ఆస్కార్​తో హైదరాబాద్​కు ‘ఆర్ఆర్ఆర్’ టీమ్.. జై హింద్​ అంటూ..!

‘ఆర్ఆర్ఆర్’ చిత్ర యూనిట్ అనుకున్నది సాధించింది. సినీ ప్రపంచంలో అత్యుత్తమ అవార్డుగా భావించే ఆస్కార్​ను అందిపుచ్చుకుంది. ఇటీవల అమెరికాలోని లాస్ ఏంజెల్స్​లో జరిగిన పురస్కారాల వేడుకలో మహామహుల సమక్షంలో ‘నాటు నాటు’ పాటకు ఎంఎం కీరవాణి, చంద్రబోస్ అకాడమీ అవార్డును అందుకున్నారు. ఈ ఆనందంలో మూవీ యూనిట్​కు యూఎస్​లో ఆస్కార్ పార్టీ ఇచ్చాడు దర్శకుడు ఎస్ఎస్ రాజమౌళి. రీసెంట్​గా జూనియర్ ఎన్టీఆర్ హైదరాబాద్​కు వచ్చేయగా.. తాజాగా ‘ఆర్ఆర్ఆర్’ మూవీ యూనిట్ విజయదరహాసంతో భాగ్యనగరానికి చేరుకుంది. శుక్రవారం తెల్లవారుజామున మూడు గంటలకు ఆస్కార్ పురస్కారంతో జక్కన్న, ఆయన సతీమణి రమ, కీరవాణి, కార్తికేయ, కాలభైరవ శంషాబాద్ విమానాశ్రయానికి చేరుకున్నారు. శంషాబాద్​ ఎయిర్​పోర్టులో ‘ఆర్ఆర్ఆర్’ చిత్ర యూనిట్​కు అభిమానులు ఘనస్వాగతం పలికారు.

‘ఆర్ఆర్ఆర్’ టీమ్​తో ఫొటోలు దిగేందుకు ఫ్యాన్స్ ఎగబడ్డారు. రాజమౌళిని అభిమానులు చుట్టేశారు. దీంతో ఎయిర్​పోర్ట్ ప్రాంగణం మొత్తం రద్దీగా మారింది. అయితే మీడియాతో మాట్లాడకుండా జైహింద్.. అంటూ అక్కడి నుంచి వెళ్లిపోయారు రాజమౌళి. ప్రస్తుతం దీనికి సంబంధించిన ఫొటోలు, వీడియోలు నెట్టింట వైరల్ అవుతున్నాయి. మరోవైపు హీరో రామ్ చరణ్ యూఎస్​ నుంచి శుక్రవారం స్వదేశానికి రానున్నారు. అయితే ఆయన నేరుగా హైదరాబాద్​కు రాకుండా దేశ రాజధాని న్యూఢిల్లీకి వెళ్లనున్నారు. ఈ రోజు సాయంత్రం వరకు ఆయన అక్కడే ఉండనున్నారు. ఉదయం ‘ఇండియా టుడే కాన్​క్లేవ్’లో గెస్ట్​గా చెర్రీ పాల్గొననున్నారు. సాయంత్రం ప్రధాని నరేంద్ర మోడీతో సమావేశం కానున్నారాయన. ఆ మీటింగ్ పూర్తయిన తర్వాత ఈ రోజు రాత్రికి చెర్రీ హైదరాబాద్​కు వచ్చే ఛాన్స్ ఉందని ఫ్యాన్స్ తెలిపారు. చరణ్​కు ఒక రేంజ్​లో గ్రాండ్ వెల్​కమ్ చెప్పేందుకు అభిమానులు ఏర్పాట్లు చేస్తున్నారు.

#JaiHind #RRR Movie Team Back in Hyderabad After Winning #Oscar award #Rajamouli #Keeravani #RamaRajamouli pic.twitter.com/OlUCWmowdO

— Filmy Focus (@FilmyFocus) March 17, 2023