మళ్లీ బ్యాట్‌ పట్టనున్న సురేష్‌ రైనా.. ఆ ఫ్రాంచైజ్‌తో ఒప్పందం!

టీమిండియా మాజీ క్రికెటర్‌ సురేష్‌ రైనా మళ్లీ గ్రౌండ్‌లోకి దిగనున్నాడు. అతని అభిమానులకు ఇది నిజంగా శుభవార్తే. మిస్టర్‌ ఐపీఎల్‌గా పేరున్న రైనా.. చెన్నై సూపర్‌ కింగ్స్‌కు మహేంద్ర సింగ్‌ ధోని తర్వాత అతనే పెద్ద దిక్కు. కానీ.. ఐపీఎల్‌ 2021 తర్వాత రైనాను రిటేన్ చేసుకోని సీఎస్‌కే.. ఐపీఎల్‌ 2022 మెగా వేలంలోనూ రైనాను కొనుగోలు చేయలేదు. సీఎస్‌కేతో పాటు రైనాను ఇతర ఫ్రాంచైజ్‌లు సైతం పట్టించుకోలేదు. దీంతో రైనా ఐపీఎల్‌ 2022 మెగా వేలంలో ఆన్‌సోల్డ్‌ ప్లేయర్‌గా మిగిలిపోయాడు. కనీసం ఐపీఎల్‌ 2023లోనైనా రైనా ఆడతాడేమో అని ఆశపడ్డ అభిమానులను నిరాశకు గురిచేస్తూ.. రైనా ఐపీఎల్‌కు సైతం గుడ్‌బై చెప్పేశాడు.

దీంతో మళ్లీ తమ అభిమాన ఆటగాడి బ్యాటింగ్‌ను చూడలేమా అని నిరాశ చెందుతున్న ఫ్యాన్స్‌కు రైనా గుడ్‌న్యూస్‌ చెప్పాడు. యూఏఈ వేదికగా జరుగుతున్న అబుదాబి టీ10 లీగ్‌లో ఆడేందుకు రైనా సిద్ధమైనట్లు సమాచారం. డెక్కన్‌ గ్లాడియేటర్స్‌ జట్టు తరఫున ఆడేందుకు ఆ ఫ్రాంచైజ్‌తో ఒప్పందం కుదుర్చుకున్నట్లు తెలుస్తోంది. ఇప్పటికే టీ20ల్లో దుమ్ములేపిన రైనా.. ఇకపై టీ10లో తన సత్తా చాటనున్నాడు. అయితే ఇటివల భారత్‌లో జరిగిన రోడ్‌ సేఫ్టీ వరల్డ్‌ సిరీస్‌లో ఇండియా లెజెండ్స్‌ తరఫున ఆడిన రైనా మంచి ప్రదర్శన చేశాడు. మరీ యూఏఈ టీ10 లీగ్‌లోనూ అదరగొడతాడని అని ఫ్యాన్స్‌ ధీమా వ్యక్తం చేస్తున్నారు. ధోని రిటైర్మెంట్‌ ప్రకటించిన వెంటనే రైనా కూడా అంతర్జాతీయ క్రికెట్‌కు రిటైర్మెంట్‌ ప్రకటించిన విషయం తెలిసిందే.

టీమిండియా తరఫున చివరి సారిగా 2018లో వన్డే ఆడిన రైనా తన కెరీర్‌లో మొత్తం 226 వన్డేలు ఆడి 194 ఇన్నింగ్స్‌ల్లో 5615 పరుగులు సాధించాడు. అందులో 5 సెంచరీలు, 36 హాఫ్‌ సెంచరీలు ఉన్నాయి. బౌలింగ్‌లోనూ 36 వికెట్లు పడగొట్టాడు. ఇక 18 టెస్టులు ఆడిన రైనా 768 పరుగులు మాత్రమే చేశాడు. అందులో ఒక సెంచరీ, 7 హాఫ్‌ సెంచరీలు ఉన్నాయి. ఇక టీ20లకు పెట్టింది పేరైన రైనా.. టీమిండియా తరఫున 78 టీ20లు ఆడి 1605 పరుగులు సాధించాడు. అందులో ఒక సెంచరీ, 5 హాఫ్‌సెంచరీలు ఉన్నాయి. కాగా.. టీమిండియా తరఫున మూడు ఫార్మాట్లలో సెంచరీలు చేసిన తొలి ఆటగాడిగా రైనా రికార్డుల్లో నిలిచాడు.

Electric⚡on the field. Fearless with the🏏bat.
Magical at fielding. And savvy with the ball. Welcoming one of the greatest cricketers of this generation, Chinna Thala @ImRaina as part of #DeccanGladiators 2022 🏆campaign. #HumHaiDakshin
🏆#DeccanPhirJeetaga🏆#sureshraina pic.twitter.com/1ycluIZKik

— Deccan Gladiators (@TeamDGladiators) November 1, 2022