ఫ్యాన్స్​కు గుడ్​న్యూస్.. రీరిలీజ్​కు రెడీ అవుతున్న తారక్ మూవీ!

‘ఆర్ఆర్ఆర్’ సక్సెస్ జోష్​లో ఉన్న జూనియర్ ఎన్టీఆర్ త్వరలో కొత్త చిత్రం మొదలుపెట్టనున్నారు. జక్కన్న మూవీ తర్వాత తారక్​కు బాగానే గ్యాప్ వచ్చింది. ఆయనతో ‘ఆర్ఆర్ఆర్’లో కలసి నటించిన రామ్ చరణ్ వరుసగా ప్రాజెక్టులను చేసుకుంటూ పోతున్నాడు. చెర్రీతో శంకర్​ తీస్తున్న మూవీ షూటింగ్ సగానికి పైగా పూర్తయిందని తెలుస్తోంది. త్వరలో హాలీవుడ్ ఎంట్రీకి సంబంధించిన న్యూస్​ను కూడా చెబుతానని చరణ్ అంటున్నాడు. హాలీవుడ్ స్టూడియోలతో చర్చలు జరుగుతున్నాయని రివీల్ చేశాడు. మరోవైపు తారక్ మాత్రం లాంగ్ గ్యాప్ తీసుకున్నాడు. ఎట్టకేలకు కొరటాల శివ దర్శకత్వంలో తెరకెక్కబోయే ‘ఎన్టీఆర్ 30’ రెగ్యులర్ షూటింగ్ ఈ నెలలోనే మొదలుకానుంది.

ఇదిలాఉండగా.. టాలీవుడ్​లో రీరిలీజ్ ట్రెండ్ నడుస్తున్న సంగతి తెలిసిందే. స్టార్ హీరోల హిట్​ సినిమాలను మళ్లీ రిలీజ్ చేస్తున్నారు. పవన్ కల్యాణ్​ ‘ఖుషి’, ‘జల్సా’, మహేశ్ బాబు ‘పోకిరి’, వెంకటేశ్ ‘నారప్ప’, బాలకృష్ణ ‘చెన్నకేశవ రెడ్డి’ తదితర చిత్రాలు రీ–రిలీజ్ అయి అభిమానులకు మంచి థియేటర్ ఎక్స్​పీరియెన్స్ ఇచ్చాయి. ఈ క్రమంలో మరో స్టార్ హీరో మూవీ రీరిలీజ్ కాబోతోందని తెలుస్తోంది. అదే ‘ఆంధ్రావాలా’. డాషింగ్ డైరెక్టర్ పూరి జగన్నాథ్ దర్శకత్వంలో తెరకెక్కిన ఈ చిత్రంలో జూనియర్ ఎన్టీఆర్ నటనకు మంచి మార్కులు పడ్డాయి. ఈ సినిమాలో ‘నాయ్రే నాయ్రే’ పాటకు తారక్ వేసిన స్టెప్పులు అదుర్స్ అనే చెప్పాలి. ఈ ఫిల్మ్ ఆడియో లాంఛ్​కు అప్పట్లో 5 లక్షలకు పైగా జనాలు రావడం సంచలనం సృష్టించింది.

ఇప్పటివరకు జరిగిన ఆడియో ఫంక్షన్లు, ప్రీ రిలీజ్​ ఈవెంట్లు, సక్సెస్​ మీట్లు తదితరాల్లో అత్యధిక మంది ప్రేక్షకులు హాజరైన కార్యక్రమంగా ‘ఆంధ్రావాలా’ ఆడియో ఈవెంట్​ను చెబుతుంటారు. ‘సింహాద్రి’ లాంటి బ్లాక్ బస్టర్ చిత్రం ద్వారా రిలీజ్ కావడం, సక్సెస్​ఫుల్ డైరెక్టర్ పూరి జగన్నాథ్ తెరకెక్కించడంతో ‘ఆంధ్రావాలా’పై అభిమానుల్లో అంచనాలు ఆకాశాన్ని అంటాయి. కానీ సినిమా మాత్రం అందుకు తగ్గట్లుగా లేకపోవడంతో బాక్సాఫీస్ వద్ద పరాజయం తప్పలేదు. అయితే ఇందులో తారక్ యాక్టింగ్ మాత్రం అందర్నీ అలరించింది. ఈ నెలలోనే విడుదల కాబోతోందని చెబుతున్న ఈ మూవీ ఎలాంటి సంచలనాలు సృష్టిస్తుందో చూడాలి. మరి.. ‘ఆంధ్రావాలా’ను మళ్లీ థియేటర్లలో చూసేందుకు మీరు ఎంతగా ఎదురు చూస్తున్నారనేది కామెంట్ల రూపంలో తెలియజేయండి.

Young Tiger #NTR‘s & Dashing Director #PuriJagannath‘s #Andhrawala Re-Releasing this Month.. pic.twitter.com/q861Nylyjp

— Fukkard (@Fukkard) March 9, 2023