సార్.. మా అమ్మను కాపాడండి! పోలీసులను ఆశ్రయించిన 12 ఏళ్ల బాలుడు!

సార్.. మా నాన్న మా అమ్మను కొడుతున్నాడు. మద్యం తాగి వచ్చి రోజూ అదే పనిగా బెల్టుతో కొడుతూ ఉంటాడు. దయచేసి మా ఇంటికి వచ్చి మా అమ్మను కాపాడండి.. అంటూ ఓ 12 ఏళ్ల పిల్లాడు పోలీసులను వేడుకున్నాడు. తన తండ్రి నుంచి తల్లిని కాపాడుకునేందుకు ఆ పిల్లాడు చేసిన పనిని చూసి స్థానికులు మెచ్చుకుంటున్నారు. తాజాగా ఉత్తర్ ప్రదేశ్ లో చోటు చేసుకున్న ఈ ఘటన ఇప్పుడు స్థానికంగా తీవ్ర చర్చనీయాంశమవుతోంది. ఈ ఘటనకు సంబంధించి పూర్తి వివరాలు మీ కోసం.

పోలీసుల కథనం ప్రకారం.. ఉత్తర్ ప్రదేశ్ ఆగ్రాలోని ఓ ప్రాంతంలో హారిఓం అనే వ్యక్తి నివాసం ఉంటున్నాడు. ఇతనికి గతంలో ఓ మహిళతో వివాహం జరిగింది. పెళ్లైన కొంత కాలానికి వీరికి ఓ కుమారుడు (12) జన్మించాడు. ఇతడు స్థానికంగా ఉన్న ఓ స్కూల్ లో చదువుకుంటున్నాడు. ఇదిలా ఉంటే.. హారిఓం గత కొంత కాలం నుంచి పూర్తిగా మద్యానికి అలవాటు పడ్డాడు. దీంతో రోజూ తాగొచ్చి భార్యను కొట్టేవాడు. కొన్ని రోజుల నుంచి ఇదే జరుగుతుంది. ఆ బాలుడు తండ్రి దాడిని చూసి తట్టుకోలేకపోయాడు.

ఇక ఇటీవల ఆ పిల్లాడు దాదాపు 3 కిలోమీటర్లు నడుచుకుంటూ వెళ్లి పోలీస్ స్టేషన్ ముందు కూర్చున్నాడు. ఆ బాలుడుని పోలీస్ అధికారులు గమనించి ఏం జరిగిందని ప్రశ్నించారు. మా నాన్న రోజూ తాగొచ్చి మా అమ్మను ఇనుప రాడ్డు, బెల్టుతో కొడుతున్నాడు. వచ్చి మా అమ్మను రక్షించాలంటూ పోలీసులను వేడుకున్నాడు. ఆ పిల్లాడు మాటలు విన్న ఆ పోలీసుల మనసు కరిగి కేసు నమోదు చేసుకున్నారు. ఆ తర్వాత పోలీసులు ఆ బాలుడిని ఇంటికి తీసుకెళ్లి అతని తండ్రిని అరెస్ట్ చేశారు. ఇక తల్లి స్పందించి.. నా భర్త ఇక నుంచి కొట్టనని ప్రమాణం చేశాడని, దయచేసి విడిచిపెట్టండంటూ పోలీసులను వేడుకుంది. దీంతో పోలీసులు హారిఓంను అరెస్ట్ చేశారు.