డ్రగ్స్ స్మగ్గింగ్ కేసులో ఇరుకున్న ప్రముఖ నటి విడుదల

సినిమా రంగం నటీమణులకు కత్తి మీద సాము లాంటిదే. ఒక్క సినిమా విజయం సాధించారో వెంటనే కాలిషీట్లు నిండిపోతాయి. అలాగే ఒక్క సినిమా ప్లాప్ అయినా కూడా.. మరో సినిమాకు అవకాశాలు చాలా తక్కువగా ఉంటాయి. ఇవి చాలదన్నట్లు వీరి చుట్టూ వివాదాలు వెంటాడతాయి. ఏ హీరోతో కనబడినా, డైరెక్టర్‌తో కనబడినా, చివరకు బంధువులతో దర్శనమిచ్చినా కాంట్రవర్సీనే. ఇది చాలదన్నట్లు పొరపాటున ఏదైనా కేసులో ఇరుక్కుపోయిందా అంతే సంగతులు. ఇటీవల సినిమా రంగాన్ని పట్టి పీడిస్తోంది డ్రగ్స్ వ్యవహారం. ఇటువంటి వ్యవహారంలో అనుకోకుండా ఓ మాయగాడి వలలో చిక్కుకుపోయింది హీరోయిన్. తన ప్రమేయం లేకుండా జైలు పాలయ్యింది. ఇంతకు ఆ నటి ఎవరంటే..?

బాలీవుడ్ నటి క్రిసాన్ పెరీరా డ్రగ్స్ స్మగ్గింగ్ కేసులో అరెస్టు అయ్యి..  యునైటెడ్ ఎమిరేట్స్‌లోని షార్జా జైలు నుండి విడుదలయ్యారు. అయితే ఆమెకు తెలియకుండా ఈ కేసులో ఇరికించారని వార్తలు వస్తున్నాయి. ఆమెను ఇరికించారని ఆరోపణలు ఎదుర్కొంటున్న ఇద్దరినీ కూడా ముంబయి క్రైం బ్రాంచ్ పోలీసులు అదుపులోకి తీసుకున్నారు. అసలేమైందంటే..? సడక్, బాట్లా హౌస్ వంటి సినిమాల్లో నటించిన క్రిసాన్ పెరీరాను ఇరికించేందుకు .. ఓ అంతర్జాతీయ వెబ్ సిరీస్ కోసం ఆడిషన్ కోసం యుఎఇకి పంపేందుకు బోరివలి నివాసి ఆంథోనీ పాల్, అతని సహచరుడు, మహారాష్ట్ర సింధుదుర్గ్ జిల్లాకు చెందిన రాజేష్ బభోటే అలియాస్ రవి పథకం పన్నారు.

ఎయిర్‌పోర్టుకు వెళుతుండగా, డ్రగ్స్ దాచిన ట్రోఫీని ఆమెకు అందజేశారు. డ్రగ్స్ దాచిన ట్రోఫీని క్రిసాన్ పెరీరా షార్జాకు తీసుకెళ్లగా అక్కడి తనిఖీల్లో బయటపడింది. దీంతో ఆమె ఖంగుతింది. వెంటనే పోలీసులు ఆమెను అదుపులోకి తీసుకున్నారు. అయితే నటిని ఇరికించారని ఆమె కుటుంబసభ్యులు ఆరోపించడంతో దర్యాప్తు ప్రారంభించారు ముంబయి పోలీసులు.   నటి తల్లి ప్రేమిలా పెరీరాపై ప్రతీకారం తీర్చుకునే చర్యగా క్రిసాన్‌ను కేసులో ఇరికించే ప్రణాళికను రూపొందించాని పోలీసుల విచారణలో తెలుసుకున్నారు. కుక్క విషయంలో పాల్ సోదరికి, నటి తల్లికి వివాదం జరిగింది. దీనికి ప్రతీకారంగా ఈ పథకాన్ని రచించినట్లు తెలిసింది. దీనికి ప్రధాన సూత్రధాని పాల్ అని గుర్తించారు. ఇదే తరహాలో పాల్ మరో నలుగురిని ఇరికించాడని అధికారులు గుర్తించారు.