follow us:
మ్యాచ్‌ ఫిక్సింగ్‌ ఆరోపణలతో ఇండియన్‌ క్రికెట్‌ ప్రతిష్ట దిగజారి, జట్టు మానసికంగా కుంగిపోయి.. ఆట అటకెక్కిన సమయంలో భారత జట్టు కెప్టెన్‌గా పగ్గాలు అందుకున్నాడు. జట్టులోని సీనియర్లను కలుపుకుపోతూనే.. యువ క్రికెటర్లతో జట్టును నింపేశాడు. మట్టిలోని మాణిక్యాలను వెతికిమరీ పట్టుకుని టీమ్‌లోకి తెచ్చాడు. ఏ ఆటగాడిలో ఏ టాలెంట్‌ దాగి ఉందో కనిపెట్టి.. డాషింగ్‌ ఓపెనర్లను, మెరికల్లాంటి బౌలర్లను, మ్యాచ్‌ విన్నింగ్‌ ఆల్‌రౌండర్లను జట్టుకు అందించాడు. ఆస్ట్రేలియా అంటే భయపడే రోజుల్లోనే వారితో ఓ ఆటాడుకున్నాడు. స్వదేశంలోనే కాదు.. విదేశాల్లోనే భారత జట్టు పులే అని చాటిచెప్పాడు. క్రికెట్‌ పుట్టిన గడ్డ.. క్రికెట్‌ మక్కా లార్డ్స్‌లో చొక్కా విప్పి సింహ గర్జన చేశాడు. ముఖ్యంగా భయం తెలియని భారత జట్టును నిర్మించాడు.. అతనే సౌరవ్‌ గంగూలీ అలియాస్‌ ఇండియన్‌ క్రికెట్‌కు దాదా.
ఇలా ఇండియన్‌ క్రికెట్‌కు ఎంతో చేసిన దాదా జీవితంలో పెళ్లి కాకముందే ప్రేమ, కెప్టెన్‌గా ఉన్న సమయంలో కోచ్‌ చాపెల్‌తో గొడవ, కెప్టెన్సీ నుంచి తొలగింపు, జట్టు నుంచి ఉద్వాసన.. ఆ తర్వాత మళ్లీ జట్టులోకి ఒక వారియర్‌లా రీఎంట్రీ, ఐపీఎల్ వేలంలో అమ్ముడుపోని ప్లేయర్‌గా అవమానం.. మళ్లీ ఐపీఎల్‌లోకి ఎంట్రీ.. ఆ తర్వాత ఆటకు గుడ్‌బై. కొన్ని రోజులకు బెంగాల్‌ క్రికెట్‌ అసోసియేషన్‌ ప్రెసిండెండ్‌.. ఆ తర్వాత బీసీసీఐ ప్రెసిడెంట్‌, కరోనా సమయంలో ఐపీఎల్ నిర్వాహణ, తర్వాత బీసీసీఐ నుంచి బలవంతంగా బయటికి రావడం ఇలా.. ఎన్నో అవమానాలు, అద్భుత విజయాలతో గంగూలీ జీవితం ముడిపడి ఉంది. తీస్తే బాహుబలిని మించిపోయే సినిమా అవుతుంది. 100 కేజీఎఫ్‌లకు సమానమైన ఎలివేషన్లు ఉంటాయి.
టెస్టుల్లో ఏడో ర్యాంక్‌లో ఉన్న టీమిండియాను పటిష్టం చేయడం, ఆస్ట్రేలియా కెప్టెన్‌ స్టీవాను టాస్‌ కోసం వేచి ఉండేలా చేయడం, క్రికెట్‌కు పుట్టినిళ్లైన లార్డ్స్‌లో షర్ట్‌ విప్పి సింహంలా గర్జించడం, ఇండియన్‌ క్రికెట్‌ తలరాతను మార్చిన కల్‌కత్తా టెస్టుకు ప్రతినిధిగా నిలవడం, పాకిస్థాన్‌కు వెళ్లి మొట్టమొదటి సారిగా టెస్టు, వన్డే సిరీస్‌లు గెలవడం, సెహ్వాగ్‌, హర్భజన్‌ సింగ్‌, జహీర్‌ ఖాన్‌, యువరాజ్‌ సింగ్‌, ధోని, కైఫ్‌ లాంటి అద్భుత ఆటగాళ్లను జాతీయ జట్టుకు పరిచయం చేయడం.. ఇలా ఒక్కటేంటి? చెప్పుకుంటూ పోతే.. గంగూలీ సృష్టించిన చరిత్రకి అంతే ఉండదు. ఇన్ని అంశాలు ఉన్నా.. గంగూలీ బయోపిక్ ఎందుకు తెరకెక్కడం లేదన్నది అభిమానులను వేదిస్తున్న ప్రశ్న.
