరోసారి నిరూపితమైంది. పాండిచ్చేరి వేదికగా ఓ స్వచ్ఛంద సంస్థను నిర్వహిస్తోన్న వీరరాఘవన్‌.. ఇటీవల విజయ్‌ సేతుపతి గురించి కొన్ని ఆసక్తికర వ్యాఖ్యలు చేశారు. విజయ్‌ సేతుపతి సహాయ సహకారాలతోనే తాను లక్షమందికి ఉద్యోగ, ఉపాధి అవకాశాలు కల్పించానని చెప్పుకొచ్చాడు.

“నేను 2016 నుంచి సామాజిక సేవా కార్యక్రమాలు నిర్వహిస్తున్నాను. ఇందులో భాగంగా నిరుద్యోగులకు ఉద్యోగావకాశాలు కల్పిస్తుంటాను. 2019లో సన్‌ టీవీ నిర్వహిస్తున్న ‘నమ్మ ఊరు’ హీరో కార్యక్రమంలో ఆ ప్రోగ్రాం వ్యాఖ్యాత, నటుడు విజయ్‌ సేతుపతిని కలుసుకునే అవకాశం కలిగిందన్నారు. ఆ తరువాత ఆయనే తనతో పాండిచ్చేరిలో ఒక కార్యాలయాన్ని ఏర్పాటు చేయించారన్నారు.. విజయ్ గారు అందించిన సహాయ సహకారాలతోనే ఇప్పటి వరకు పాండిచ్చేరి, తమిళనాడుకు చెందిన సుమారు లక్షకు పైగా నిరుద్యోగులకు ఉద్యోగ అవకాశాలు కల్పించాను. అయితే ఎక్కడా తాను చేసిన సాయం గురించి సేతుపతి చెప్పుకోలేదు’ అని వీరరాఘవన్‌ చెప్పుకొచ్చారు. కాగా ఈ విషయం తెలుసుకున్న అభిమానులు విజయ్‌ సేతుపతిపై ప్రశంసల వర్షం కురిపిస్తున్నారు.

ఇది కూడా చదవండి: ఈ కుర్రాడు..స్టూడెంట్ నం.1.. జైల్లో ఉంటూనే టాప్ ర్యాంక్!

ఇక సినిమాల విషయానికొస్తే.. తెలుగులో విజయ్‌ సేతుపతి నటించిన ‘ఉప్పెన’ సినిమా మంచి విజయాన్ని అందుకుంది. తమిళ చిత్రం.. ‘కాతువాకుల రెండు కాదల్‌’ త్వరలోనే ప్రేక్షకుల ముందుకు రానుంది. సమంత, నయనతార హీరోయిన్లుగా నటిస్తున్నారు. దీంతో పాటు కమల్‌ హాసన్‌ విక్రమ్‌, కత్రినాతో మేరీ క్రిస్ట్‌మస్‌ తదితర సినిమాల్లోనూ నటిస్తున్నాడు.