follow us:
సినీ రంగంలో సక్సెస్ రేటు చాలా తక్కువ. కోట్లు వెచ్చించి, వేలాది మంది రాత్రింబవళ్లు అహర్నిషలు శ్రమించి తీసిన సినిమా విజయం సాధిస్తుందని కచ్చితంగా చెప్పలేం. ఇక్కడ ఎవరు ఎంతగా కష్టపడినా.. పిసరంత అదృష్టం ఉంటేనే రాణించగలరు. అందుకే హీరో, హీరోయిన్ల దగ్గర నుంచి దర్శక, నిర్మాతల వరకు చాలా మంది జాతకాలు, న్యూమరాలజీ లాంటివి నమ్ముతుంటారు. ఓ సినిమాకు కొబ్బరికాయ కొట్టినప్పటి నుంచి గుమ్మడికాయ కొట్టేంత వరకు.. షూటింగ్ ముహూర్తం దగ్గర నుంచి రిలీజ్ డేట్ ప్రకటించేంత వరకు ఎన్నో విషయాల్లో వీటిని అనుసరిస్తుంటారు. అయితే ఎవరేది చేసినా, ఎన్ని పాటించినా అది సక్సెస్ కోసమనేది గ్రహించాలి.
ఇక, టాలీవుడ్ స్టార్ హీరోయిన్ సమంత కూడా న్యూమరాలజీని నమ్ముతున్నట్లుగా కనిపిస్తోంది. ఈమధ్య కాలంలో చూసుకుంటే వ్యక్తిగత జీవితంలో సామ్ పలు ఒడిదొడుకులు ఎదుర్కొన్నారు. అయితే గోడకు కొట్టిన బంతిలా ఆమె అంతే బలంగా దూసుకొచ్చారు. ’ఫ్యామిలీ మ్యాన్ 2‘ సిరీస్ విజయంతో ఊపు మీదున్న సమంత.. గతేడాది ’యశోద‘ చిత్రంలో మరో సక్సెస్‌ను తన ఖాతాలో వేసుకున్నారు. మయోసైటిస్ వ్యాధితో బాధపడుతున్నా ’యశోద‘ షూటింగ్‌లో పాల్గొన్న సమంత.. చికిత్స తీసుకుంటూనే ఆ మూవీకి డబ్బింగ్ పూర్తి చేశారు. శరీరం సహకరించకున్నా ప్రమోషన్స్‌లో కూడా పాల్గొన్నారు. మొత్తానికి ఆ సినిమా విజయవంతం కావడంతో ఆమె సంతోషంలో మునిగిపోయారు.
మయోసైటిస్ నుంచి కోలుకున్నట్లేనా..?
’శాకుంతలం‘ చిత్రంతో మరోమారు ప్రేక్షకులను పలకరించేందుకు సిద్ధమవుతున్నారు సమంత. ఈ రోజు ఈ మూవీ ట్రైలర్ రిలీజైంది. దీనికి ఆడియెన్స్ నుంచి మంచి రెస్పాన్స్ లభిస్తోంది. ’శాకుంతలం‘ ట్రైలర్ రిలీజ్ ఈవెంట్‌లో సమంత పాల్గొన్నారు. చాన్నాళ్ల తర్వాత ఆమె మీడియా ముందుకు వచ్చారు. ఎన్ని బాధలు పడినా సరే.. సినిమాలపై ఉన్న ప్రేమను మాత్రం వదులుకోనని ఈ వేడుకలో మాట్లాడుతూ సమంత భావోద్వేగానికి లోనయ్యారు. ఎంతో ఓపిక తెచ్చుకుని ఈ కార్యక్రమానికి వచ్చానని ఆమె చెప్పారు. దీంతో మయోసైటిస్ నుంచి సామ్ పూర్తిగా కోలుకున్నారా అనే ప్రశ్న తలెత్తుతోంది.
అప్పుడు రంగురాళ్లతో.. ఇప్పుడు రుద్రాక్షతో!
’శాకుంతలం‘ ట్రైలర్ రిలీజ్ కార్యక్రమంలో సమంత చేతికి రుద్రాక్ష ధరించి కనిపించడం ప్రత్యేక ఆకర్షణగా నిలిచింది. ఈమధ్య ఎయిర్ పోర్ట్‌లో మీడియా కెమెరాలకు చిక్కిన ఫొటోల్లోనూ సామ్ చేతికి రుద్రాక్ష ఉండటం గమనార్హం. ’యశోద‘ మూవీ ప్రమోషన్స్ సమయంలో ఆమె చేతికి రంగురాళ్లు ధరించి కనిపించారు. ఇప్పుడేమో చేతిలో రుద్రాక్ష పట్టుకుని దర్శనమిచ్చారు. దీంతో సమంత జాతకాలను నమ్ముతున్నారని.. ఆధ్యాత్మికత వైపు ఆమె అడుగులేస్తున్నారని కొందరు అంటున్నారు. వ్యక్తిగత జీవితంలో వచ్చిన కష్టాలు, అనారోగ్యంతో పడుతున్న శారీరక, మానసిక వేదన నుంచి బయటపడేందుకే ఆమె ఈ మార్గాన్ని ఎంచుకున్నారేమోననే అనుమానాలు వస్తున్నాయి. దీనిపై స్వయంగా సామ్ క్లారిటీ ఇస్తే గానీ ఏదీ చెప్పలేం. ఇక తమ అభిమాన హీరోయిన్ త్వరగా కోలుకుని పూర్తి ఆరోగ్యంతో స్ట్రాంగ్‌గా కమ్‌బ్యాక్ ఇవ్వాలని సమంత ఫ్యాన్స్ కోరుకుంటున్నారు. మరి..సామ్ లో ఈ మార్పుపై మీ అభిప్రాయాలను కామెంట్స్ రూపంలో తెలియజేయండి.
Samantha is here…#Shakuntalam pic.twitter.com/8lfKhCXmeO
— MIRCHI9 (@Mirchi9) January 9, 2023