ఇప్పటికే టీమిండియా మాజీ కెప్టెన్‌ ఎంఎస్‌ ధోని, దిగ్గజ క్రికెటర్‌ సచిన్‌ టెండూల్కర్‌ జీవితాల గురించి బయోపిక్ రూపంలో సినిమాలు వచ్చాయి. అలాగే 1983 వరల్డ్‌ కప్‌పై కూడా సినిమా వచ్చింది. తాజాగా ఇండియన్‌ ఉమెన్స్‌ టీమ్‌ మాజీ కెప్టెన్‌ మిథాలీ రాజ్‌ బయోపిక్ వచ్చింది. అలాగే మరో మాజీ క్రికెటర్‌ ఝూలన్‌ గోస్వామి జీవితం ఆధారంగా కూడా బయోపిక్ రానుంది. ఇలా ప్రముఖ క్రికెటర్ల జీవితాలపై బయోపిక్‌లు వస్తుంటే.. అదిరిపోయే ట్విస్ట్‌లు, కావాల్సినన్ని ఎలిమెంట్లు, ఎమోషన్స్‌ ఉన్న గంగూలీ జీవితం గురించి మాత్రం సినిమా రావడం లేదని క్రికెట్‌ అభిమానులు ఆవేదన చెందుతున్నారు. కాగా.. 2021లో గంగూలీ బయోపిక్ వస్తుందని వార్తలు వచ్చాయి. దానికి గంగూలీ సైతం స్పందించి బయోపిక్ తీసేందుకు ప్రయత్నాలు జరుగుతున్నట్టు ప్రకటించాడు.
పైగా సినిమా పేరు ‘దాదా’ అని ప్రచారం కూడా జరగడంతో క్రికెట్‌ అభిమానులు ఫుల్‌ ఖుష్‌ అయ్యారు. కానీ ఏడాది దాటినా మరో అప్‌డేట్‌ లేకపోవడంపై అభిమానులు నిరాశచెందుతున్నారు. అసలు ఇంతకీ గంగూలీ బయోపిక్ ఉంటుందా? లేదా? అనే అనుమానం వ్యక్తం చేస్తున్నారు. అయితే.. సుపర్‌స్టార్‌ రజనీ కాంత్‌ కుమార్తె ఐశ్వర్య రజనీ కాంత్‌ గంగూలీని బయోపిక్‌ను తెరకెక్కిస్తారనే ప్రచారం జరిగింది. కానీ.. అది నిజం కాదని తర్వాత తెలిసింది. ఇక ఆ తర్వాత.. బాలీవుడ్‌ ప్రముఖ డైరెక్టర్‌ శ్రీజిత్ ముఖర్జీ తనతో తన బయోపిక్ గురించి చర్చలు జరిపారని గంగూలీ స్వయంగా ప్రకటించడంతో శ్రీజిత్ ముఖర్జీ దర్శకత్వంలో దాదా మూవీ తెరకెక్కుతుందని అంతా భావించారు.
కానీ.. 2021లో శ్రీజిత్ ముఖర్జీ.. గంగూలీని కలిసి బయోపిక్‌పై చర్చలు జరిపిన సమయంలో దాదా బీసీసీఐ ప్రెసిడెంట్‌గా ఉండటంతో.. స్క్రిప్ట్‌ వర్క్‌లో పాల్గొనేంత టైమ్‌ లేకపోవడంతో ముఖర్జీ ప్రాజెక్ట్‌ పట్టాలు ఎక్కలేదు. ఆ తర్వాత శ్రీజిత్ ముఖర్జీ మిథాలీ రాజ్‌ బయోపిక్ ‘శభాష్‌ మిథూ’ అనే సినిమా తీశారు. కానీ అది ఆశించిన ఫలితాన్ని ఇవ్వలేదు. దీంతో దాదా బయోపిక్‌ను అతను హ్యాండిల్‌ చేస్తాడో లేదో అనుమానులు సైతం తలెత్తాయి. గంగూలీ కూడా ముఖర్జీతో తన బయోపిక్ తీసేందుకు సిద్ధంగా లేడన్నట్లు సమాచారం.
అలాగే ఎస్‌యూవీ సంస్థ కూడా గంగూలీ బయోపిక్ ‘దాదా’ను నిర్మిస్తున్నట్లు ప్రకటించింది. కానీ.. గంగూలీ క్యారెక్టర్‌ కోసం ఏ హీరోను తీసుకుంటారో అనే విషయంపై ఇప్పటి వరకు స్పష్టత లేదు. దాదా రోల్‌ కోసం హృతిక్‌ రోషన్‌, రణ్‌బీర్‌ కపూర్‌, సిద్దార్థ్‌ మల్హోత్రా పేర్లు కూడా వినిపించాయి. కానీ.. స్పష్టమైన సమాచారం అయితే లేదు. కాగా.. ఇటివల బీసీసీఐ ప్రెసిడెంట్‌ పదవీకాలం ముగియడంతో ఖాళీగా ఉన్న గంగూలీని ఎవరైనా డైరెక్టర్‌ కలిసి.. బయోపిక్‌పై చర్చలు జరిపితే.. దాదా ప్రాజెక్ట్‌ పట్టాలెక్కె అవకాశం ఉంది. మరీ అభిమానులు ‘దాదా’ను తెరపై ఎప్పుడు చూస్తారో చూడాలి.
Sourav Ganguly has agreed for a Biopic 🤩, and Ranbir Kapoor might play the role of Dada.🥳#SouravGanguly #Biopic pic.twitter.com/BroAdhVbGN
— Sportskeeda (@Sportskeeda) July 13, 2021
Salman khan to act in Sourav Ganguly biopic. pic.twitter.com/dLncU8sO5j
— Bhuwantastic (@Bhuwantastic) September 9, 2021
A biopic is being produced on the legendary former Indian skipper, Sourav Ganguly 🙌
Which actor would you love to see in his role? 🤔#souravganguly #teamindia #india pic.twitter.com/Jt2njnav6B
— Sportskeeda (@Sportskeeda) September 9, 2021
