follow us:
Vikram: విశ్వనటుడు కమల్ హాసన్ హీరోగా యువదర్శకుడు లోకేష్ కనగరాజ్ తెరకెక్కించిన లేటెస్ట్ బ్లాక్ బస్టర్ ‘విక్రమ్’. యాక్షన్ జానర్ లో భారీ అంచనాల మధ్య విడుదలైన ఈ సినిమా కోలీవుడ్ బాక్సాఫీస్ రికార్డులను షేక్ చేసింది. అంతేగాక బాక్సాఫీస్ వద్ద రూ. 400 కోట్లకు పైగా వసూల్ చేసి, కమల్ కెరీర్ లోనే ఆల్ టైమ్ బ్లాక్ బస్టర్ గా నిలవడం విశేషం. గత నెలలో విడుదలైన విక్రమ్ మూవీ.. ఇటీవలే ఓటిటి వేదికగా ప్రేక్షకుల ముందుకొచ్చింది.
ఇక చాలా గ్యాప్ తర్వాత.. కమల్ స్వయంగా నిర్మించి నటించిన ఈ సినిమా ఆయన ఎన్నడూ మర్చిపోలేని విజయాన్ని అందించిందనే చెప్పాలి. ఈ సినిమాలో కమల్ తో పాటు స్టార్ హీరోలు విజయ్ సేతుపతి, ఫహద్ ఫాజిల్, సూర్య కీలకపాత్రల్లో నటించి సినిమాను మరో స్థాయికి తీసుకెళ్లారు. అయితే.. తమిళం మాత్రమే కాకుండా పాన్ ఇండియా స్థాయిలో విక్రమ్.. తెలుగు, హిందీ, కన్నడ, మలయాళం భాషల్లో విడుదలై అన్ని భాషల్లో బ్రేక్ ఈవెన్ చేయడం మరో విశేషం.
ఇదిలా ఉండగా.. థియేటర్స్ లో మిస్ అయిన ప్రేక్షకులు ఎప్పుడెప్పుడు విక్రమ్ ఓటిటిలోకి వస్తుందా అని ఎదురుచూశారు. మొత్తానికి డిస్నీ హాట్ స్టార్ లో జూలై 8 నుండి విక్రమ్ అన్ని భాషలలో స్ట్రీమింగ్ మొదలైంది. ఈ క్రమంలో తాజాగా హాట్ స్టార్ లో విక్రమ్ మేకింగ్ వీడియోను రిలీజ్ చేశారు మేకర్స్. ఈ మేకింగ్ వీడియోలో కమల్, విజయ్ సేతుపతి, ఫహద్, సూర్య ఇలా ఇతర నటులతో దర్శకుడు లోకేష్ రాబట్టిన టేకింగ్ మనం చూడవచ్చు.
విక్రమ్ సక్సెస్ కి ప్రధాన కారణాలలో లోకేష్ కనగరాజ్ టేకింగ్ కూడా ఒకటి. అందరూ అద్భుతమైన నటనను కనబర్చినప్పటికీ, కెప్టెన్ ఆఫ్ ది షిప్ లోకేష్ కాబట్టి.. తెరవెనుక అతని కష్టాన్ని, విక్రమ్ టీమ్ కష్టాన్ని మనం ఈ మేకింగ్ వీడియోలో గమనించవచ్చు. ఇక త్వరలోనే విక్రమ్ కి సీక్వెల్ కూడా రాబోతుందనే విషయం విదితమే. ఈ నేపథ్యంలో విక్రమ్ మేకింగ్ వీడియో నెట్టింట వైరల్ అవుతోంది. మరి విక్రమ్ మేకింగ్ వీడియోపై మీ అభిప్రాయాలను కామెంట్స్ లో తెలియజేయండి.
