భారతదేశంపై వసీం అక్రమ్‌ పొగడ్తలు! ఇదీ.. ఇండియా అంటే

కష్టాల్లో ఉంటే పగొడికైనా సాయం చేసే గుణం ప్రతి భారతీయుడిలో ఉంటుంది. కళ్లు ముందు ఎవరైనా బాధపడుతుంటే చూసి తట్టుకోలేరు. అతను శత్రువైనా సరే.. తమ వంతు సాయం అందించేందుకు ముందుంటారు. ఇలా భారతీయుల సాయం పొందిన పాకిస్థాన్‌ క్రికెటర్‌.. 14 ఏళ్ల తర్వాత కూడా ఆ సంఘటనను గుర్తు చేసుకుని భావోద్వేగానికి గురయ్యాడు. ఆ రోజు ఇండియన్స్‌ చేసిన సాయాన్ని తన జీవితంలో మర్చిపోలేని అంటున్నాడు. ఇంతకీ ఆ క్రికెటర్‌ ఎవరా అని అనుకుంటున్నారా? పాకిస్థాన్‌ దిగ్గజ క్రికెటర్‌, మాజీ కెప్టెన్‌ వసీం అక్రమ్‌. 2009లో తనకు ఎదురైన ఆందోళనకర పరిస్థితి గురించి, ఆ సమయంలో భారతీయుల నుంచి తనకు అంది సాయం గురించి వసీం అక్రమ్‌ వెల్లడించారు.

వసీం అక్రమ్‌ మాట్లాడుతూ.. ‘2009లో గుండె, కిడ్నీ సంబంధిత సమస్యలతో బాధపడుతున్న నా భార్య హుమా అక్రమ్‌ను చికిత్స నిమిత్తం విమానంలో పాకిస్థాన్‌ నుంచి సింగపూర్‌ తీసుకెళ్తుండగా.. మార్గమధ్యలో ఇంధనం నింపుకునేందుకు విమానం చెన్నైలో ల్యాండ్‌ అయింది. అదే సమయంలో హుమా అక్రమ్‌ అపస్మారక స్థితిలోకి వెళ్లిపోయింది. దాంతో నేను ఏడుస్తున్నాను. నన్ను గుర్తుపట్టిన కొంతమంది.. ఎయిర్‌పోర్టులోని ఉన్నతాధికారులకు ఈ విషయం తెలియజేశారు. వెంటనే ఎయిర్‌పోర్టు అధికారులు వచ్చి.. నాకు ఎంతో హెల్ప్‌ చేశారు. తమ వద్ద ఇండియన్‌ విసా లేనప్పటికీ.. ఆ విషయాన్ని తాము చూసుకుంటామని చెప్పి, నాకు ఎంతో సాయం చేశారు. ఆ రోజును ఒక క్రికెటర్‌గా, ఒక మనిషిగా నేను నా జీవితంలో మర్చిపోలేను.’ అని వసీం అక్రమ్‌ పేర్కొన్నారు.

అయితే.. 2009 అక్టోబర్‌ 25న అక్రమ్‌ తన భార్య హుమా అక్రమ్‌ ట్రీట్‌మెంట్‌ కోసం సింగపూర్‌ వెళ్తుండగా.. చెన్నైలో విమానం ల్యాండ్‌ అయిన సమయంలో హుమా అపస్మారకస్థితిలోకి వెళ్లిపోయారు. అత్యవసర పరిస్థితుల్లో వసీం అక్రమ్‌కు, అతని భార్యకు ఇండియా వీసా లేకపోయినా ఎయిర్‌ పోర్టు అధికారులు ఆమెను చెన్నైలోని అపోలో ఆస్పత్రికి తరలించారు. ఆస్పత్రిలో చికిత్స పొందుతూ ఆమె తుదిశ్వాస విడిచారు. దీంతో.. ఆమె మృతదేహాన్ని చెన్నై నుంచి ఢిల్లీకి తరలించిన అధికారులు, అక్కడి నుంచి పాకిస్థాన్‌కు విమానంలో ఆమె పార్థీవదేహాన్ని తరలించారు. ఇలా వైద్యం కోసం వెళ్తున్న భార్య మార్గమధ్యలోనే మరణించడంతో పుట్టెడు బాధలో ఉన్న వసీం అక్రమ్‌కు కష్టసమయంలో ఇండియన్స్‌ అండగా నిలిచారు. మరి ఈ విషయంలో మీ అభిప్రాయాలను కామెంట్ల రూపంలో తెలియజేయండి.

Wasim Akram (in Sportstar) said “I was flying to Singapore with my late wife, there was stop in Chennai, when we landed, she was unconscious, we didn’t had Indian visa but officials told me nothing to worry, we will take to the hospital, this I will never forget this”.

— Johns. (@CricCrazyJohns) February 28, 2023