రోడ్డు ప్రమాదానికి గురైన హీరో శర్వానంద్.. ఆస్పత్రిలో చేరిక!

టాలీవుడ్ ప్రముఖ నటుడు హీరో శర్వానంద్ రోడ్డు ప్రమాదానికి గురయ్యారు. శనివారం రాత్రి హైదరాబాద్ లోని ఫిల్మ్ నగర్ జంక్షన్ వద్ద ఆయన కారు అదుపు తప్పి బోల్తా పడింది. ఈ ప్రమాదంలో శర్వానంద్ కు తెలికపాటి గాయాలైనట్లు సమాచారం. దీంతో వెంటనే స్పందించిన స్థానికులు.. శర్వానంద్ ను ఆస్పత్రికి తరలించారు. కాగా, ఈ విషయం తెలుసుకున్న ఆయన కుటుంబ సభ్యులు హుటాహుటిన ఆస్పత్రికి వెళ్లారు. ఏం జరిగిందంటూ వైద్యుడిని అడిగి పూర్తి వివరాలు తెలుసుకున్నారు.

ఆయన ఆరోగ్య పరిస్థితి బాగానే ఉందని, పెద్దగా ఖంగారు పడాల్సిన పని లేదని వైద్యులు తెలిపారు. ఆ తర్వాత శర్వానంద్ కుటుంబ సభ్యులు ప్రమాదానికి గురైన రేంజ్ రోవర్ కారును వారి ఇంటికి తీసుకెళ్లినట్లు తెలుస్తుంది. అయితే, కారులో సేఫ్టీ ఫీచర్స్ ఉండడం వల్ల తీవ్రమైన గాయాలు కాలేదని వైద్యులు తెలిపారు. ఈ విషయం తెలుసుకున్న టాలీవుడ్ ఏం జరిగిందంటూ ఆరా తీస్తున్నారు. హీరో శర్వానంద్ కు రోడ్డు ప్రమాదం అని తెలియడంతో ఆయన అభిమానులు ఆందోళనకు గురయ్యారు. వెంటనే కోలుకోవాలంటూ దేవుడిని ప్రార్థిస్తున్నారు.