సందర్భం దొరికిన ప్రతి సారి సొంత పార్టీ నేతలు, విధానాలపై విమర్శలు చేసే వైసీపీ రెబెల్‌ ఎంపీ రఘురామ కృష్ణ రాజు తొలిసారి తన స్వరం మార్చారు. సొంత పార్టీ నేతల మీద విమర్శల బదులు ప్రశంసలు కురిపించారు. మరి రఘురామ కృష్ణ రాజు ఎవరిని పొగిడారు.. ఎందుకు అనేది తెలియాలంటే ఇది చదవండి..
వైఎస్సార్‌సీపీ పార్టీ రెబెల్‌ నేత, నరసాపురం ఎంపీ రఘురామకృష్ణరాజు సొంత పార్టీ నేతలపైనే విమర్శలు చేస్తూ ఉంటారు. పార్టీ విధానాలు, నేతలపై ఆరోపణలు చేస్తారు. పార్టీకి వ్యతిరేకంగా మాట్లాడుతూ.. రెబెల్‌గా ముద్రపడ్డ ఎంపీ రఘురామా తొలిసారి తన పార్టీ నేతపై ప్రశంసలు కురిపించారు. ప్రస్తుతం ఇందుకు సంబంధించిన వీడియో వైరలవుతోంది. నందమూరి తారకరత్న మృతి చెందిన సంగతి తెలిసిందే. తారకరత్న భార్య విజసాయిరెడ్డికి దగ్గర బంధువు. దాంతో తారకరత్న మృతి చెందిన నాటి నుంచి విజయసాయి రెడ్డి దగ్గరుండి అన్ని పర్యవేక్షించారు. తారకరత్న భార్య, బిడ్డలను ఓదార్చి.. అంత్యక్రియలను దగ్గరుండి నిర్వహించారు. ఇక తారకరత్నకు నివాళులు అర్పించడానికి వచ్చిన ప్రతి ఒక్కరిని పలకరించి.. మాట్లాడారు విజయసాయి రెడ్డి. అయితే దీనిపై కొందరు విమర్శలు చేస్తున్నారు. ఈ నేపథ్యంలో తాజా పరిణామాలపై రఘురామ స్పందించారు. విజయసాయిరెడ్డి తీరు అభినందనీయం అంటూ ప్రశంసలు కురిపించారు.
ఈ సందర్భంగా రఘురామ కృష్ణంరాజు మాట్లాడుతూ.. ‘‘సినీ హీరో నందమూరి తారక రత్న చిన్న వయసులోనే మృతి చెందడం విషాదకరం. ఆయన మృతి పట్ల నా ప్రగాఢ సంతాపం తెలుపుతున్నారు. తారకరత్న మృతి నేపథ్యంలో మా పార్టీ ఎంపీ విజయసాయి రెడ్డి ప్రవర్తించిన తీరు అభినందనీయం. రాజకీయాలు శాశ్వతం కాదు. పెళ్లి, చావు వంటి సందర్భాల్లో ఒకరికి ఒకరు ఎదురుపడినప్పుడు ముఖం తిప్పుకొని వెళ్ళిపోకుండా పలకరించి, పరామర్శించడం అనేది రాజకీయాల్లో మంచి సంప్రదాయం. విజయసాయి రెడ్డి దీన్ని పాటించి.. తన సంస్కారాన్ని చాటుకున్నారు. తారకరత్నకు నివాళులు అర్పించడానికి వచ్చిన మాజీ ముఖ్యమంత్రి చంద్రబాబు నాయుడికి ఎంత గౌరవం ఇవ్వాలో విజయసాయిరెడ్డి అంత గౌరవం ఇచ్చారు. విజయసాయిరెడ్డి తన హోదా తగ్గకుండా ప్రవర్తించారు’’ అని చెప్పుకొచ్చారు.
‘‘అయితే దీనిపై కొందరు విమర్శలు చేయడం దురదృష్టకరం. రాజకీయాల్లో పార్టీల పరంగా విభేదాలు ఉండవచ్చు. కానీ ఇలాంటి సందర్భాల్లో కూడా వేర్వేరు పార్టీలు అన్నట్లు ప్రవర్తించకూడదు. ఎందుకంటే రాజకీయాలు శాశ్వతం కాదు’’ అంటూ విజయసాయిరెడ్డిపై ప్రశంసలు కురిపించారు రఘురామ. అలానే విజయసాయి రెడ్డి ట్విట్టర్‌లో ఉపయోగించే భాషా ప్రయోగంపై కూడా రఘురామ కామెంట్స్‌ చేశారు. ప్రస్తుతం ఇందుకు సంబంధించిన వీడియో వైరలవుతోంది. మరి దీనిపై మీ అభిప్రాయాలను కామెంట్స్‌ రూపంలో తెలియజేయండి.
